1 Corintios 2

1Be'nn bi'che, kan' badtixjwe'ra' re' xti'll Diosen', bi bia'a di'll nbaraz, na' di'll si'n ka da llroe' be'nn lla'a rao yellrio ni. 2Be'renkza' re' di'll ke Jesucriston', na' kan' bene' be'e latj bet ake' Le'e le' yay cruz na', ni ke lli'o, na' bi be'rena' re' billre di'lle. 3Kan' bzorena' re' na', gokbe'ra' bi naka' be'nn war, na' bxhiza' lleba' cha' bi wzenayre kia'. 4Na' kan' be'rena' re' di'llen', kere be'rena' re' di'll yel si'n ke be'nnachen' nench na' wpera' re'. Zan Spíritu ke Dios na'n gokrenen nada' ren yel wak ke'e na', benen nench byejle're. 5Ka' bena' nench na' byejle're ke Diosen', kere dan' bénere yel si'n ke be'nnachen', zan dan' byejle're dan' bre're yel wak ke Dios na'. 6Na' ren be'nn ka' ba yo'rao llzenay ke Diosen', lloe'llo di'll si'n ke Dios, bi naken ke yellrio ni, na' bi naken ke be'nn brao, na' be'nn wnebia' zjani't ganni, le sete te ke be'nn ka' kone yel si'n ke ake'n. 7Dios na' ba bzejnie're' neto' yel si'n na', dan' nono byejnie' kana', dan' bwie' gak kan' za xe yellriote, le kana'ten' bwie' kan' gone' nench na' sollo nbaraz ke chnare. 8Na' ni to be'nn wnebia' zjalla'a yellrio ni, bi byejnie' akre' yel si'n ke Diosen', le chenak byejnie' akre'n, bi bda'a ake' Xanllo Jesucriston' le' yay cruzen' chenake, be'nnen' nak be'nn lliarao xhen na'. 9Na' kan' nyoj xti'll Diosen' nen: Diosen' ba none' xhnid da nak nbaraz ke be'nn ka' nllie' Le'en. Notno be'nn lla'a rao yellrio ni, ba bre'e akre', na' ba ben akre' ka da ki. Na' notno nna gon xhbab katk da nbaraz nak aken. 10Na' Diosen' bene' nench Spíritu ke'en broe'ren lli'o, le Spíritu na'n nombia' yeololte da de, na' rente da yo' lo yichjra'llda'o Dios. 11Kan' naken ke be'nnachen', notno nneze bi xhbab llon be'nne, ke kellon' nnézello bi xhbab llonllo. Kan' naksen ke Diosen', Spíritu ke'e na'zen' nnezen bi xhbab llone'. 12Na' Dios na' ba benne' lli'o Spíritu ke'e na', na' bi naken ka dan' yo' lo yichjra'llda'o kon to be'nn lla'a rao yellrio ni, nench na' nnézello ke da wen na' ba benn Diosen' lli'o. 13Katen' lloe'rento' re' xti'll Criston', kere lloe'to' di'll ke yel llejnie' keto'n, di'll da bzejnie' Spíritu ke Dios na'n lloe'to', na' be'nn ba yo' Spíritu ke Diosen' lo ra'llda'we', llzejnie' aketoe' yeololte da ka' llzejnie' Spíritun' neto'. 14Na' be'nn bi yo' Spíritu ke Diosen' lo ra'llda'o ake', bi llejle' ake' ke di'll dan' llonn Spíritu ke Diosen' neto' lloe'rén aktoe', llak akre' bibi za'k dan'. Na' bi llejnie' akre' le bi yo' ake' Spíritu ke Diosen' gakrenen leake' chejnie' akre'n. 15Na' be'nnen' yo' Spíritu ke Diosen' lo ra'llda'we' na', llakbe're' biteze cha' naken da za'ke, na' notno bi llak nne ke'e. 16Xti'll Diosen' nyojen nen: “¿Noxha llra' llejnie' kan' nak xhbab ke Diosen' nench wzejnie're' Diosen'?” Zan Diosen' ba benne' lli'o Spíritu ke'en, na' chejnie'llo xhbab ke Criston'.

will be added

X\