1 Corintios 4

1Llaya'l gakbe're neto'n ba be'rento' re' xti'll Diosen', nakto' be'nn wen xchin Cristo. Le'en ba bkwa'nne' rallna'to' wzejnie'to' be'nne da nono bnneze kana'. 2Na' llaya'l be'nn ka' llon xchine' gak ake' be'nn li, dan' bkwa'nne' rao na'a ake' gon ake'n. 3Na' ka nak nada' bibi de da wlliayi'llre nada'; ni koxchis ke yellrio ni, bibi de da wlliayi'll ake' nada', na' ni nada' kwina' bibi de wlliayi'll kwina'. 4Le lo ra'llda'wa' na', nnezra' bibi do'l kia' de, na' kere kone len na' nia' bibi do'l kia' de. Xanllo Jesucristo na'n nne cha' llona' kan' llaya'l gona' na' o cha' bi llona'n. 5Ke len na' bi llaya'l kwiaraore wlliayi'llre no be'nne. Le katen' yed Criston', kana'n nnézello da nono nneze nna', kana'n gakbe'llo kan' nak da yo' lo ra'llda'o be'nnach. Kana'n wroe' Diosen' noxhan' llon da wen na'. 6Be'nn bi'che, ba be'rena' re' di'll ke Apolos na', na' xti'lla' nada', kan' bzejnie'ra' re', nench na' sore gonre ka nne xti'll Dios na', le nllie'to' re', nench na' bi gakre be'nn ya'ra'lle, na' soraore gonre kaze lwelljre. 7¿Bixchen llákzere llonllre ye ra't ka nollre be'nne? ¿Bixha napre da bi nna gonn Diosen' re'? Rencha' Dios na'n ba benne' yeolol dan' llak llonren', ke len na' bi llaya'l gakre be'nn ya'ra'lle. 8Llákjere billbi yálljere, llákjere ba nakre be'nn za'k kwis rao Diosen', na' wak nnebia'tezre be'nne, na' llákere bill yálljere neto'. Yewejeto' chenak ba nakre ka to be'nn wnebia' kan' llákere na', na' rente neto' soto' nnebia'rento' re' txhen chenake. 9Neto' nakto' postl, llakra' Diosen' ba bene' neto' ka to be'nn le zerawe bibi za'ke, ka be'nn ba nlloy ke ake' gat ake'. Na' be'nnachen' lla'a yellrio ni, ren angl lla'a yebá, llwia ake' kan' llak keto'n. 10Na' dan' llonto' xchin Criston', be'nn zan llre'e akre' neto' ka be'nn bi llejnie'. Na' re', llre'e akre' re' ka be'nn llejnie' dan' ba llonlira'llre Cristo na', na' neto' llak akre' bibi zoeto' gonto'. Na' llak akre' re'n wak gonre yeololte. Llon ake' re' xhen, na' neto' llwie akre' neto' kwis. 11Llinte nna' lldeto' win, llbil lldonto', bi de xhara'nto', llakdilrén be'nne neto', na' bi zo rillto'. 12Le lljaxa'keto', le kone nia'na'to'n llonto' llin. Kate lla'dyi' no be'nne neto', yezi'llre llnnabto' rao Dios so ake' wen, na' kat llsa'kzi' ake' neto', llaora'llzto' bibi llon aketoe'. 13Kat llasnnechach ake' keto', llalwillto' Diosen' gak wen ke ake'. Na' nna' nna lla'kze be'nn llon ake' neto' ka to no beb da'o, na' ka to da zban da ba bllo'nnra'll be'nne. 14Kere llzoja' da ni nench yeye'ren', llzoja'n nench wzejnie'ra' re', le nakre ka xhi'nna' nllie'ra'. 15Na' la'kze be'nn zan gakra'll wroe' wsed akre' re' ke Criston', bi cha'a zane' gak ake' ka xare. Zan nada' ka xaren' naka', le nada'n blliarawa' be'rena' re' Di'll Wen ke Xanllo Jesucriston'. 16Ke len na' lla'tyoera' re' nench nnaore gonre ka dan' llsedra' re'n. 17Ke len na' llse'la' Timoteon' gan' zore na'. Ba none' ka xhi'nna', le nake' be'nn li nxenra'lle' Xanllo Jesucriston'. Na' llse'le' nench lljasa'ra'lle' re' kan' zo beza' dan' naka' Criston' txhen, na' kan' llzejnie'ra' be'nn gateze, rente ga lldop ll-llay be'nn llonlira'll Cristo na'. 18Na' balre ba llakre be'nn ya'ra'll, llákere cha' bill yeda' gan' zore na'n. 19Zan le yedtia' cha' Dios na' gonnchgue' latje. Na' kat yeda' na', kana' yedwia' be'nn ya'ra'll ka', cha' zorén yel wak ke Diosen' leake' o cha' kon ke ne akze'n. 20Le kate Diosen' nnebie' yichjra'llda'o be'nne, yel wak ke'e na'n wroe', kere xti'll ake' na'zen' wroe' cha' llnebie' yichjra'llda'o ake'n. 21¿Akxhan' lle'nere gona'? ¿Yedtina' re' xhis, cha' yedyakrena' re' le nllie'ra' re'n?

will be added

X\