1 Corintios 6

1Llabanra' keré kan' llonren' dan' llao xhia ke lwelljre, na' llejre lljawiare be'nn ka' bi nxenra'll Dios nench gon ake' yel koxchis kerén'. Re' ba brej Diosen' nak rallne'e, llaya'l nnabe lwelljre, nench leake' gon yel koxchis kerén'. 2¿Bi nnézere llin lla kate lli'o nak rallna'a Diosen', gonllo yel koxchis ke yezikre be'nn lla'a yellrio ni? Na' cha' ba llonllo yel koxchis ke ake'n, na' wakse gonllo yel koxchis ke bi da da'o bibi za'kteke. 3¿Bi nnézere wllin lla kat gonllo yel koxchis ke angl ka'? ¿Na' bi za'kchkello gonllo yel koxchis ke be'nn lwelljllo ka' lla'a yellrio ni? 4Na' kat de da gaore xhia ke lwelljre, bi chejre rao be'nn ka' bi llonlira'll Criston' gon ake' yel koxchis kerén', le be'nn ka' bibi latj ke ake' de radj be'nn ka' ba nxenra'll Criston'. 5Nia' ka' nench waye're dan' llonre na', nench bill gonre ka'. ¿Ni tore bi llejnie're gonre yel koxchis ke lwelljre kat bi da llak keré? 6¿Ke len na' lljataore xhia ke lwelljre rao koxchis, be'nn ka' bi nak txhen Cristo? 7Dan' llakyollrén lwelljre na'zen', llroe'n kreren' ba llonre. Wzollre nbaraz chenak llkwasre ka'le cha' bi llone be'nn lwelljre re'. Wenre gaora'llre, na' we're latj wka'a ake' bi da de keré. 8Na' re' llka're bi da de ke lwelljre, na' da zan da llone lwelljre. 9¿Bi nnézkzere be'nn ka' nak be'nn wen da xhinnj rao Diosen', bi yellín ake' gan' llia Diosen'? Bi we're latje no siye'e re', le zjani't be'nn zorén lwellj ake', na' bi nchayna'a ake'. Ni't be'nn llon ake' xhen lwa'a lsa'k ka', na' be'nn lljatil xho'r xhyio be'nn yobre, na' be'nn bxhej ak. 10Na' zjani't be'nn llban, na' be'nn zera'll bi de ke be'nne, be'nn wazó, na' be'nn nnechach ke be'nne, be'nn ziye'e be'nn, nench kwane' da de ke'e. Ni to be'nn ki bi yellín ake' yebá gan' llia Diosen' llnebie'. 11Balre ba benkzre ka da ki, zan nna' dan' ba nxenra'llre Xanllo Jesús na', ba bayib Spíritu ke Diosen' re', na' ba bayallre, na' ba bayonen re' rallna'a Dios nench nakre be'nn wen rawe'n. 12Ne ake': “Wakse gonllo kon biteze da lle'nello gonllo.” Zan kere yeolol dan' yo' rao na'llo gonllo na'n nak wen. La'kze cha' de latj gonllo biteze, bi we'llo latje nnebia'n lli'o. 13Na' leska' ne ake': “Lo le'llon' naken ke yel wao na', le yel wao dan' llaollon' llinten lo le'llo.” Na' llepa' re', lo le'llon' ren yel wao na', llopten llin lla te ke aken. Na' kwerp kellon' bi naken da tarenllo no xtollo, na' gonllo billre da xhinnj, zan naken da gonrenllo da wen rao Xanllo Jesucristo na'. Na' Xanllo Jesucristo na'kzen' llakrene' gak wen ke kwerp kello na'. 14Diosen' basbane' Xanllo Jesucriston' radj be'nn wat ka', na' lekze wllin lla yesbane' lli'o kone yel wak ke'e na'. 15¿Bi nnézkzere txhen na' nakllo Criston', na' kwerp kello na' naksen ke'e? Na' bi llaya'l gonllo kwerp kellon' dan' nak ke Criston', rao na'a no no'r re'e ak. 16¿Bixha bi nnézeren' cha' re' zjatilre to no'r re'e, kwerp keré na' llaken toze ren kwerp ke'e na'? Le ka'n nyoj xti'll Diosen' nen: “Be'nn ka' llopte' gak ake' toze kwerp.” 17Zan cha' lli'o gakllo toze kone Xanllo Jesucristo na', spíritu kello na' gaken toze kone Spíritu ke'e na'. 18Ke len na' bi llaya'l gonllo ka da xhinnj ka' llon be'nn byio, na' no'r bi nchayna'rén lwellje. Le billre da xhinnj bi wlleyi'teken kwerp ke'en, zan be'nnen' llzoa no xto, wlleyi'te kwerp ke'en cha' ka' llone'. 19¿Bi nnézere Spíritu ke Dios na'n zo lo yichjra'llda'o totollo ka zo to be'nn rille'? Le Dios na'n ba bse'le' Spíritu ke'en, zon lo ra'llda'o lli'o nxenra'll Cristo na', ke len na' bi gak gonllo kon bi da nen kello, le kere lli'o llnebia' kwinllo. 20Da za'k xhen na' bdixhj Diosen' ka nak bse'le' Xhi'nne'n badsre'e lli'o. Ke len na' llaya'l gapllo Diosen' bara'nne lo yichjra'llda'ollo ren kwerp kello na'.

will be added

X\