1 Llyixjwe'to' re' ke be'nnen' nzi'i xti'll Dios, be'nnen' lloe' yel nban zejlikane ke be'nn llonlira'll Le'e. Ba zokze' kan' bxhe yellriote. Na' neto' Postl bzenayto' xti'lle'n, bre'toe' na' bdantoe'. 2 Le'en gorje' radj be'nnach na' bre'toe', na'llen' lloe'to' xti'lle'n. Llyixjwe'to' re', Le'en be'nnen' nsa'a yel nban zejlikane, zorenkze' Xallo Diosen', na' ba broe'rawe' neto'. 3 Llyixjwe'to' re' ke be'nnen' bre'to'n, na' be'nnen' bzenayto' ken', nench na' gonrenre neto' txhen. Le ka nak neto' ba nakto' toze ren Xallo Diosen', ren Xhi'nne' Jesucristo na'. 4 Na'llen' llzojto' re' le' yich ni, nench na' sore yewere. 5 Neto' bzenayto' ka be'e Xanllon' di'lle, na' llyixjwe'to' re', Diosen' nake' beni', na' bibi da xchol de rawe'. 6 Na' cha' nnello llonllo txhen Diosen', na' llonkzllo da xhinnje, bi lloe'llo di'll li. Na' dan' llonllon' bi zejen to li. 7 Ka nak Diosen' nake' ka beni', na' cha' lli'o dallo rao beni' ke'en, na'llen' nakllo toze, na' yichjra'llda'ollon' yega'nnen yalle, le Xhi'nne' Jesucriston' brarj xchene'n nench na' bake'e yeolol da xhinnj benllo. 8 Cha' nnello bitbi do'l kello de, ziye'e kwinllo, bi lloe'llo di'll li. 9 Zan cha' lli'o wxoarapllo rao Diosen', Le'e nake' be'nn li, be'nn cha'o, na' wazi'xhenkze' yeolol dan' llonllon', wnitrawe' yeolol da xhinnj kellon'. 10 Cha' nnello bitbi da xhinnj nonllo, llonllo Diosen' ka to be'nn wenra'lle, le bi llejle'llo di'll li ke'e na'.
