1 Corintios 3

1Be'nn bi'che, bi gok we'rena' re' xti'll Diosen' kan' lloe'rena'n be'nn ka' llzenay ke Spíritu ke Diosen', na' be'rena' re' di'll ka lloe'rena' kon to be'nn dá rao yellrio ni di'lle. Ke len na' be'rena' re' di'll, ka llona' lloe'rena' di'll no bida'o. 2Kan' bzorao be'rena' re' xti'll Diosen' bllinte nna' lla, bi nna chejnie're da ka' lle'ne Diosen' chejnie're. Nakre ka to bida'o nna lla'll, na' bi nna gak gaore da nak war. 3Llzenayre da llarjla'llzre. Na' llwie lwelljre dilre, na' llchachre, nakbie'tekze llzenayre ke xhbab kezren', kan' llon be'nn ka' bi nxenra'll Cristo na'. 4Nia' llonre ka be'nn llzenay da llarjla'llzre, le balre nere: “Dan' llroe' llsede Pablo na', nakto' txhen”, na' ye balre nere: “Dan' llroe' llsede Apolos na', nakto' txhen.” 5¿Noxha naka' nada' Pablo? Na' ¿noxha nak Apolos na'? Kon nakzto' be'nn wen xchin Diosen'. Na' gokrento' re' nench byejle're ke Xanllo na', kan' be'rento' re' xti'lle'n. Le Le'en breje' toto neto' gonto' dan' zera'lle' na'. 6Nada' naka' ka to be'nn goz, dan' be'rena' re' xti'll Dios da nelle. Apolos na' nake' ka be'nn llyire dan' goza'n, le le'en broe' bsedllre' re' ye ra'te. Na' toze Dios na'n llone' nench ll-lli'o dan' gozto' na'. 7Bibi za'ktek be'nnen' llaz na', ni be'nnen' llyir len na'. Dios na'kzen' za'kll dan' llone' nench ll-lli'o dan' llaz ake' na'. 8Be'nnen' llon ka be'nn llaz, na' be'nnen' llon ka be'nn llyir, llon ake' xchin Diosen' txhen. Na' Diosen' wayoe' totoe' kon kan' ben ake' xchine' na'. 9Neto' nakto' Diosen' txhen, na' llzejnie'to' re' xti'lle'n, na' re' nakre ka yellrio gan' llonto' llin na'. Na' re' lldop ll-llayre llonlira'llre Criston', leska' nakre ka to yo' da llon Dios. 10Na' nnello nada' naka' be'nn wen yo' na', le nada'n bxia' ranen', le Dios na'n gokrén nada' bxia' xchine'n gan' zore na'. Na' nna' zjani't be'nn yobre llzejnie' akre' re', na' nnello leake'n llbek ze'e na'. Na' noteze be'nn llake llon ake' xchin Diosen', llaya'l gon akya'nne' xhbab cha' nao ake' llon ake' kan' lle'ne Dios na'. 11Na' nollre no gak kwek ye to ran yo'n roraze dan' ba brek Diosen', len na' nnello Jesucristo na'n, Le'en nak ka ran yo' na'. 12Llin da llonllo ke Criston', llonen ka ke to be'nn ll-lep to ze'e rao ran yo'. Wak gone'n de ya cha'o dan' nzi'i oro, o de ya cha'o dan' nzi'i plat, o de yej cha'o, o de yay, o de yixh, o de dod. 13Na' llan' yed Cristo na'n wroe'n bi da ben totollo, cha' benllo da za'ke o cha' bi za'ken. Na' cha' benllo da bi za'ke, Dios na' yenitrawe'n kone yi' ke'e na', na' wroe'n akren' ben totollo. 14Na' cha' benllo da wen, len na' bi nniten rao Diosen', na' Le'en wayonne' kello kon ka dan' benllo na'. 15Na' cha' dan' benllo na', bi naken da wen, cheyen, na' wnitllo dan' benllo na', la'kze warallo, na' gonllo ka to be'nn llalloj lo yi'. 16¿Bi nnézere lli'o nakllo ka to yoda'o ke Dios, na' Spíritu ke Diosen' zorenen lli'o txhen lo yichjra'llda'ollo? 17Na' cha' no wlleyi' yoda'o ke Diosen', Dios na'kzen' wlleyi' le'e, le yoda'o ke Diosen' nak la'yen', na' re' nakre ka yoda'o ke'e. 18Bi siye'e kwinre gákere nakre be'nn si'n rao yellrio ni, yel si'n ke yellrion' bi gakrenen re' rao Dios. Llaya'l gonre ka be'nn bi llejnie', nench na' gonn Diosen' re' yel si'n ke'e na'. 19Be'nn ka' bi llonlira'll Diosen', bibi za'k yel si'n ke ake'n rao Dios. Le nyoj xti'll Diosen' nen: “Be'nn ka' llake nak ake' be'nn si'n, Dios na' gonchixre' dan' ne ake' llejnie' akre' na'.” 20Na' ye to gan' nyojen nen: “Xanllo na'n nnezre' bibi za'k dan' llon be'nn si'n ka' xhbab.” 21Ke len na' bi llaya'l gonre xhen da llroe' llsede be'nnach, le yeolol bi da yo' rao na'ren', yo'n nench gakrenen re'. 22Nada' ren Apolos, na' ren Cefas na', yo'to' rao na're nench llakrento' re'. Na' yellrio ni, na' yel nban na', na' yel got, na' da llak nna', na' da za za'a, yeolol da ka'n yo' rao na're. 23Na' re' nakre rallna'a Cristo, na' Cristo na' nake' rallna'a Dios.

will be added

X\