1 Juan 5

1Cha' lli'o llejle'llo Jesucriston' nake' be'nne bse'l Dios, naksllo xhi'nn Dios. Na' cha' nllie'llo Xallo Diosen', ka'kzen' llaya'l llie' lwelljllo, le be'nn lwelljllon' xhi'nn Dioskzen'. 2Kate zollo nllie'llo Diosen', na' llonllo kan' ne di'll bia'a ke'e na', na'llen' nnézello leska' nllie'llo yezikre be'nn ka' nak xhi'nn Dios. 3Cha' nllie'llo Diosen', llonllo kan' ne di'll bia'a ke'e na'. Na' di'll bia'a ke'e na', bi naken da bni' gonllon. 4Yeolol be'nn ba nak xhi'nn Diosen', zoe akre' llkwas ake' da xhinnjen' de yellrion' ka'le. Na' dan' nxenra'll-llo Jesucristo na'n, zoello llkwasllo da xhinnjen' ka'le, na' bill llonllon. 5Nollre no llzoe wkwase da xhinnjen' de yellrio ni ka'le, le zeraoze be'nnen' llejle' ke Jesús be'nnen' nake' dogarj Xhi'nn Dios, leake'n llzoe akre' llkwas ake' da xhinnjen' ka'le. 6Kin' ben Jesucriston' chak bede' yellrio ni, blloe' nis na' brarj xchene'. Kere nello to nis na'zen' blloe', rente xchene' na'n brarjrene'. Ka'n ne Spíritu ke Diosen', le Spíritu na' lloe'n di'll li. 7Na' zjani't chonn be'nne llgo' da li yebán', lloe' ake' di'll ke Jesucriston': Xallo Diosen', ren be'nnen' nzi'i Xti'll Dios, na' ren Spíritu ke Dios na'. Na' be'nn chonn ki, tozen' nak akse'. 8Leska' chonn da llgo' da li rao yellrio ni ke Jesucriston': Spíritu ke Dios na', na' dan' gok kan' blloe' nis, na' dan' gok kan' brarj xchene' na'. Na' yonnte da ki goken toz ka lloe' ake'n di'lle. 9Le chet ka' llejle'llo xti'll be'nnachen', za'ktelle xti'll Diosen' si'llon, le Diosen' ba be'e di'll ke Xhi'nne' Jesucriston'. 10Na' cha' llejle'llo nak Jesucriston' Xhi'nn Dios, zokze xti'll Xanllo Diosen' lo ra'llda'ollo. Na' cha' lli'o bi llejle'llo ke Diosen', na' llonlloe' ka to be'nn wenra'lle dan' bi llejle'llo di'll dan' lloe' ke Xhi'nne' na'. 11Xti'll Dios na'n llzejnie' lli'o wa't yel nban zejlikane ke be'nnachen' cha' gonlira'll ake' Xhi'nne' Jesucriston'. 12Kin' naken cha' lli'o llonlira'll-llo Jesucriston', dekze yel nban zejlikane kello. Na' cha' bi llonlira'll-lloe', bibi yel nban zejlikane de kello. 13Llzoja' re' di'll ki, re' llejle're Jesucriston' nake' Xhi'nn Diosen', nench nnézere de yel nban zejlikane keré. 14Na' bi llebllo llalwill-llo Diosen', le nnézello zie' xti'll-llon' kate llnnabllo rawe'n da llazra'lle'. 15Na' kate nnézello zie' xti'll-llon' biteze da llnnábelloe', na' nnézello gonne' da ka' ba bnnabllo na'. 16Cha' llwiallo be'nn lwelljllo llone' da xhinnj da bi lljasán le'e rao yel got ke chnare, llaya'le nnabllo rao Diosen' gakrene' le'e nench yezoe' wen rao Diosen' da yobre, kon cha' naken da xhinnj da bi lljasán le'e rao yel got ke chnare. Le de yel got ga kweyie' ke chnare. Len bi naken zi nnia' nnabre gakrén Diosen' leake'. 17Cha' llonllo biteze da xhinnj napkzllo do'le, zan kere yeolol da xhinnjen' llonllo na'n wsa'n lli'o rao yel goten'. 18Nnézello cha' ba bacha'a Xallo Diosen' yichjra'llda'ollon', bill sollo gonllo da xhinnjen', le zo be'nnen' nake Xhi'nn Diosen', llkwase' lli'o rao daxi'on, ke len na' bi zoen wlleyi'n lli'on. 19Nnézello zerén Dios lli'o, na' be'nn ka' bi llzoa xti'lle'n, daxi'on llnebia'kzen leake'. 20Nnézello ba bed Xhi'nn Diosen', na' badzejnie're' lli'o nench bembia'llo Xe'en, be'nnen' nake dogarje Dios. Na' ni'tllo toze ren be'nnen' nake dogarje Dios, na' nakllo toze ren Xhi'nne' Jesucriston'. Le'en nake' dogarje Dios, na' llonne' yel nban zejlikane ke be'nne llonlira'll Le'e. 21Xhi'nna' da'o ak, lewiá ke wxenra'llrizre lwa'a lsa'k ka'. Ka'n gakchga.

will be added

X\