1 Be'nn bi'che, bill llonen bien wzoja' wzenra' re', bi lla yed Xanllo Jesúsen' da yobre. 2 Ba nnézkzere kwasro kat llin lla, yed Xanllon' ka ke to be'nn wan, be'nn dá tlle'lre. 3 Kat nne no be'nn ak: “Nbaraz zollo bibi llak kello”, kat llinkze lla kweyi' ake'. Ka llak ke to no're llak bes so bida'o ke'e, ka'kzen' gak ke ake', bi gak wxhonnj ake', na' kweyi' ake'. 4 Na' lli'o be'nn bi'che, bi nchole yichjra'llda'ollon', na'llen' bi gak kello ka ke to be'nn lljaran ake' bi da de ke'e. 5 Na' nombia'llo Diosen', na' beni' ke'en ba llseni'n kello ka ke be'nn dá tella, na'llen' bi nchole yichjra'llda'ollon'. 6 Ke len na' bi llaya'l gatra'll-llo ka llon be'nn yobre, na' sollo gonllo kan' llazra'll Dios na'. 7 Le be'nn ka' lltas, tlle'len' lltas ake', na' be'nn ka' llzolle, tlle'len' llzoll akre'. 8 Zan ka nak lli'o nakllo ka be'nne dá tella. Llaya'l sollo gonllo kan' llazra'll Diosen'. Llaya'l gonlira'll-lloe', na' llie' lwelljllo, na' yewello dan' nnézello yesrá Diosen' lli'o. Cha' gonllo yeolol da ka', gakllo ka be'nn waka'a ya, be'nne nake to de ya da nkwe'j le'e, nench bibi gakre' kat cheje' rao wdile. 9 Kere nbej Diosen' lli'o nench sa'kzi'llo ke do'l kello na'n, nbeje' lli'o nench gonlira'll-llo Xanllo Jesucriston', na' yerallo rao da xhinnjen'. 10 Jesucriston' bzane' yel nban ke'e, baso't ake' Le'e ni ke lli'o, nench yellinllo gan' llie' na', la'kze nna nbanllo o cha' ba gotllo kat yede' da yobre. 11 Na'llen' legón kan' ba llonkzre, na' leserén lwelljre, na' legakrenlle lwelljre, nench na' sotezre gonlira'llre Jesucriston'. 12 Be'nne bi'che, lla'tyoeto' re', gapre bara'nn be'nn ka' llon xchin Xanllo Jesucristo na', le leake'n llwia llyi ake' re', na' llzejnie' akre' re'. 13 Llaya'l gap akre' bara'nne, na' llie' akere' ka llin na' llaso'n ake'n. Na' sorén lwelljre kwasro. 14 Ka'kzen' lla'tyoera' re', be'nn bi'che, letil be'nne bi lle'ne gon ak llin, lewpé be'nne llatra'lle, na' lewzejnie' be'nne bi nna chejnie' da nak da llaya'l gon ake'. Na' lesó legape yel llxhenra'll ke yeolol be'nne. 15 Cha' bi da llone be'nn re', bi wayechjre yedilrén le'e. Na' lennao legón da wen ren lwelljre, na' lekze ka' lennao, legón da wen ren noteze be'nne. 16 Lesoteze lesó leyewé. 17 Lesoteze lesó leyelwill Dios. 18 Lewe'e yel llioxken ke Dios biteze da llak keré, le ka'n lle'nre' gon lli'o llonlira'll-llo Xanllo Jesucriston'. 19 Bi wllonrizre gon Spíritu ke Diosen' dan' lle'nre' gone keré. 20 Bi gónere kaze di'll da we'e be'nne lloe' di'll da ba goll Diosen' le'e. 21 Na' lewiaya'nn ke di'llen' lloe' ake'n, na' sore wzenayre da ka' nak da wen. 22 Lekwe'yi'll biteze da nak da wlleyi' re'. 23 Dios na' llone' ka zo bezllo kwasro kone xhbab kello yo' lo ra'llda'ollo. Na' llnnaba' gone' gak lo ra'llda'oren' yalle. Na' leska' gonchgue' bibi da xhinnj gonre lo yichjra'llda'ore, ni kwerp keré, nench na' bibi xhia keré ga't kat yed Xanllo Jesucriston' da yobre. 24 Dios be'nnen' ba brej lli'o nakllo rallne'e llone' kon da ba bne'e, ke len na' gone' lli'o gak ra'llda'ollon' yalle. 25 Be'nn bi'che, lesó lennab gakrén Diosen' neto'. 26 Na' kat ga yellay lwelljre, lewno'p na'a lwelljre, na' wroe'n nllie' lwelljre. 27 Llnnabra' re' wrabre yich ni, nench yene be'nne lwelljre ka' zjalla'a gan' zore na', le ka'n lle'ne Xanllo Jesucriston' gonre. 28 Na' sochga Xanllo Jesucriston' gakrenchgue' re'. Ka'n gakchga.
