1 Corintios 9

1Nada' naka' postl na' wak nnaba' gónere nada' kan' llónere yezikre be'nn lloe'rén re'n xti'll Diosen'. Le nada' bre'ra' Xanllo Jesúsen', na' bena' xchine' gan' zoren', na' ke len na' llonlira'llre. 2Na' la'kze cha' bi llejle' yezikre be'nne naka' postl, re' ba llejle're naka' postl, le dan' llonlira'llre Xanllo na', llroe'n da likzen' Le'en bse'l nada'. 3Ki llallia' xti'll be'nn ka' llasné, kere Diosen' bse'l nada' naka' postl ke'en: 4Dekze latj kia' nnaba' da ye'j gawa'. 5Na' wakte wchayna'rena' to no're nxenra'll Criston' chenake, nench yechie' gan' lljena' xchin Dios na', kan' non Pedron' nchayne'e, na' kan' non postl ka' yela', na' kan' non be'nn bi'ch Xanllo na'. 6¿Na' llákere nada' ren Bernabén' bi gak wsanto' gonto' llin kone nia'na'to', ka llon no be'nn yobre? 7Gaga zo to be'nn waka'a ya cheje' rao wdile, na' chixhje' kwine' ke gaxt ke'e. Na' nono gaz yay uvas, na' bi gawe' uvas ka' kat kwian. Leska' gaga zo be'nne gape' xhi're, na' bi ye'jrize' ra't xhi'llba' katen' wsie'n na'. 8Na' kere xhbab kia' nadza'n dan' nia' ka', lekze ka'kzen' ne ley dan' bzoj da Moisésen'. 9Ki bzoje' le' leyen': “Bi wsejre lloa' bell kate llrejchekwba' trigon' nench lloj xhe.” Na' kere bne Diosen' ka' dan' llakzedre' bell ka'. 10Bne'e ka' nench llzejnie're' lli'o kan' llaya'l gonllo ren be'nn ka' llon xchin Diosen', ke len na' ne'e, be'nn llwa'nn bellen', na' be'nn lloncha'o trigon', llon ake' rez yezi'i ake' ra't weje dan' yerap ake' na'. 11Na' neto' nakto' ka to be'nn ba goz xti'll Diosen' radjre na'. ¿Bixha bi gak yezi'to' ra't ke to dan' ba benla'y Diosen' re'? 12Le cha' be'nn yobre ba be're leake' ra't ke to da benla'y Diosen' re', leska'kze neto' llaya'l gonnre neto' arke da ba benla'y Diosen' re'. Zan bi nna wchie'to' re' na'. Na' ba bento' banez biteze da gok keto' nench na' bitbi bllon kan' be'rento' re' Di'll Wen ke Criston'. 13Le nnézkzere be'nn ka' llon llin lo yoda'o ke Israelen', nbanrén ake' dan' lloe' be'nn Israel ka' ke yoda'on, le lljakwa'nn ake' ra't weje bayi'x ka', ban' llot ake' rao Diosen', na' llao be'nn ka' llon llin lo yoda'o na' leakba'. 14Ka'kzen' nllia Xanllon' bia'a gonllo, be'nn llzenay xti'lle'n llaya'l we'e ake' bi da yallje be'nnen' lloe'rén leake' xti'll Jesucristo na'. 15Zan nada' bi nna nnabra' re' gonnre da yalljra', na' kere llzoja' da ni ke len na'. Wenjere gata' ker ka da nnabra' re' gonnre dan' yalljra', le nada' llawera' kwis bibi gan llona' dan' llyixjwe'ra' xti'll Criston'. 16Bi nnia' okrén' llona' llyixjwe'ra' Di'll Wen ke Jesucriston', le naken da llaya'l gona'. ¡Nya'chraz naken kia' cha' nada' bi chixjwe'ra'n! 17Ke len na' cha' lloe'rena' re' xti'll Diosen', ni ke dan' gorjen lo yichjra'llda'wa', dekze raxhja' chenake; zan llona'n le Le'en ba broe'n rallna' chixjwe'ra'n re', na' zeje di'llen' ba llonza' ke da ba bro' Diosen' lo na' gona'n. 18Na' cha' nnábere nada' bixha llkwa'nnen kia' dan' llyixjwe'ra' xti'll Diosen', na'll nnia' llkwa'nnen da llawera', le bitbi raxhja' zia' llyixjwe'ra' xti'lle'n, la'kze nakten da si'i raxhja' chenake. 19La'kze bi naka' ka to be'nn wen llin ke be'nne, llxhexj yichja' llon kwina' ka to be'nn wen llin ke yeololte be'nne nench chan be'nn ak gonlira'll ake' Cristo na'. 20Na' kan' zoa' gan' lla'a be'nn Israel ka', benteza' kan' llon ake' na'. Na' bena' kan' ne ley dan' bzoj da Moisés na' (la'kze nnezra' bibi de llon leyen') nench na' wzenay ake' kat we'rén ake' xti'll Diosen'. 21Na' kan' zoa' gan' zjalla'a be'nn ka' bi nombia' ley dan' bzoj da Moisésen', benteza' kan' llon ake' na', le lle'nra' wzenay be'nn ka' bi nombia' ley na'. Na' bi nnello bkwasa' ka'le kan' ne Diosen', le zoa' llona' kan' ne ley ke Cristo na'. 22Na' kat zoa' gan' zjalla'a be'nn ka' bi nna chejle' doxhen kan' nak ke Criston', llona' kan' llon leake' na', nench na' wzenay ake' kia'. Ka'n llona' nench gak wzejnie' akllre'. Llon kwina' rebze ka yeolol be'nne nench gakrén ake', na' cha' bal ake' wxenra'll ake' Criston'. 23Llona' yeolol da ki nench wak we'rén ake' xti'll Criston' nench na' wak sorena' nbaraz ren yezikre be'nne llzenay xti'll Criston'. 24Ba nnézkzere kate llxhonnj txhonnj be'nne nench si'i ake' to da gon ake' gan, yeolole' za'do res, la'kze cha' toze'n gon gan, na' sie' da gone' gan na'. Ka'n gonre re' zore llonre xchin Diosen' do yichj do ra'llre, nench wzoe' re' nbaraz kat yellinre gan' llie' na'. 25Be'nn witj ka' llon ake' banez bi llon ake' ka lle'ne kwerp ke ake'n, nench llak ake' be'nn war, le lle'n akre' gon ake' gan katen' chitj ake'n, nench si'i ake' dan' gon ake' gan na', la'kze nak dan' si'i ake'n da te ke. Na' lli'o llzenay ke Diosen' si'llo to da wenll da bi te ke. 26Ke len na' bi gona' nada' ka to be'nn llxhonnje kon to llxhonnje', na' bi nnezre' ga yelline', o ka to be'nne dil kon ba dile', na' ni ke nnezzre' gan' kwa'lle'. 27Bi llzenaya' ke da xhinnjen' kate nen gona' da xhinnj ren kwerp kia'n. Zan llona' kon ga zerao zoera' nench yeyazra'll Diosen', nench ke wnita' latjen' ba bena' gan ke nak ba bdixjwe'ra' xti'll Diosen'.

will be added

X\