2 Corintios 13

1Nna' gak chonn ras yedwia' re'. Katen' gaollo xhia ke noteze be'nne, wroe'n nape' do'le cha' yetilen kan' llasné chop chonn be'nne lloe' ak di'll kan' goken. 2Ka di'll ka' be'rena' re' kan' bzorena' re', na' nna' nia' re' da wllope, llonteza' ka be'nn zerén re'. La'kze bi zia' gan' zeren', llzoja' re' da yobre, bi yeya'chra'lla' be'nn ka' ben da xhinnjen' cha' bi yeyat akre'. 3Llwiare gona' to da re'tere da wroe'n, Cristo na' nne'e nada'. Na' kere nnello nake' ka to be'nn bibi llak llon na'. Za wroe're' yel wak xhen ke'en, na' gone' nench sa'kzi're ka da xhinnjen' nonre na'. 4Na' la'kze ben Criston' ka be'nn bibi llak gon kan' bet ake' Le'e le' yay cruzen', zoe' nna' dan' nape' yel wak xhen ke Diosen'. Leska' neto' nakto' Criston' txhen, ben kwinto' ka be'nn bibi llak gon, na' wroe'to' re' zorén yel wak ke Diosen' neto' nench za'ke wzenia'na'to' re'. 5Lewiaya'nn cha' li nxenra'llre Jesucriston'. ¿Bi llakbe're Xanllo Jesucriston' zerenkze' re'? Lete cha' ba gonra'llre bi da gok keré kana'n, na'llen' bill llakbe're cha' zerene' re'. 6Na' zoa' rez gakbe're, neto' bi nna wsanra'llto' yel wxenra'll Le'en la'kze ll-llayraoto'. 7Na' llalwillto' Diosen' nench gakrene' re', na' llnnabto' billbi da xhinnj gonre, kere nench gakbe're neto' za'kllto', zan nench na' sore gonre da wen na'. Le toz ka llonen ke neto', cha' llayakbe'e be'nne naoto' nxenra'lltoe' o cha' ni ke llakbe'e akzre'. 8Bitbi gak nnello ke da lin', lete da llaya'l gonllo serenllo da lin' txhen. 9Llaweto' gonto' ka be'nn bibi llak gon, nench na' re' wxenra'llre do yichj do ra'llre. Na' zokzto' llalwillto' Dios, llnnabto' gakrene' re' wxenra'llre do yichj do ra'llre. 10Da kin' ba bzoja' re' ka za yedra' yedwia' re', nench yeyátere da xhinnj kerén', nench bi gonra' re' znia. Le Cristo na'n bse'l nada' naka' postl ke'e, na' benne' nada' yel llnebia' da gakrena' re', kere da wlleyia' re'. 11Be'nn bi'che, llnnaba' gakchga wen keré. Lekwek yichjre gonya'nnre yeolol dan' lle'ne Diosen' gonre. Legakxhenchaze cha' bi da llak keré. Legak toze ren lwelljre nxenra'llre Criston', na' lesó kwasro ren be'nn lwelljre. Le Dios na'n nllie're' lli'o, na' nzoe' lli'o zo bezllo nbaraz ren da yo' lo ra'llda'ollo, na'llen' llnnaba' sorenchgue' re'. 12Na' kat yellayre lewno'p na'a lwelljre. 13Yeolol be'nn ka' nxenra'll Criston' do ni, llwap ake' re' lliox. 14Na' llnnaba' rao Xanllo Jesucriston' gakrenchgue' re'. Na' yel nllie' ke'e, sorenchgan re', na' gonchga Spíritu ke Diosen' nench xhbab kerén' gaken toze ren ke'e na'. Ka'n gakchga.

will be added

X\