1 Timoteo 4

1Ba be'e Spíritu ke Diosen' di'll li, nench chejle'llo wllin lla kate bale be'nne kwej yichj ake' di'll li ke Diosen' dan' llejle'llon', na' chejle' ake' ke da gon daxi'o ka' nench wxoayay aken leake'. 2Na' nni't be'nn ka' wzejnie' di'll wenra'lle, na' billbi gak akre' kat siye'e ake' be'nne. 3Wllon ake' wchayna'a be'nne, na' wllon ake' ye'j gaollo bal yel wao, la'kze naken da ba ben Diosen' nench gaollon, lli'o nxenra'll-llo Criston' nombia'llo di'll li ke'en, na' lloe'llo yel llioxken ke'e. 4Yeolol dan' ben Diosen' naken da wen, naksen da llaya'l si'llo kon cha' we'llo yel llioxken ke'e, katen' gaollon na'. 5Le kone lloa' xti'll Dios na', na' dan' lloe'llo yel llioxken na', llayaken yall nench llak llaollon. 6Ka nak be'nn lwellj lli'o nxenra'll Jesucristo na', cha' wzejnie' akroe' ka da ki ba bnia' rwe' na', na' gakrén akoe', na'll gako' to be'nn wen llin wen ke Jesucriston'. Lekzen gonen lachra'llo' cha' wzejnie'ro' be'nn xti'll Diosen' dan' llejle'llo na', le naken to di'll wen, da ba bzenayo' ke. 7Bi wzenayo' ke di'll wenra'lle da llarjla'll be'nn bi nxenra'll Dios. Bzoteze be'la'll gono' kan' llazra'll Dios na'. 8Nnézkzello kat llta nia'na'llo, llakrenen kwerp kellon' ra'te. Na' kat llonllo kan' llazra'll Dios na', llakrenllen lli'o nench zo bezllo kwasro, llinte lla kat lljazorenlloe' ke chnare. 9Na' di'll li naken da ni, za'ken chejle'llon, na' za'ken wzenayllon do yichj do ra'll-llo. 10Ke len na' llonllo xchine'n, na' llaora'll-llo kat zi'chi'll no be'nn lli'o, le nnézkzello Diosen' zoe' ke chnare, na' sollo rez gone' wen kello, Le'en lle'nre' yesre'e yeolol be'nnach, na' ka'n naksen gone' ke be'nn llonlira'll Jesucriston'. 11Na'llen' bzejnie' be'nne da ka' ba bnia'n, na' goll ake' wzenay ake' ke yeololkzen. 12Bi go'o latj gon akre' rwe' kaze dan' nna nako' bi llaban. Yeolol bi da llono', ben nench re'e be'nn ka' llonlira'll Jesucriston' kan' llaya'l gon ake' na'. Broe' akre' kan' ne'o, na' kan' nako' be'nn wen, na' kan' nllie'ro' be'nne, na' kan' zechicho' llonlira'llo' Diosen', na' kan' nako' be'nn ra'llda'o xhira'lle. 13Na' chak za yeda' na', brek yichjo' wrabo' xti'll Diosen', rao be'nn ka' lldop ll-llay nxenra'll Jesucriston', na' bnneyoe akre' wzenay ake'n, na' bzejnie' akre' akren' zejen'. 14Na' bi gatra'llo' ke dan' bro' Diosen' rao na'o gono', kan' bxoa ta'k be'nn gor brao ka' yichjo'. 15Llaya'l se'o do yichj do ra'llo', gono' dan' brej Diosen' rwe' gono', nench re'e yeolol be'nne zejkzo' llono' da wen. 16Na' wia'o kan' so kwezo' nench soteze so'o gono' kan' lle'ne Dios na', leska' soteze so'o wzejnie'ro' be'nne xti'll Diosen' kan' naken. Na' ka'n gono' nench gakrenen rwe', na' leska' gakrenen be'nn ka' llzenay xti'llo'n, nench na' yerare rao da xhinnjen' kate llin lla keré.

will be added

X\