2 Corintios 4

1Ke len na' bi lljachie'to', le rao yel nllie'ra'll ke Dios na'n bkwa'nne' llin ni rallna'to' gonto'n. 2Na' bibi llonto' nga'chze da nak zi waye'llo, na' bi llxoayayto' be'nne, na' bi llacha'to' xti'll Diosen' nench yewé be'nne wzenay ake' xti'llto'n. Llre'kze Diosen' llyixjwe'to' xti'lle'n kon kan' naken na', nench yeolol be'nne yene di'll dan' lloe'to'n, nnez akre' lo ra'llda'o ake' lloe'to' di'll li. 3Be'nn ka' ba nbeyi' yel ke llejle' ke ake', leakze'n bi llejnie' Di'll Wen na', lloe'rén aktoe'n. 4Le be'nn bi llejle' xti'll Diosen', daxi'o na' ba ncholen lo yichjra'llda'o ake'n, nench na' bi chejnie' akre', na' bi wseni' Di'll Wen ke Criston' lo ra'llda'o ake' na', le toz ka nakse lo yichjra'llda'o Diosen' ren Cristo be'nnen' nsa'a beni' xhen kwisen'. 5Le ka nak di'll dan' llyixjwe'to'n, kere llyixjwe'to' xti'll kwinto', zan xti'll Jesucristo be'nnen' nak Xanllo na'n llyixjwe'to'. Na' dan' nllie'to' Jesucriston' zoto' llonto' biteze da llakrén re'. 6Le Dios be'nnen' bne ga't beni' yellrio ni gan' gok xchole, ba broe' beni' ke'en lo ra'llda'ollo nench bembia'llo Jesucristo be'nnen' nak be'nn za'ke, na' kat ba nombia'lloe' na', na'll llejnie'llo katken' nak beni' xhen ke Diosen'. 7Kwerp kello ki naken da llat, za'kreben ka to lle' nis da nak de bennj. Na' Diosen' ba broe' beni' ke'en lo ra'llda'ollon', na' llakbe'llo bibi llak gonllo cha' bi gonne' yel wak xhen ke'en nench gak bi da gonllo. 8Ke len na' la'kze bi da zed keto' de, bi nello bi llo' xhnneze. Na' la'kze llebraz llallayraoto', bi nzanra'llto'. 9Na' llaray ake' neto', zan bi llbej yichj Diosen' neto'. Llsa'kzi' ake' neto', zan bi lloe' Diosen' latj got ake' neto'. 10Na' gateze llejto', yo'y ras llsa'kzi' be'nne neto', lle'n akre' got ake' neto' kan' bet ake' Jesús na'. Na' lloe' Diosen' latj llak keto' ka', nench nroe'n zokze Jesúsen' llakrene' neto' nna nbanto'. 11Na' nna' nna zoto', yo'y lla ni'tkze be'nn lle'n akre' got ake' neto' ni ke dan' llyixjwe'to' xti'll Jesús na'. Na' llak keto' ka' nench nakbie' zokze Jesúsen' llakrene' neto', ka nak nna nbanrén kwerp keto' ki dan' gaten'. 12Kan' llak tlla tlla lle'n akre' got ake' neto', na' re' ba ballélere yel nban keré. 13Xti'll Dios dan' nyojen nen: “Llonlira'lla' Dios, ke len na' lloa'a xti'lle'n.” Ka'kzen' llonlira'lltoe' neto', na'llen' lloe'to' xti'lle'n. 14Le Dios na'n basbán Xanllo Jesúsen' radj be'nn wat ka', leska'kzen' yesbane' lli'o kat llin lla kello, na' re' ren neto' wayejllo txhen yellinllo gan' llie' na'. 15Yeolol da ki ba gok keto' ba bllayraoto' ni ke re'. Le lle'neto' gakllo be'nn zan gakrén Diosen' lli'o nench gonlira'll-llo Xanllo Jesús na', na' leska' gak zanllo we'llo yel llioxken ke'e dan' nake' be'nn za'ke. 16Ni ke len na' bi lljachie'to'. La'kze tlla tlla zej llgor kwerp keto' ki, leska' tlla tlla llakob Diosen' yichjra'llda'oto'n. 17Na' sete te cha' bi da da'o llak kello yellrio ni. Na' da ka' za'kzi'llon' llakrenen lli'o nench lljazollo nbaraz kwis, kat lljazorenllo Diosen' ke chnare, len na' nak da za'klle ka billre. 18Na' bi wiallo da ka' nla' yellrio ni, zan wiallo da ka' bi nla' na', le dan' nla' xhej yellrio ni da te ke da ka', zan da ka' bi llre'llo yellrio ni, kere da te ke da ka', dekze dan' ke chnare.

will be added

X\