1 Corintios 7

1Ni wallia' kerén' dan' llnnabre le' yich dan' bzojre nada'n, ni nia' re' cha' to be'nn byio bi lle'nre' sie' no're, da wenkzen' llone' chet ka'. 2Zan dan' zjalla'a be'nn darén ake' no're bi nak no'r ke ake', na' llon ake' billre da nak yel zdo', ke len na' wenre wchayna'a ake', toto be'nn byio so xho're', na' toto no're so xhyiwe'. 3Na' be'nn nak xhyio no'ren' llaya'l wzoe' di'll nonrene' xho're'n, leska' no'ren' llaya'l wzoe' di'll nonrene' xhyiwe'n. 4Le no'r na' bi gak nne'e to wrazze'n llnebie' kwerp ke'en, le renkze xhyiwe' na' llnebie' len. Na' leska' xhyiwe'n bi gak nne'e to wrazze'n llnebie' kwerp ke'en, renkze no'r ke'e na', llnebia'rene' rao kwerp ke xhyiwe'n. 5Kan' naken ke re' nchayna're, bi wllone lwelljre, zan cha' naken xti'll lloptere, wakse wsanre to chi'i cha' lle'nere yelwillre Diosen'. Te na' yezorén lwelljre da yobre, nench ke cha' bi zoere dan' la'a ke kerén', wko'yele daxi'on re' gonre da xhinnj. 6Yeolol da ki ba bnia' kan' llona' xhbab dan' lle'nra' gakrena' re', na' kere nnello Dios na'n nllie' bia'a gonre kan' ba bnia' na'. 7Llawera' cha' yeololre so kan' zoa' nada'. Zan nnezra' nlla'a nlla'a yel waken' ba benn Diosen' totollo cha' bi da gonllo. 8Na' re' bi byio bi nna wchayna'a nna zo tozre, llakra' wenkzen' bi wchayna're, leska' re' no're ba got xhyiore, wenre chet ka' bi wachayna're, na' sore kan' zoa' nada'. 9Zan chet ka' bi gak sore tozre, wenre wchayna're chet ka', nench ke soteze so da xhinnjen' nnebia'n re'. 10Na' re' no're nchayna're, llepa' re' bi yera're be'nn kerén'. Na' kere da nia' nadza'n, Xanllo na'n nllia bia'a kan' llaya'l gonllon'. 11Na' cha' to no're yera'rene' be'nn ke'en, llaya'l so toze', bi yezie' be'nn yobre o cha' wazi'xhene' ke xhyiwe'n, na' wayeje' lljazorene' le'e. Na' leska' re' be'nn byio re' nchayna'a, bi yera' ren no'r kerén'. 12Na' nia' re' ren yezikre be'nne, ka nak xhbab llona', la'kze cha' Xanllon' bibi bne'e ke da ki. Cha' to be'nne nxenra'lle Xanllo zorene' to no're bi nxenra'lle Criston', na' llazra'lle' sorene' le'e, bi llaya'l yera'rene' le'e. 13Na' cha' no're zorene' to be'nn byio bi nxenra'll Cristo, na' llazra'lle' sorene' le'e, bi llaya'l yera'rene' le'e. 14Bi naken xhia rao Dios sorenre be'nn byio bi nxenra'lle o no'r bi nxenra'll Criston', le Dios na' kwe' yichjkze' lloptere dan' nxenra'll tore Le'e. Le chenak bi naken ka', xhi'nnre ka' nak akbe' ka xhi'nn be'nn bi nxenra'll Dios, zan bi naken ka', le renkze leakbe'n kwe' yichj Diosen'. 15Zan cha' be'nn keré o no'r keré bi nxenra'll Criston' lle'nre' wara'rene' re', ni ke dan' nxenra'llre Xanllo na', lewe'e latj le Diosen' bayaxhe' lli'o nench sollo nbaraz. 16Ka'n llaya'l gonllo. Le ¿akxha llak nnezro' rwe' no're, cha' Diosen' wasre'e xhyi'on? Na' ¿akxha llak nnezro' rwe', be'nn byio, cha' Diosen' wasre'e no'r ko'on? 17Totollo llaya'l sollo gonllo dan' non Xanllo Diosen' rallna'llo gonllo kan' breje' lli'o nakllo rallne'e. Ka'n llepa' be'nne gon ake' gateze lldop ll-llay ake' llonlira'll ake' Criston'. 18Cha' ba zore sen dan' nzi'i circuncisión kan' brej Diosen' re' nakre rallne'e, bi gonre nench yenit sen na'. Na' cha' bi nna sore sen na' kan' brej Diosen' re', bi nnabre wzoa ake' re' sen na'. 19Bitbi gonen rao Dios, cha' nsa'llo sen ke circuncisión na', o cha' bi nsa'llon. Da naken lliarao, llaya'l gonllo dan' ba nllia Diosen' bia'a gonllo. 