1 Tesalonicenses 4

1Nna' be'nn bi'che, ba broe' bsédeto' re' gonre kan' llazra'll Diosen', na' ba naore llonren'. Kan' ne Xanllo Jesúsen', lla'tyoeto' re', nnaollre gonre dan' llazra'll Diosen'. 2Ba nnézkzere bi ka da ka' blliato' bia'a gonren', na' nak aken dan' ne Xanllo Jesús na'. 3Diosen' lle'nre' soteze sollo gakllo be'nn ra'llda'o yalle. Bi lle'nre' lljatil-llo no're bi nak no'r kello o cha' no're lljatile' be'nne bi nake xhyiwe'. 4Lle'ne Diosen' nneze totore kan' llaya'le sorén xho'r-re, bibi do'l gapre, na' gone lwelljre ka to be'nn za'ke. 5Bi gonre kan' llon ak be'nne bi nombia' ak Dios, kon llzorén ake' noteze no're choll weje, na' llon ake' kan' llza'ra'll lo ra'llda'o ake' na'. 6Ni to re' bi gonre da bi llaya'l gonre, siye'rizre no be'nn lwelljre, na' sorenre no'r ke'e. Bakze be'rento' re' di'll kan' basníseto' re', kan' gon Xanllo Diosen' da sa'kzi' be'nn llon ak yeolol da xhinnj ka' nak ka da ki. 7Diosen' breje' lli'o nench gakllo be'nne ra'llda'o yalle, kere nench gonllo da xhinnj ki. 8Na'llen' cha' re' bi llzoare di'll ke da ki ba bzejnie'to' re', kere xti'll be'nnachen' bi llzoare, xti'll Diosen' bi llzoare. Le'en benne' lli'o Spíritu ke'en. 9Bi llonen bien wzoja' re', kan' llaya'le llie' lwellj lli'o be'nnach gonlira'll-llo Jesucriston'. Dios na'n ba bzejnie're' re' nench llie' lwelljre. 10Na' da li ba nllie're yeolol be'nne lwelljre ka', zjalla'a doxhen gan' nzi'i Macedonia. Nna' lla'tyoeto' re' be'nn bi'che, lellie' akllre'. 11Na' totore leyeyirjla'll bi llin gonre, nench na' so kwezre kwasro kan' nlliato' bia'a na', na' bi tare wiare bi llaso'n be'nn yobre. 12Legón kan' ba bnia' na', nench gakbe'e be'nn ka' bi non lli'o txhen llonkzre wen, na' len gakrenen re', bibi yálljere da gonrenre llin. 13Lle'neto' nnézere be'nne bi'che, kan' gak ke be'nn benlira'll Jesucriston', na' ba got ake'. Lle'neto' nnézere nench ke soya'chre, kan' llon be'nne bi llone rez cha' yere'e rao da xhinnjen'. 14Llonlira'll-llo got Jesúsen', na' babane' radj be'nn wat ka'. Na' lekze llonlira'll-llo Diosen' gone' nench Jesúsen', kat yede' da yobre, zanche'e be'nn ka' ba got benlira'll Le'e yellrio ni. 15Na' llzéneto' re' di'll ni, naken dan' bsede Xanllo Jesúsen' lli'o. Cha' nna nbanllo kat yede' da yobre, bi nnello yoblle kwiaraollo kerke be'nn ka' ba wasa'te. 16Na' ka nake Xanllo Jesúsen' kwine'n yetje' le' yebán', na' nne'e zillje, na' to angl brao na' nne'e, na' yénello kwell trompet ke Diosen'. Na' be'nn ka' wasa't benlira'll ake' Criston', zga'tek leake' yebán ake' radj be'nn wat ka'. 17Yeyoll na', lli'o llonlira'll-lloe', cha' nna nbanllo yellrio ni, gon Diosen' yeyeprén aklloe' txhen le' yebán' lo bej ka', na' yellayllo Xanllo Jesúsen' le' yebá na'. Na' lljazorenlloe' ke chnare. 18Ke len na' lewasnise lwelljre kan' gak na'.

will be added

X\