1 Timoteo 2

1Da na' nake lliarao xhen gon lli'o nxenra'll Diosen': llaya'l nnábello Diosen' gonne' da yálljello, na' nnabllo gakrene' yeolol be'nne, na' we'llo yel llioxken ke'e, ka nak da wen na' llone' kello. 2Na' llaya'l nnabllo ke no wnebia' brao ak, na' ren no be'nn wnebia' zerén re', nench na' so kwezllo kwasro, na' nono wllon wxenra'll-llo Diosen', leska' nono wllon billre da lle'nello gonllo da llaya'l gonllo. 3Da ni naken wen, na' ka'n llazra'll Diosen', be'nnen' nak wasrá kello. 4Le Le'en lle'nre' yerá yeolol be'nne rao da xhinnjen', na' lle'nre' chejnie' akre' di'll li ke'e na'. 5Toze Diosen' nake' be'nnen' za'k wxenra'll yeolol be'nne, na' lekze toze be'nnen' zo llde xti'll-llon' rao Diosen', Le'en re Jesucriston' be'nnen' gorje goke' be'nnach. 6Jesucristo na' be'e latje gote' ni ke da xhinnj ben yeolol be'nnach, na' ka bllin lla bllia Diosen' bia'a, kana'llen' bnneze be'nnach kan' bene' kellon'. 7Na' Diosen' breje' nada' naka' postl, nench llsedra' be'nne xti'lle'. Lloa'a di'll li, bi ziya', le txhen na' naka' Criston', breje' nada' nench llzejnie'ra' be'nn bi nake be'nn Israel di'll li ke'en, nench wxenra'll ake' Le'e. 8Na' dan' lle'nra' gak doxhente, yedop yellay be'nn ka' yelwill ake' Dios, gak ake' be'nn ra'llda'o yalle, nench wlis na'a ake'n rawe', na' bi gaklla'a ake' be'nne, na' bi wchachrén ake' be'nne. 9Na' ka nak no'r ka' llonlira'll Jesucriston', llaya'l gak xhara'ne da nla' xhej de bara'nne, ka llon be'nn zej lixheje, kere te aktere' yeyón yich yichj ake'n nbaraz, na' wllia akrize' ya cha'o dan' nzi'i oro o de yej cha'o dan' nzi'i perla, na' ra'll xha da za'k lsa'ke gore. 10Zan llaya'l gon ake' da wen kan' lle'ne Diosen' gon ake', kan' llon no'r be'nn nxenra'll Le'e. 11Leska' no'r ka' llaya'l so ake' llize wzenay ake' ke be'nn llroe' llsede xti'll Diosen', gon ake' kon kan' ye ake' leake'. 12Nada' bi lloa'a latj wzejnie' no'r ka' be'nn byio, na' bi lloa'a latj nnebia' ake' be'nn byio ka'. Llaya'l so ake' llize. 13Le kate ben Diosen' be'nnach, zga'tek Adán na' bene', na' za benre' Eva na'. 14Na' daxi'on kere bxhiye'n Adán na'n, Eva na'n bxhiye'n nench bene' da'n nllon Diosen' gone', na'llen' bayake' be'nn wen da xhinnje. 15Na' la'kze no'r ka' llzo xhi'nn ake' za'kzi' ake', yerá ake' cha' nni'tteze nni't ake' wxenra'll ake' Diosen', na' llie' akre' Le'e, na' cha' nni't ake' gon ake' kan' llazra'll Diosen', na' gon xhira'll lo yichjra'llda'o ake'.

will be added

X\