1 Pedro 3

1Leska' re' no're nchayna're, llaya'l wzenayre ke xhyiore, le bal ake' bi nna nnez akre' xti'll Diosen', na' cha' re' llzenayre, gakbe'e akre' xti'll Diosen' naken da wen, na' wxenra'll ake' Diosen', 2kate re'e akre' llap akre' bara'nne, na' nak ra'llda'oren' yall rao Dios. 3Na' kere tetere yezocha'ore, na' wapa' yichjraore, na' wlliarize kwinre ya cha'o nzi'i oro, na' gakre no ra'll cha'o. Bibi de gakrén dan' re', nench gak yichjra'llda'oren' yall. 4Dan' nak lliarao, gak ra'llda'ore wen. Na' za'kllen rao Dios gakre be'nn nexjra'lle, ke da ki bi te ke. 5Kana' blla'a no'r ak be'nn benlira'll Dios, na' ben kwin ake' rao ne'e. Leake'n gok ake' be'nn nexjra'lle, na' bzoa ake' xti'll xhyio ake'n, bi da goll ake' leake'. 6Kan' ben da Sara, no'r ke da xozxta'ollo Abraham, bzoe' xti'll xhyiwe'n, na' golle' le'e: “Xana'”. Na' re' cha' sotezre gonre da wen, na' bi llebre, na'll nne ake' nakre xhi'nn da Saran', le llonre kan' bene' na'. 7Leska' re' be'nn byio, leska' llaya'l gakre be'nn wen rao no'r keré, na' gap akre' bara'nne, le bi nak ake' be'nn war ka re' be'nn byio. Le yeololkzllon', nllie' Dios llonne' yel nban kello, kan' nonnkze' ke leake'. Na'llen' llaya'l gon akere' wen nench bibi wllon kat yelwillre Diosen'. 8Yeolol-llo llaya'l toz ka gakllo, na' llaya'l yeya'chra'll-llo cha' bi llak ke be'nn lwelljllo. Llaya'l llie'lloe' do ra'll-llo ka no be'nn bi'ch lwelljllo, na' llaya'l gakllo be'nn cha'o rao be'nn lwelljllo, na' bi gonllo xhen kwinllo. 9Cha' bi da xhinnj llone be'nne lli'o, bi wnnabllo yeyakte da xhinnj ke'e. Cha' no be'nn llchache' kello, bibi yelli'llo ke'en, yezillre nnabllo gak da wen ke ake', le ka'n ba bzoa Diosen' lli'o gonllo, nench gonnen latj sollo nbaraz. 10Ka'n gonllo, le nyojen nen: Be'nn lle'ne so kweze nbaraz, llaya'l wsa'ke' yel nne, na' bill we'e di'll xhinnj, na' bill we'e di'll wenra'lle. 11Llaya'l kwej yichje' da xhinnj ka', na' gone' da wen. Llaya'l kwe' yichje' gone' ga zerao sa'ke', nench sorén be'nn lwellje' wen. 12Le Xanllo Diosen' zoe' llwie' be'nn llon da li, na' llzenaye' kat llalwill ake' Le'e. Zan be'nn wen da xhinnj ka', ba nwia Diosen' gone' da sa'kzi' ake'. 13¿Noxha gak wkwa'nntont re', cha' zotezre llonre da wen do yichj do ra'llre? 14La'kze cha' bi da llsa'kzi' be'nne lli'o, dan' naollo da zej to li, nbaraz wzoa Diosen' lli'o. Na' bi llaya'l llebllo be'nn ka', na' bi gakgánello. 15Zan llaya'l wxenra'll-llo Criston' lo ra'llda'ollo, le nake' Xanllo. Na' batteze llaya'l sollo kwexhllo nench yelli'llo xti'll be'nne cha' nnabre' lli'o, bixchen zollo rez yellinllo gan' llia Diosen' ke chnare. Na' llaya'l gap aklloe' bara'nne, we'rén aklloe' di'll cha'o. 16Na' llaya'l gonllo nench nnézello lo ra'llda'ollo bibi do'l kello de rao Dios, na'llen' kat bi da nne ake' kello dan' nxenra'll-llo Criston', na' nnez akre' llonllo wen, na' waye'e akre'. 17Wenre sa'kzi'llo ni ke dan' llonllo da wen na', cha' ka'n lle'ne Diosen' gak kello, kerke da sa'kzi'llo llonllo da xhinnj. 18Le Criston' lekze bxha'kzie'. La'kze bnawe' da zej da li rao Dios, be'e latj gote' ni ke xto'l be'nnach chniaze, na' dan' bene' ka' za'ken ke chnare. Gote' nench bzoe' lli'o nbaraz rao Dios. Na' la'kze bet ake' Le'e, babankze' radj be'nn wat ka' rao Spíritu. 19Rao Spíritu ke'e na', byeje' jatixjwe're' xti'll Diosen' rao be'nn ka' zjalla'a ba neyj ake' gan' sa'kzi' ake' ke chnare. 20Leake'n bi bzenay ake' ke Diosen' kana', la'kze bdape' yel llxhenra'lle ke leake', breze' wzenay ake' kan' ben Noén' to barco xhen na'. Na' to chopgue' byo' loen', na' bi blleyi' ake', xo'n akze' byo' lo barcon' bará ake' lo nisen'. 21Na' dan' gok ka' llonen ka ke lli'o ll-lloa nis nna', le ba barallo rao da xhinnjen'. Na' kere blloallo nisen' nench bayakte kwerp kellon' yalle, zan bnnabllo bayone' yichjra'llda'ollon' yalle, nench nnézello bibi do'l kello de. Na' ba nak ra'llda'ollon' yalle nna', dan' babán Jesucriston' radj be'nn wat ka'. 22Na' nna' ba bayep Jesucriston' yebá gan' jallie' cha'we gan' llia Diosen', na' llxhexj yichj yeololte angl, na' yeololte no nap yel llnebia' llzenay ake' ke'e.

will be added

X\