1 Corintios 8

1Akre llaya'l gonllo ke yel wao ka' ll-llia ake' rao lwa'a ka'. Nnézello yeolol-llo llejnie'llo akren' llaya'l gonllo. Zan yel llejnie' kellon', kon llonen llonxhen kwinllo. Zan katen' nllie' lwelljllon', llayirjla'll-llo akre gonllo nench gakrenllo lwelljllon'. 2Na' cha' llákello ba byejnie'llo kwasro doxhen kan' naken na', llaya'l yeyakbe'llo bi nna llinllo ka to llaya'l chejnie'llo. 3Zan cha' nllie'llo Diosen', Diosen' nombie' lli'o. 4Na' ka nak yel wao dan' ll-llia ake' rao lwa'a ka', nnézello lwa'a ka' bibi za'k aken rao yellrio ni, le toze Diosen' nak. 5Da li zjani't da zan da llasné be'nnach nak dios ke ake', ka da de yebá, na' da de yellrio ni, na' llonlira'll ake'n ne ake' len na' nak dios ke ake'. 6Zan ka nak lli'o nnézello toze Xallo Diosen', na' toze Xanllo Jesucriston' za'ken wxenra'll aklloe', le Leake'n bzo ake' lli'o rao yellrio ni, na' ben ake' yeololte da zjadé yellrio. 7Kere yeolol be'nne llejnie' akre' da ki. Bal ake' yo'rao ake' llak akre' be'nn za'k lwa'a ka', na' kat llasa'o ake' yel wao, da ka' bllia ake' rao lwa'a ka', na' llak akre' da nak ke lwa'n llao ake'. Ke len na' lo yichjra'llda'o ake', bi zo ake' wen llakgan akre', le bi nna chejnie' akre' akren' naken na'. 8Ka nak yel waon' bibi de gonen nench yewé Diosen' lli'o, na' ni ke ll-llonzen yewé Diosen' lli'o cha' gaollon o cha' bi gaollon. 9Na' bal be'nne bi nna chejnie' akre', kere bi gon dan' rao Dios cha' bi da ye'j gaollo. Ni ke leake'n llaya'l wiallo kan' gonllon', nench na' bi yexj ake' rao da xhinnjen', ni ke dan' ye'j gaollo na'. 10Re' nnézere kwasro kan' naken na'. Na' cha' to be'nne bi nna chejnie're', re're' kan' llonre llaorenre da ka', na' gakre' wakse gone' kan' llonren'. 11Na' dan' nnello llejnie'llon', wakte wlleyi'llo to be'nn lwelljllo be'nn nna llakgane, la'kze cha' bzane kwin Criston' gote' ni ke le'e. 12Na' kat dan' llonllo na', llonen nench llzorao gatra'll lo yichjra'llda'o to be'nn za bxenra'lle, Cristo na'kzen' llonllo da xhinnj ke'e, cha' ka' llonllo. 13Ke len na' nia', cha' dan' llawa' be'ren', llonen nench wlli'yen be'nn lwellja'n yexje' rao da xhinnj, kbatlle gawa'n nench ke yexje' rao da xhinnjen'.

will be added

X\