1 Juan 2

1Re' nakre ka xhi'nna' da'o ak, llzoja' re' di'll ki nench na' bibi da xhinnj gonre. Na' cha' no gon da xhinnjen', zokze Jesucristo be'nnen' llon dan' zej lilla, na' llnnabe' yezi'xhen Xallo Diosen' kello. 2Jesucriston' brarj xchene'n ni ke lli'o llon da xhinnj nench bake'e xto'l-llon', na' ker ke balzllon' brarj xchene'n, ke yeololkze be'nn lla'a yellrion' brarje'n. 3Na' cha' llonllo kan' ne Dios na', na'llen' wak nnello ba nombia'lloe'. 4Na' cha' nello ba nombia'lloe', na' bi llonllo kan' ne'e na', ziye'zllon' cha' ka', na' bi nna cho' di'll li ke'en lo yichjra'llda'ollo. 5Cha' llonllo kan' ne'e na', ba nllie'llo Diosen' kan' llaya'l llie'lloe'n. Na'llen' nnézello ba naklloe' txhen. 6Na' noteze lli'o cha' nello nakllo txhen Diosen', llaya'l sollo gonllo ka da wen na' ben Jesucristo na'. 7Re' be'nn nllie'ra', dan' llzoja' re' gonre ni, bi naken to da kobe. Naken to di'll da ba be'renkza' re' kan' bzoraore llonlira'llre Jesucristo na', le naken di'll dan' ba bénkzere. 8Zan dan' llepa' re' gonre na', naksen ka to da kobe, le ba broe' Criston' re' naken da za'ke, na' lekze re' llroe're naken da za'ke. Ba bzorao llde ke yeolol da ka' llwie Diosen'. Na' ba bzorao llre'llo da wen na' llon Diosen', naken ka to beni' da llseni'. 9Noteze la'kze cha' nnello dallo rao beni' ke Diosen', na' llwie lwelljllo, nna ncholkze lo yichjra'llda'ollon'. 10Noteze cha' nllie' lwelljllo, da li dallo rao beni' ke Diosen', billbi de da wlli'y lli'o rao da xhinnjen'. 11Na' cha' llwie lwelljllo, nchole lo ra'llda'ollon', kon to zejllo ka ga zeje to be'nne lchol, be'nn bi llre'e garen' cheje', le da xhinnj na' ba ncholen lo yichjra'llda'ollon'. 12Ganni llzoja' re' nakre ka xhi'nna' da'o, ka nak Dios na', ba bazi'xhenkze' keré dan' llonlira'llre Jesucriston'. 13Ba bzoja' da ki ke re' be'nn gore, le ba nombia're Jesucriston' be'nnen' ba zokze kan' bxhe yellriote. Ba bzoja' da ki ke re' be'nn we'o llaban, le ba bzoere bi ben daxi'o re' gan. Da yobre nia' re', ba bzoja' da ki ke re', nakre ka xhi'nna' da'o, le ba nombia're Xallo Diosen'. 14Ba bzoja' da ki ke re' be'nn gore, le ba nombia're Jesucristo be'nnen' ba zokze ka bxhe yellriote. Leska' ba bzoja' da ki ke re' bi we'o llaban, le ngo' yichjre xti'll Diosen', na'llen' ba bzoere bi ben daxi'on re' gan. 15Bi yewere da xhinnjen' de rao yellrion'. Cha' yewello da xhinnjen' de rao yellrion', zeje di'lle bi nllie'llo Xallo Diosen'. 16Le yeolol da xhinnj da de rao yellrion', ka nak yel zera'll da xhinnjen' lle'ne xpe'rllon', na' da xhinnj ka' zera'll yejraollon', na' yel llaljen', ker ka da ka'n lle'ne Xallo Diosen' gonllo. Da kin' naksen da xhinnj da de rao yellrio ni. 17Na' da te ke dan' de yellrio ni, na' dan' llzera'll be'nne bi llzenay ke Dios. Zan be'nnen' llon kon kan' ne Dios na', wbankze be'nnen' ke chnare. 18Re' nakre ka xhi'nna' da'o ak, ba rez llin lla yeyoll yellrio ni. Neto' ba bzéneto' re', wllin lla yed be'nn wlliayi'll Criston', le nna', be'nn zan ba za'k ll-lliayi'll ake' Criston'. Ke len na' ba llroe'n ba zo rez llin lla yeyoll yellrio ni. 19Radjllo nizen' blloj be'nn ka' blliayi'll Criston'. Le kere do ra'll ake'n benrén ake' lli'o txhen llonlira'll-llo Criston'. Le chenak do ra'll ake' ben ake' txhen, nna zo aklle' llonrén ake' lli'o txhen chenake. Na' dan' ba balloj ake' na', nakbie'kze bi nak ake' be'nn llon lli'o txhen. 20Zan ka nak re', Cristo na' ba benne' re' Spíritu ke Diosen', na'llen' yeolol-llo nnézello kan' ne di'll li ke Diosen'. 21Llzoja' re' da ni, le ba nombia're di'll li ke Diosen', kere nnello bi nna gombia'ren na', na' leska' nnézkzere ni to di'll wenra'll bi ren di'll li ke'en. 22¿Noxha be'nn nak be'nn wenra'lle? Be'nn wenra'llen' nak be'nnen' nne'e kere Diosen' bse'l Jesúsen', be'nnen' nak Cristo nench nnebie'. Be'nnen' ne ka' llwiere' Criston', na' llzoe' Xallo Diosen' chla're ren Xhi'nne' Cristo na'. 23Na' no be'nne lloe' di'llen' nne'e notno Jesucristo bse'l Diosen', le'en bi zerén Xallo Diosen' le'e. Na' be'nnen' lloe' di'll nne'e Dios na' bse'le' Jesucriston', zorenkze Xallo Diosen' le'e. 24Na' ka nak re', lesó lewzenay ka da ka' ba bzéneto' re', kan' bzoraore llonlira'llre Cristo na'te. Na' cha' wzoatezre di'll ke'en, na' ka' sorenkze Xallo Diosen' re' ren Xhi'nne' Cristo na'. 25Na' Jesucriston', dan' ba bne'e gonne' na', gonne' yel nban zejlikane kello. 26Ba bzoja' re' da ni, ba bia'a di'll ke be'nn ka' lle'ne siye'e re'. 27Jesucriston' ba benne' Spíritu ke Diosen' cho'n lo ra'llda'oren', wzejnie're'n re' yeolol dan' llaya'l chejnie're na'. Na' ka nak Spíritu ke Diosen' lloe'n di'll li, bi ziye'n. Na' dan' zorenen re' llzejnie're'n re', na' bill yálljere no wzejnie' re' bi da ka' nak da li. Ke len na' lewzenay dan' bzejnie' Spíritun' re', na' lesorenteze Jesucriston'. 28Na' nna' xhi'nna' da'o, llaya'l sotezllo wzoallo xti'll Criston' nench bi lleblloe' katen' yede' da yobre, na' bi si'llo zdo' katen' re'llo ba bre'en. 29Na' ba nnézello Xanllo Diosen' zeje' llone' kan' llaya'l gone'n, leska' llaya'l nnézello cha' zejllo llonllo kan' llaya'l gonllo na', naksllo xhi'nn Dios.

will be added

X\