20Ka'tezen' nakllo kan' brej Diosen' lli'o nakllo rallne'e, ka'tezen' gakllo so kwezllo. 21Cha' nda'ore nench nakre be'nn wen llin ke be'nne, bitbi gákere kan' nak kerén'. Zan cha' de latj chixhjre, na' yellojre rao na'a xanren', lechixhjen nench yellojre. 22La'kze cha' gokre be'nn wen xchin be'nne, ka to be'nn nda'o kan' brej Criston' re', nna' ba zere rao Xanllon' ka to be'nn bill nda'o. Na' lli'o bi gokllo wen llin ke be'nne ka to be'nn nda'o, Cristo na'n ba nak Xanllo nna', na' nnello wen llin ke Le'en nakllo. 23Da xhen be'e Diosen' kan' bse'le' Xhi'nne' ti'chen' nench bake'e lli'o rao na'a da xhinnjen'. Ke len na' bi llaya'l we'llo latj no be'nn yobre gonre' lli'o ka to be'nn wen llin, be'nn na'we'. 24Ka'n naken be'nn bi'che, da yobre nia' re', ka'tezen' nakllo brej Diosen' lli'o nakllo rallne'e, ka'tezen' so kwezllo. 25Na' kan' llaya'l gon no'r ka' bi nna wchayna'a; Xanllo Criston' bibi bllie' bia'a kan' gak ke ake'n, zan nada' nnia' kan' llakra' gon ake' na'. Le ba baya'chra'll Xanllon' nada', ke len na' za'ksen wzenayre di'llen' lloe'rena' re'. 26Le ba za'a da yellayraollo nna', ke len na' llakra' wenll so kwezllo kan' ba zokzllo nna'. 27Re' nchayna'a, bi yera'rén xho'r-re, na' re' bi nna wchayna'a bi we'la'lltekre wchayna're. 28Bi naken da xhinnj cha' wchayna're, leska' bi naken da xhinnj cha' wchayna'a to no'r we'o. Zan be'nn ka' wchayna'n da zan da zed so ake' yellrio, len na' lle'nra' bi gak keré ka'. 29Be'nn bi'che, lle'nra' yepa' re' da ki: Ye chollze de latj gonllo dan' nwia Diosen' gonllo. Ke len na' re' zo xho'r-re llaya'l sore gonre xchin Diosen', ka be'nn nono xho're' zo. 30Na' re' zo ya'che, llaya'l sore gonre xchin Diosen' ka be'nn bi zo ya'ch. Na' cha' zore nbaraz, llaya'l sore gonre xchin Diosen' ka be'nn bi zo nbaraz. Na' cha' bi da si're, llaya'l sore gonre ka be'nn bibi bxhi'i. 31Na' cha' bi da de llonrenre llin yellrio ni, bi kwe' yichjre len, le da te ke yeolol da de yellrio ni. 32Na' lle'nra' bi kwe' yichjre da ka' llak yellrio ni. Be'nne nono no'r zorene', na' nlatje' llbek yichje' llone' xchin Xanllo Diosen', na' zoe' llone' da llayazra'll Xanllon'. 33Zan be'nnen' nchayna'a, lli' yichj be'nnen' da llak rao yellrio ni, le llone' xhbab akre wayazra'll xho're' na'. 34Leska' bi llonen rebe ka nak ke no'ren' nchayna'n, na' ke no'r da'o bi nna wchayna'a. Le no'ren' bi nchayna'a nbek yichje' da nak ke Dios, na' zotekze' nench llone' xchin Diosen'. Zan ke nak no'ren' nchayna'a, lli' yichj be'nnen' da de rao yellrio nga, na' llone' da llayazra'll xhyiwe' na'. 35Da ni llepa' re' nench gakrena' re', kere nench ll-llona' wchayna'ren'. Llepa' re' ka' nench na' so kwezre nbaraz gonre xchin Diosen' do yichj do ra'llre. 36Cha' to be'nne llakre' llaya'l we'e latj wchayna'a xhi'nne' no'ren', dan' ba llde yel we'o kebe'n, na' ba lle'nebe' wchayna'be', naksen wen gone' kan' ba bene' xhbaben', na' we'e latj wchayna'a xhi'nne'n. 37Na' cha' zo be'nne llakre' wenre nono wchayna'rene', na' nnezre' wzoekzre' soe' toze', naksen wen kan' lle'nre' gone'n. 38Ka'n naken, be'nnen' lloe' xhi'nne'n llchayna'be' llonkze' wen, na' be'nnen' bi lloe' xhi'nne'n llonlle' wen. 39Na' noteze no'r nchayna'a, llaya'l sorene' be'nn ke'en, zan cha' ba got be'nn ke'en, wakse yezie' be'nn yobre, kon be'nn nxenra'll Xanllo Cristo na'. 40Na' nada' llakra' wzolle' nbaraz cha' yega'nne' bi wachayne'e. Na' llakra' xhbab kia'n naken rebze ren Spíritu ke Diosen'.

will be added

X\