1 Tesalonicenses 1

1Nada' Pablo llzoja' re' lldop ll-llayre llonlira'llre Xanllo Jesucriston' gan' nzi'i Tesalónica, na' nakre txhen Xallo Diosen'. Na' nada' ren Silvano ren Timoteo llnnabto' rao Xallo Diosen' ren rao Xanllo Jesucriston', gakrén akchgue' re', na' wzoa ake' yichjra'llda'oren' so kwezre nbaraz. 2Yo'y ras kat llalwillto' Xallo Diosen', lloe'to' yel llioxken ke'e ke yeololre. 3Na' kat llalwilltoe'n, lljasa'ra'llto' yeolol da wen na' dan' llonre, dan' llonlira'llre Diosen', na' dan' nllie're'. Na' lljasa'ra'llto' kan' zechichre bexhre dan' yed Xanllo Jesucriston' da yobre. 4Be'nn bi'che, nnézeto' nllie' Diosen' re', na' ba breje' re', nakre rallne'e. 5Na' Di'll Wen dan' bzejnie'to' re' ke Jesucriston', kere nnello naken to di'llzen'. Kone Spíritu ke Dios na'n gokrenen neto' bzejnie'to' re' ren yel wak ke'e na', le nnézeto' di'll dan' bzejnie'to' re'n naken da li. Nnézkzere kan' bento' da wen chak bzorento' re' nench gokrento' re'. 6Na' re' zore llonre da wen kan' ben neto', na' kan' ben Xanllo Jesucriston'. Bzenayre di'll be'rento' re' ke Le'e, na' Spíritu ke Diosen' llonen bzore nbaraz llzenayren, la'kze da zan da ba bxha'kzi're bzenayre ke'e. 7Na' dan' zore llontezre da wen na', ba bre'e be'nn yell ka' gan' nzi'i Macedonia ren be'nn lla'a gan' nzi'i Acaya kan' llonre na', na' ba nao aklle' llonlira'll ake' Criston'. 8Bxhi'zen gan' zore na', goslas xti'll Xanllo Jesucriston', na' kere be'nn lla'a Macedonia na' ren Acaya na'zen', gateze be'nn ake, ba nnez akre' kan' llonlira'llre Diosen', na'llen' bill yalljen we'to' di'll, akren' gon ake' wxenra'll ake' Le'e. 9Na' be'nn zan lloe' ake' di'll ka wen na' benrenre neto' kan' badwiato' re', na' lloe' ake' di'll kan' benre brej yichjre bill llonlira'llre lwa'a keré ka', na' ba llonlira'llre Dios dogarje be'nn zo ke chras. 10Na' lloe' ake' di'll zore bezre katen' yetj Xhi'nne' Jesúsen' yebán', yede' yellrion' da yobre, be'nnen' basbán Diosen' radj be'nn wat ka'. Na' dan' llonlira'll-llo Jesúsen', ba basre'e lli'o nench bi sa'kzi'llo kat llin lla.

will be added

X\