2 Corintios 2

1Kan' gok bchoyra'lla' bi badwia' re', le gokbe'ra' chenak yedwia' re', na' gakya'chere. 2Le chenak badzoaya'cha' re', ¿noxha zo yeyón nada' yezoa' nbaraz? Le ba badzoaya'cha' re'n chet ka'. 3Na' ka'kzen' bzoja' re' nench na' katen' yeda' gan' zoren', bill gonre da xhinnj dan' bzoaya'ch nada', le llaya'l gonre da yewera'. Na' beza' sore nbaraz katen' gonre dan' wzoa nada' nbaraz. 4Bzoja' re', le yoa' da zed kwis, dan' gokya'chra' kan' llonre na', na' bllellkza' keré. Na' dan' bzoja' yich ki na', kere gokra'lla' wzoaya'cha' re'n, gokra'lla' gakbe're nllie'ra' re'n. 5Gokya'chra' kan' ben be'nnen' ben da xhinnjen', na' kere nadza'n gokya'chra'. Yeololkzren' gokya'chere ra't weje kan' goken. Nia' gokya'chere ra't weje nench ke nnetka' da xhen goren' gokya'chello. 6Gan' ndopre na' bchoyre sa'kzi' be'nnen' ben da xhinnjen', na' to ka'tze naken wen'. 7Billbi gónere', leyezi'xhen ke'e, na' legonchoch ra'lle' nench soere' yel llakya'che ke'en. 8Ke len na' lla'tyoera' re', wroe'chgare yel nllie'n ba zo lo yichjra'llda'oren' ren be'nnen' ben ka'. 9Bakze bzoja' re' batna' nench nnezra' akren' llonre, cha' llzenayre kia' yeolol dan' ba bnia' gonre na'. 10Na' noteze be'nne llazi'xhenre ke'e, leska' nada' llazi'xhena' ke'e. Na' ka' llazi'xhena' ke be'nne, cha' zo da llaya'l yezi'xhena', llazi'xhena'n rao Criston' nench llakrena' re', 11nench ke gon daxi'on re' gan, le llwiallo kan' lle'nen siye'n lli'o na'. 12Ka bllina' gan' nzi'i Troas gan' bdixjwe'ra' Di'll Wen ke Criston', nakbie'tekze Diosen' ba bene' nench be'nn lla'a na', gokra'll ake' wzenay ake'. 13Na' bzoa' xhbab kwis ke be'nn bi'chllo Titon' le bi ballayre'. Na'llen' golla' be'nn ka': “Nna yellayllo”, na' baza'a baya'a gan' nzi'i Macedonia. 14Llioxken Diosen', none' nench babej Jesucriston' lli'o lo na'a daxi'on, na' nbaraz yeche'e lli'o lljazorenlloe'. Na' gateze zollo Diosen' llone' nench llakbe'e be'nne, naken da wen kwis nombia'llo Criston'. 15Diosen' llawere' llonllo nench llakbe'e be'nne naken da wen kwis wxenra'll-llo Criston'. Na' bale' llakbe'e akre' na' llonlira'll ake' Le'e, leake'n de yel nban ke ake' zejlikane, na' ye bale' bi llayazra'll ake', na' bi llonlira'll ake' Le'e, be'nn ka'n kweyi'. 16Na' be'nn ka' kweyi'n, bi llawé akre' kan' llonllon', le lle aklloe' kweyi' ake'. Na' be'nn llonlira'll Le'e na', llawé akre' ba gokrén aklloe' nench yerá ake', na' ga't yel nban zejlikane ke ake'. Na' lli'o bi llakllo to wrazllo wroe'llo be'nne, ka wen na' naken gonlira'll-llo Criston'. 17Be'nn zan llcha'a ake' di'll da lloe' ake' ke Diosen' nench yewé be'nne xti'll ake'n, na' chixhj ake' leake'. Bi llon neto' ka', do ra'llto' lloe'to' di'll rao Diosen', le txhen na' nakto' Criston' le Dios na'n bse'le neto' lloe'to' xti'lle'n.

will be added

X\