2 Corintios 11

1Lle'nra' wzenayre ye to chop di'll wen da wa'a kia'kza', la'kze cha' llákere di'll da bibi za'ken. Lewzenay kia'. 2Nada' bzejnie'ra' re' xti'll Criston' da nelle nench na' benlira'llre, ni ke Dios na'n nllie'ra' re' do yichj do ra'lla'. Na' lle'nra' llie're toze Cristo na', nench sa'ke gona' re' rallne'e, gakre ka to no'r we'o, no'r nna napchi'i kwine'. 3Llak nxhollra' siye'e be'nne re', na' bill gonlira'llre Criston' do ra'llre, na' bill llie're toze Le'e. Ka'n ben bel ban' nak ba xi'o, bxhiye'ba' no'r nellen' golle Eva. 4Kate llra' be'nne gan' zore na', nlla're llzejnie' akre' re' ke Jesúsen' kan' ba bzejnie' neto' re', na' llzejnie' akre' re' nlla're ke Spíritu ke Diosen', na' ren Di'll Wen ke'e na', na' le llzenayteren do ra'llre. 5Ba non akre' ka postl keré, na' llonre leake' xhen, rencha' nada' za'klla' ka leake'. 6La'kze bi za'kra' we'rena' re' di'll kwasro, ba bre'kzere da ka' ba bento'n, na' nnézkzere llejnie'to' xti'll Diosen' kwasro. 7¿Llákere bi bena' wen dan' bi bxhi'i raxhja' kan' be'rena' re' xti'll Diosen'? Bena' kwina' ka to be'nn bibi za'k, dan' bi bxhi'i raxhja' nench bena' ka sore nbaraz. 8Bxhia' mell da benn be'nn ka' lldop ll-llay llonlira'll Criston' lla'a do ga yobre nench be'rena' re' xti'll Diosen'. 9Na' kan' bzorena' re', la'kze byalljra' bi da byalljra', bi bnnabra'n re'. Be'nn ka' zaya'k Macedonia na', benn ake' da byalljra' nench bi benra' re' zede, na' bexha' bi gonra' re' zed gonnre da yalljra'. 10Llawera' llak llepa' re' ka', le nnezra' llakrén Criston' nada' lloa'a di'll li, na' nono be'nn ka' lla'a doxhen gan' nbane Acayan', gak yeka'a ake' yel llawé kia'n. 11¿Bixchen llepa' re' ka'? ¿Llákere bi nllie'ra' re'n? Nnezkze Diosen' nllie'ra' re'. 12Na' ka'kze gona' bibi wchixhja', nench na' bibi de wde' be'nn ka' nne ake', kan' llon leake'n ka'kzen' llon neto'. 13Leake'n bi nak ake' dogarje postl. Kon di'll wenra'llzen' llzejnie' akre', na' llonre' akre' re', nench gákere Criston' bse'l leake'. 14Bi yebánere kan' llon ake'n, le ka'kzen' llroe'rao daxi'on lli'o, llayón kwinen ka to angl llseni', nench gákello naken to angl za'a yebá gan' llia Diosen'. 15Ke len na' bitbi llak akre' dá ake' ziye'e ake', llon ake' ka be'nn dá lloe' di'll li, zan wllin lla, sa'kzi' ake' ke chnare yel wen da xhinnj ke ake' na'. 16Ni nia' re' da yobre, bi gákere nada' ka to be'nn bi llejnie'. Na' cha' llákere llona' xhbab da bi za'ke, lewzenay ke wa'a to chop di'll wen kia'kza'. 17Wa'a di'll wen ke kwina', la'kze cha' nnezra' bi benn Xanllo Criston' rallna' gona'n. We'kera'n ka ke to be'nn llon xhbab da bibi za'ke, be'nn bi llejnie'. 18Be'nn zan lloe' xti'll kwin ake' cha' bi da ba ben ake', ka'kzen' gona' nada'. 19Ba non kwinre ka to be'nn si'n, ke len na' llawere llzenayre ke be'nn llaso'n xhbab da bibi za'ke'. 20Llzenayre ke be'nn ka' ba ben ake' re' ka to be'nn wen llin ke ake'. Lloe're latj ziye'e ake' re', nench lloe' akre' bi da de keré, na' llontezre kon bi ne ake', na' llbiacha' ake' re'. Na' lloe're latj llgo' ake' ke xa'yre, llsa'kzi' ake' re'. 