1 Juan 4

1Re' bi'cha' nllie'ra', bi chejle're cha' no be'nne nne ake' lloe' ake' di'll da goll Spíritu ke Dios leake'. Zga'tek lewiá cha' naken di'll da bzejnie' Dios o cha' bi naken ka'. Lewiá, le ba ll-llach be'nn zan be'nn ziye'e ne ake' lloe' ake' di'll da goll Diosen' leake'. 2Na' ki gak nnézello cha' da lin' bzejnie' Spíritu ke Diosen' leake' ka di'llen' lloe' ake'n: yeolol be'nne we'e di'll ne ake' Jesucriston' nake' be'nn bse'l Dios, na' gorje' radj be'nnach, nnézello yo' Spíritu ke Diosen' lo yichjra'llda'we' na'. 3Na' be'nn ka' lloe' di'll ne ake' Jesucriston' bi nake' be'nn bse'l Diosen', bibi Spíritu ke Dios yo' yichjra'llda'o be'nn ka'. Be'nnen' ne ka' lloe' di'll da ll-lliayi'll Criston'. Ba bénere yed da wie Criston'. Na' nna' ba bra'n ba llwieren Le'e. 4Xhi'nna' da'o ak, ba nakre Diosen' txhen, ba benre gan rao be'nn wenra'll ka', le Diosen' zorén re', naklle' be'nn yel wak kerke dan' zo ren be'nn ka' lla'a yellrion'. 5Be'nn ka' bi llzoa xti'll Diosen' lloe'rén ake' be'nn ak di'll ke da llak yellrio, na' llawé be'nn ka' lla'a rao yellrio ni, llzenay ake' ke ake'. 6Ka nak lli'o, ba nakllo Diosen' txhen, na'llen' yezikre be'nn nombia' Diosen', llzenay ake' di'll ka' lloe'rén aklloe'n, na' be'nn ka' bi nak be'nn ke Dios, bi llzenay ake' di'll kellon'. Na'llen' nnézello non' yo' Spíritu ke Diosen' llzejnie'n le'e di'll li, na' non' yo' spíritu da lloe' di'll wenra'll. 7Re' nakre be'nn nllie'ra', llaya'l nni'tllo llie' lwelljllo, le Dios na'n zokze llone' nench nllie' lwelljllo. Na' be'nnen' nllie' lwellje' nakbie' nake' xhi'nn Dios, na' nombie're' Diosen'. 8Be'nnen' bi nllie' lwellje' bi nnezre' kan' nak Diosen', le ba nnézello Diosen' nake' be'nn nllie'. 9Ka'n ben Diosen' broe're' kan' nllie're' lli'o, bse'le' Xhi'nne'n yellrio ni nench banllo ke chnare, cha' lli'o gonlira'll-lloe'. 10Ki nak yel nllie' dogarje: Bi nnello lli'on bllie'llo Diosen', Lere'n bllie're' lli'o, na'llen' bse'le' Xhi'nne' Jesucriston' nench brarje' xchene' ni ke lli'o llon da xhinnj nench bake'e xto'l-llon'. 11Re' be'nn nllie'ra', dan' nllie' Diosen' lli'o, leze ka'kzen' gon lli'o llie' lwelljllo. 12Ni to be'nne bi nna re're' Diosen'. Zan cha' lli'o nni'tllo llie' lwelljllo, nakbie' zorenkze Diosen' lli'o, na' nllie'lloe' kan' llaya'l llie'lloe' na'. 13Nnézello zerenllo Diosen', na' ka' zerén Le'en lli'o, dan' ba bse'le' Spíritu ke'en zon lo ra'llda'ollo na'. 14Na' neto' ba bre'to', na'llen' lloe'to' di'll nnézeto' bse'l Xallo Diosen' Xhi'nne'n nench yesre'e be'nnach rao da xhinnjen'. 15Na' cha' lli'o llejle'llo, na' lloe'llo di'll nello Jesucriston' nake' Xhi'nn Dios, Diosen' zerenkze' lli'o, leska' lli'o zerenllo Diosen'. 16Na' ka nak lli'o ba nnézello, na' llejle'llo nllie' Diosen' lli'o. Diosen' zokze' nllie're' be'nnach, le ka'n nak yichjra'llda'we'. Na' cha' zollo nllie' lwelljllo, na'llen' zerenllo Diosen', na' Le'e zerene' lli'o. 17Dios na' zokze' llakrene' lli'o nench llie' lwelljllo kan' llaya'l llie' lwelljllo na', ka'n llon Diosen' nench ke lleblloe' kate llin lla gone' yel koxchis ke yeolol be'nnach. Le lli'o lla'llo rao yellrio ni, nllie' lwelljllo kan' llon Jesucristo na'. 18Cha' nllie'llo Diosen' kan' llaya'le, bibi de llebllo. Yel nllie' dogarje llaka'n yel lleben' ka'le. Cha' llebllo, naksen da llsa'kzi' lli'o chet ka', na' cha' nna llebllo, llroe'n bi nna llie'llo Diosen' kan' llaya'l llie'lloe' na'. 19Lli'o nllie'llo Diosen', le zga'tek Le'en bllie're' lli'o. 20Na' cha' norllo nello: “Nada' nllie'ra' Dios”, na' llwie lwelljllo, da na'n naken da wenra'lle. ¿Akre gonllo llie'llo Diosen' be'nn bi llre'llo, cha' bi nllie' lwelljllo be'nn llre'tello? 21Na' ba bllie' bia'a kan' llaya'l gonllon': cha' nllie'llo Le'e, leska' llaya'l llie' lwelljllo.

will be added

X\