1 Tesalonicenses 3

1Na' bill bzoeto' dan' bill llre'e lwelljllo na'. Na' bachoyra'llto' yega'nnto' gan' nzi'i Atenas. 2Na' bse'lto' be'nn lwelljllo Timoteon' gan' zore na'. Na' Timoteo na' llone' xchin Diosen', na' llonrene' neto' txhen llyixjwe'to' Di'll Wen ke Criston'. Na' bse'ltoe' badye'tyoere' re' bi soya'chre, na'llen' badwie' re' nench sechichre gonlira'llre Criston'. 3Bse'ltoe' gan' zoren' nench ni tore bi gak débere bixchen ll-llayraore. Nnézkzere lli'o llonlira'll-llo Criston', llaya'le sa'kzi'llo yellrio ni. 4Kan' bzorento' re' na', bzéneto' re', dekz de tello yel llza'kzi', na' nna' llwiare ba llak kan' bneto'n. 5Na' bi bxhenra'lla', le bi nna nnezra' akre llakre, na'llen' bse'la' Timoteo na', gan' zoren' nench nnezra' cha' do ra'llren' llonlira'llre Criston'. Le bena' xhbab gokra' cha' daxi'o na'n ba bzoen bxhiye'n re', na' benre'n re'. Le cha' ba bzoen benre'n re', ba bendadto' xchin Diosen' radjre na' chet ka'. 6Na' nna' bara' Timoteon' ba bede' gan' zore na', na' ba be'rene' neto' di'll xhen raz, bne'e zokzre llonlira'llre Criston', na' nllie're yeolol be'nne. Na' leska' ne'e lljadinra'llre neto', na' zera'llre re're neto', leska'kzen' zera'll neto'. 7Ka'n naken be'nn bi'che, ll-llayraoto' na' biteze za'kzi'to', na' ba bayakxhenra'llto', ba bnnézeto' zoteze zore llonlira'llre Criston'. 8Di'll likze nbaraz zoto', le zechichre llonlira'llre Xanllo Cristo na'. 9Na' ke len na' llaweto' rao Diosen' kan' llonren', na' ka' zetezto' lloe'to' yel llioxken ke'e kan' llonre na'. 10Na' llalwilltoe' do lla do yere, llnnábetoe' gone' yedil yellay lwelljllo da yobre, nench wzejnie'lleto' re' akren' llaya'l gonre nench wxenra'llya'nnre. 11Na' llnnábeto' Xallo Diosen' ren Xanllo Jesucriston' gakrén akchgue' neto' yedwiato' re'. 12Na' llnnábeto' Xanllon' gone' llie'lle lwelljre, na' gone' llie'llere yeolol be'nnach ka'kzen' nllie' neto' re'. 13Llnnabkzto' gone' sechichre gonlira'llre', na'llen' gak ra'llda'oren' yall rao Xallo Diosen', na' bibi do'l xhia gapre katen' yed Xanllo Jesucriston' da yobre, na' nche'e yeolol be'nn ka' ba brej Diosen' nak ake' rallne'e.

will be added

X\