21Balátere lla be're latj ben akre' re' ka', rencha' neto' bi bayáxhjeto' góneto' re' ka'. Le chet ka' noteze be'nne llayaxhjre' lloe' di'll wen ke kwine', leska' wayaxhjra' nada' wa'a di'll wen ke kwina', la'kze gona' ka to be'nn bi llejnie'. 22Leake' ne ake' nak ake' be'nn Hebreo, leska' be'nn za'a rao dialla be'nn Hebreo ka'kze nada'. Leake' ne ake' nak ake' be'nn Israel, leska' be'nn ganna'kze nada'. Na' leake' ne ake' nak ake' xhi'nn dialla da Abraham, leska' xhi'nn dialla da Abraham nada'. 23Llasné ake' bse'l Criston' leake' nench gon ake' xchine'n. Lekze Le'en bse'l nada', na' ba benlla' xchine'n ker ka leake'. Si'xhenre dan' lloa'a di'll ka llon to be'nn bi llejnie'. Ba benlla' llin war ker ka leake', da zan ras bdin koxchis nada' dan' lloa'a xti'll Dios na'. Na' zan ras ba bwie be'nne nada' bro' akte' nada' rill ya, ker ka leake'. Na' zan ras ba be'x ake' nada', na' gokra'll ake' got ake' nada'. 24Ga'y kwen twaljalloa (39) ras weje bdin be'nn Israel ka' nada' kone sot de yid. 25Chonn ras bdin koxchis ka' nada' xhis. Na' to bchekw ake' nada' yej. Na' ka zya' to lo barco, chonn ras bxhinnj barcon' lo nisda'on, na' ganne bara'a. Na' chnia bllia' tlla chyere lo nisda'on. 26Zan ras ba bya'a yell zi'te jatixjwe'ra' xti'll Criston'. Zan ras ganne gok bdia' yeo ka', na' zo ka bdia' ga zjalla'a be'nn wan ake, na' zo kat be'nn wra'll kia' ka' gokra'll ake' got ake' nada', na' zo kat be'nn bi nake be'nn Israel, leska' gokra'll ake' got ake' nada'. Na' bzoa' nxholl do yell ka', na' do ga nono be'nn llra', na' do lo nisda'o ye ra'tze ke gota'. Na' bllach be'nn bxhiye'e ake' ne ake': “Nakllo txhen,” na' gokra'll ake' got ake' nada'. 27Zan ras bena' xchin Diosen' to baxa'kra', na' zan ras bi go't latj tasa'. Nombia' yel llbil lldon, le zan ras bi go't da ye'j gawa'. Na' zan ras bayaya' bi go't xhara'na'. 28Da zanllre da bxha'kzia' da bi lloa'a di'lle, na' leska' yeo lla llakzedra', akre llak ke be'nn lwelljllo ka' lldop ll-llay llonlira'll Criston' toto yell ka'. 29Na' cha' llakre yillwe', wa llakya'chra' kwis, llaktekzera' nada'n llaka' yillwe'n. Na' leska' kat no be'nn llko'yelre' re' gonre da xhinnj, llake lo ra'llda'wa', llaklla'a cha' ba llonre kan' ne ake' na'. 30Na' cha' llonen bien we'lla' di'll ke kwina', llaya'l wa'a di'll ke dan' llroe'n bibi de gona' to wraza'. 31Na' Dios be'nnen' lloe'raollo ke chnare, nnezre' lloa'a di'll li. Le'en nake' Xa Xanllo Jesucristo na'. 32Na' ye to da gok kia', kan' bzoa' yell gan' re Damasco, be'nnen' gokrén be'nn wnebia'n nzi'i Aretas, bzoe' be'nn ak bdap ake' gan' llde be'nn ka' gan' zo ze'e dan' nechj yell na', nench go'x ake' nada' kate yelloja' na'. 33Na' be'nn lwelljllo ka' bro' ake' nada' to lo wit, na' baletj ake' nada' ko'llre ze'e dan' nechj yell na', na' bara'a lo na'a be'nn ka' gokra'll go'x nada'.

will be added

X\