2 Corintios 7

1Kan' naken be'nn bi'cha' ak nllie'ra', ba nnézkzere kan' bne Diosen' gone' kello da wen na'. Ke len na' bill llaya'l gonllo da xhinnj dan' ll-lleyi' xpe'rllon' na' dan' ll-lleyi' lo yichjra'llda'ollon'. Llaya'l llebllo Diosen' wzenayllo ke'e yeo lla, na' gakllo be'nn xhira'll kan' lle'nre' na'. 2Lellie' neto'. Ni tore bibi béneto'. Ni tore bi bzejnie'to' krere, na' ni tore bi bxhiye'to'. 3Kere nia' ka' nench wxoa' do'l ko'llren', le ka'n ba bnekza' kana', nllie'ra' re', la'kze banllo o la'kze gatllo. 4Do yichj do ra'lla' lloe'rena' re' di'll, na' llawera' ba bnnezra' ka wen na' llonre. Na' ba bayakxhenra'lla', na' nbaraz zoa' la'kze da zan da llak kello. 5Kan' ballinto' gan' nzi'i Macedonia na', bibi latj go't yezi'ra'llto', le bxha'kzi'to'. Bni't be'nne bchachrén ake' neto', na' lekze blleb lo yichjra'llda'oto'. 6Na' Dios be'nnen' llayoe' yel llxhenra'll ke be'nne, bayonne' neto' yel llxhenra'll kan' bara' Titon' gan' zoto'n. 7Kere dan' bara' Tito na'zen' baxhenra'llto', renkze dan' badie' di'll na'n, llawere' kan' llonre na'. Na' be'e di'll zera'llre kwis yedwiato' re' da yobre. Na' ne'e, llákere ka da ka' ba goken, na' ngo' yichjre gonre kan' bnia'n. Na'llen' bawellra' bnnezra' ka'. 8Na' llakbe'ra' gokya'chere kan' bnia' le' yichen' bzoja' re' na'. Na' bdere gokya'chra' kan' bena'n dan' gokya'chere na', na' nna' bill llakya'chra' dan' bse'la' yichen', le chollzen' gokya'chere. 9Nna' llawera' le gokrenen re', nench na' gókere ka da xhinnjen' benre, na' bayátere, le bzoya'chre kan' lle'ne Diosen'. Na' benkzen wen ke naken bzoja' re' na'. 10Le kat llzoya'chllo kon kan' lle'ne Dios na', llonen nench llayátello, na' lla't yel wasrá kello, na' billbi de gakya'chello. Zan bal be'nn kate llak akre', na' bi llayat akre' xto'l ake'n, leake'n llbeyi'. 11Llawé Diosen' kan' benre gókere, le gokrenen re' bzera'llre benre kan' bne Diosen'. Na' bill benre txhen be'nnen' ben da xhinnjen', na' gokrenre nada', na' goklla're ka da xhinnjen' bene'n. Bllebre, na'llen' bzera'llre yedwia' re', na' do ra'llre bnaore benre kan' lle'ne Diosen'. Na'llen' be're yel llza'kzi' ke be'nnen' ben da xhinnjen'. Nakbie'kze billbi do'l keré de kan' benre na'. 12Na' ka nak yichen' bzoja' re' na', kere to ke be'nnen' ben da xhinnj na'zen' blle' yichja', leska' kere to ke be'nnen' bene le'e ka'. Renkzren' blle' yichja' nench gakbe're rao Diosen', nna nllie'to' re'. 13Na' nna' ba llaxhenra'llto' le ba bzenayre keto'. Na' leze llaweto' kwis ka nbarazen' zo Titon', le yeololre ba bazoare Titon' nbaraz ren da yo' lo yichjra'llda'we'n. 14Bi baye'ra' golla' Titon' nakre be'nn wen, le nnezra' gonre wen. Le da lin' nake yeolol da ka' llzejnie'to' re' na', lekze ka' da li gok dan' gollto' Titon', zoto' nbaraz ka da wen na' llonren'. 15Na' nllie'llre' re' le lljadinra'lle' kan' bzenayre ke'en, na' dan' gopre' bara'nne. 16Ke len na' llawera', na' nnezra' yeyoll gonre ka dan' lle'ne Diosen' gonre.

will be added

X\