2 Corintios 1

1Nada' Pablo naka' postl ke Jesucriston', le ka'n byazra'll Diosen'. Llzoja' yich ni ke re' lldop ll-llayre llonlira'llre Xanllo Diosen' gan' nzi'i Corinto, na' rente ke nollre be'nn lla'a yeolol yell gan' nbane gan' nzi'i Acaya, be'nn ka' ba brej Diosen' nak rallne'e. Nada' na' ren be'nn bi'chllo Timoteo na', llwapto' re' lliox. 2Na' llnnabto' rao Xallo Diosen' ren rao Xanllo Jesucriston' gakrén akchgue' re', na' wzoa ake' yichjra'llda'ore so kwezre nbaraz. 3Llaya'l wxenra'll-llo Diosen', le nake' Xa Xanllo Jesucristo na'. Le Xallo Dios na' llaya'chra'lle' lli'o, na' llonne' lli'o yel llxhenra'll kat bi da llak kello. 4Le'en llonne' neto' yel llxhenra'll ke yeolol bi da za'kzi'to' nench na' lloe'to' yel llxhenra'll ke yezikre be'nne kate bi da za'kzi' ake'. Kan' llonxhenra'll Diosen' neto', leska'n llonto' ke no be'nne lloe' aktoe' yel llxhenra'lle. 5Llza'kzi'to' kwis kan' bxha'kzi' Cristo na', na' ka'n llayónn Diosen' neto' da xhen yel llxhenra'lle le nxenra'llto' Cristo na'n. 6Da zan da llak keto' dan' llroe' llsedto' xti'll Diosen', na' za'ksen nench llayonnto' re' yel llxhenra'll bi da za'kzi're, na' llakrenen re' nench yellinre gan' llia Dios na'. Diosen' llonne' neto' yel llxhenra'll kat bi llak keto' nench na' lekze neto' llayonnto' re' yel llxhenra'll kat bi da llak keré, nench na' re' soere kat za'kzi're kan' za'kzi' neto'. 7Bexhto' soere dan' llak kerén', le nnézeto' katen' za'kzi're kan' za'kzi' neto', leska' llayónn Diosen' re' yel llxhenra'll kan' llonkzre' neto'. 8Be'nn bi'che lle'neto' nnézere kan' bxha'kzi'to' kan' bzoto' gan' nbane' Asia na'. Bxha'kzi'to' kwis, llákseto' bill yezokze, na' bentekzto' xhbab gatto' na'ze. 9Bentekzto' xhbab lo ra'llda'oto' ba za'a yel goten'. Kan' gok keto' nench bsedren neto' bi wxenra'll kwinto', na' bsedren neto' llaya'l wxenra'llto' Dios be'nnen' llasbán be'nn wat ka'. 10Dios na' basre'e neto' bi gotto'. Na' nna' nna llasrakze' neto'. Na' nna llonto' rez wasrakze' neto' batteze, 11cha' re' gakrenre neto' yelwill-llo Diosen' serene' neto'. Na' cha' zanre gonre ka', na'll leska' zanre we're yel llioxken ke'e kat ba gokrene' neto' na'. 12Llawera' lloa'a di'll kan' llonto' na', le nnézeto' lo ra'llda'oto' llonto' wen keré, do yichj do ra'llto', na' renkze ke noteze be'nne. Kere nello dan' nakto' be'nn si'n na' llonto' wen na', zan dan' nllie' Diosen' neto', ke len na' llakrene' neto' llonto' wen ke yeolol be'nne. 13Yich ka' llzojto' re', naken da gak wrabre, na' chejnie're kon kan' nyojen na', na' gona' rez chejnie'ren kwasro, 14kan' ba byejnie'ren ra't na', nench na' kat llin lla yed Xanllo Jesúsen' da yobre, yewere nakre neto' txhen, na' yewé ren neto' nakto' re' txhen. 15Na' kone len na' gokra'lla' yedwia' re' nench yellop rase sollo txhen, bena' xhbab yewere yedwia' re'. 16Gokra'lla' tia' wia' re' kan' bdia' bya'a gan' nzi'i Macedonia, na' gokra'lla' yedia' kan' baza'a gan' bya'a na'. Na' gakrenre nada' yeya'a gan' nzi'i Judea na'. 17Do ra'lla' gokra'lla' ka', kere llona' kon ka nen kia' kan' llon be'nn bi nxenra'll Dios, kat bi da gon ake' to ne ake': “Gona'n”, na' to ne ake': “Bi gona'n”. 18Nneze Diosen' kat bin' lle'neto' gonto', bi llon chope lo ra'llda'oto'n. 19Leska' Jesucriston' be'nnen' nak Xhi'nn Dios, toze ka nake' batteze, bi nne gon chopre cha' bi da bne'e gone'. Yeololte bi da ba bne'e gone', llonte'n. 20Le yeolol da wen ba bne Diosen' gone', nnézkzello gonkze'n dan' bse'le' Jesucriston'. Ke len na' kone yel llakrén ke Jesucriston', llonlira'll-llo Diosen' llelloe': “Ka'n gakchga.” 21Dios na' breje' re' ren neto', na' llone' zello llonlira'll-llo Criston'. 22Na' benne' lli'o Spíritun', na' zon lo yichjra'llda'ollon' nench nnézello Dios na' ba bxhie' lli'o ka no xhi'nne', na' yeolol da wen ba bne'e gone', wllin lla kat gone'n. 23Bi nna yeda' Corinto gan' zore na', yedwia' re' kan' bnia' gona' na', bi nna yeda' nench ke yedtila' re' ke da xhinnj ka' llonre na'. Diosen' nombie' yichjra'llda'wa', na' nnezre' di'll ki nia'n naken da li. 24Nnézkzere kere lle'neto' nnebia'to' lo yichjra'llda'ore; llakrenzto' re'n nench na' sore nbaraz, na' wxenra'llya'nnre.

will be added

X\