1 Tesalonicenses 2

1Be'nn bi'che, re' nnézere dan' badwiato' re', bi bden ka'ze. 2Na' nnézkzere kan' bxha'kzi'to' kan' byejto' gan' nzi'i Filipos, na' kan' bzi'chi'll be'nn ka' neto'. Na' Dios na' gokrén neto' nench bi bllebto' bdixjwe'to' Di'll Wen ke'en raore, la'kze be'nn zan bllon ake' chixjwe'to'n. 3Le kan' go'tyoeto' re' wzenayre ke Diosen', bi bzejnie'to' re' krere, ni kere gokra'llto' gonto' da xhinnj, ni kere gokra'llto' siye'to' re'. 4Zokzto' lloe'to' di'll kan' lle'ne Dios, be'nnen' bse'l neto' chixjwe'to' Di'll Wen ke'en. Na' ka nak dan' llyixjwe'to'n, kere llontekto' bien nench yewé be'nne, zan nench yewé Diosen' be'nnen' nneze bi yo' lo yichjra'llda'ollon'. 5Nnézkzere kan' bento', ni chnia gaze bi nna we'to' di'll wallajllo nench yewere xti'llto'n, na' bi bxhiye'to' re' nench gonnre neto' bi da de keré. Nnezkze kwin Diosen' ka'n naken. 6Na' kere llayirjla'llto' akre gonto' nench gon be'nn neto' xhen na' o gonre neto' xhen, o yezikre be'nn gone' neto' xhen. Na' wak wchie'to' re' gonto' ka wzenayre keto' da bse'l Criston' neto' lloe'to' xti'lle' na', na' bi llonto'n. 7Nllie'to' re' ka'kze nllie' to no're xhi'nne' da'o ak llasgore'. 8Na' dan' nllie'to' re' na', be'rento' re' Di'll Wen ke Diosen'. Na' kere da na'ze da bento', leska' bsanra'll kwinto' bento' ga zerao bxha'keto' nench gokrento' re', le nllie'to' re'. 9Be'nn bi'che za'ra'llkzere kan' bzorento' re', bento' llin kwis ga zerao bzoeto'. Bento' llin do lla do yere nench bibi gaxt bzoato' re', chak badtixjwe'to' re' xti'll Diosen'. 10Renkzren' nnézere na' ren Diosen' nnezre', kan' bzorento' re', bzoto' do ra'llto' radj re' llonlira'll Jesucriston'. Bento' kan' llazra'll Diosen' nench nono bne napto' do'le. 11Nnézkzere kan' go'tyoeto' re' gonre da wen na', kan' btipra'llto' re'. Bento' ka llone to be'nne xhi'nne'. 12Na' gollto' re' gonre da wen kan' llaya'l gon lli'o nakllo rao na'a Diosen', le ba breje' lli'o nench nnebia'renlloe', na' nench gone' gak wen kwis kello katen' lljazorenlloe' gan' llie' na'. 13Ke len na' zoteze zoto' lloe'to' yel llioxken ke Dios dan' ba bzenayre xti'lle' na', kan' bdixjwe'to'n re'. Zakbe'kzere bi naken xti'll be'nnach, naken xti'll Dios dan' lloe'to' na'. Na' xti'll Dios dan' lloe'to' na', llejle're na' llcha'n xhbab da yo' lo yichjra'llda'oren'. 14Be'nn bi'che, ba gok keré kan' gok ke be'nn ka' lldop ll-llay llonlira'll ake' Xanllo Jesucriston' gan' nbane Judea na'. Bsa'kzi' be'nn wrall ke ake' ka' leake', na' ka'kzen' basa'kzi' be'nn wrall kere ka' re'. 15Na' be'nn wrall ke ake' ka', baso't ake' Xanllo Jesúsen', na' ka'kze ben akre' be'nn ka' be'rén leake' xti'll Diosen' kana'. Na' leska'n ben akre' neto' baraydo ake' neto'. Na' lla'a ake' llon ake' da bi llazra'll Diosen', na' llwie akre' yeolol be'nnach, 16le ll-llon ake' wzejnie'to' yezikre be'nne bi da llaya'l gonllo nench yerallo rao da xhinnjen'. Na' lla'teze lla'a ake' llon ake' ka', na'll llzan aklle' do'l ke ake'n, ke len na' ba llsa'kzi' Diosen' leake'. 17Neto', be'nn bi'che, la'kze ba baza'to' gan' zoren', na' bill llre'e lwelljllo, dekz de lljadinra'llto' re', na' zera'llto' kwis yedwiato' re' da yobre. 18Na' to chop ras gokra'lla' yeda', na' daxi'o na' bi bennen latje. 19Llaweto' llonre wen, ke len na' zoto' bexhto' soto' nbaraz kat yed Xanllo Jesucriston' da yobre, Le'e yewere' dan' bzejnie'to' re' llzenayre ke'en. 20Da li re' llonre nench llaweto' na' nench zoto' nbaraz.

will be added

X\