1 Corintios 16

1Nna' nnia' re' kan' gonre kat wtopre mell dan' gakrenen be'nn ka' nxenra'll Diosen' Jerusalén na'. Legón kan' golla' be'nn ka' lldop ll-llay llonlira'll Criston' toto yell ka' zjalli' gan' nbane Galacia. 2Yo'y lla dmio to tore llaya'l kwejre ra't wej mell kon akre benre gan rao to xhman. Na' ko'cha'ore mellen' nench den katen' yedra'nna' re', na' bi dadozre wtopren katen' yeda' na'. 3Na'll katen' yeda' gan' zore na', kana' wzoja' to yich da yeyo'x be'nn ka' lle'nere lljasán xhmellren' Jerusalén na'. 4Na' cha' llonen bien cha'a, wakse cha'rén ake' Jerusalén na' chet ka'. 5Na' yeda' gan' zore na', kat yeyoll tia' gan' nzi'i Macedonia na', le llaya'l lljawia' be'nn lwelljllo ka' lla'a na'. 6Na' llakra' yega'nnrenjea' re' to chi'i da'o, o cha' yega'nnkza' doxhen katen' llonen zay na', na' kat yeza'a na', gakrenre nada' nench na' wasyolla' cha'a gan' llaya'l cha'a na'. 7Bi lle'nra' to teza' gan' zoren', llbexha' yedsorena' re' to chi'i da'o cha' Xanllo Diosen' gonne' latj. 8Na' Éfeso ni yega'nna' llinte lnni dan' ne Pentecostés. 9Le be'nn zan zjalla'a ni, be'nn lle'n akre' wzenay ake' ke Criston', na' leska' zjalla'a be'nn llwie xti'lle'n. 10Na' cha' ra' Timoteon' gan' zore na', lewrebe' na' lewzenay ke'e nench na' soe' wen radjre na', le leska'n llone' xchin Xanllo Diosen', kan' llona' nada'. 11Ni tore bi gónere' ka be'nn bibi za'k dan' llroe' llsedre' na', lesorene' wen, na' gakrenre' kat yeze'e na', nench wayede' gan' zoa' ni kwasro kwis, le zoto' bexhtoe' ganni ren yezikre be'nn lwelljllo ki. 12Go'tyoera' Apolos na', yedrene' be'nn lwelljllo ka' yedra'nn ake' re', na' bi go'nre' yede' nna', wedje' kat we'n latj ke'e. 13Lesó si'n ka llon be'nn bi lltas yere, na' leko' to li yichjra'llda'oren' wxenra'llre Criston'. Bi llebre, leseteze legón kan' lle'ne Dios na'. 14Na' lellie' lwelljre biteze da llonre. 15Re' be'nn bi'che, nnézere be'nn ka' zjalla'a rill Estéfanas na', gok ake' be'nn nell bxenra'll ake' Criston' gan' nbane gan' nzi'i Acaya, na' ba gokrén ake' kwis yezikre be'nn lwelljllo be'nn llonlira'll Xanllon'. 16Ke len na' llnneyoera' re' wzenayre ke ake', na' gonre kan' ne ake' na', na' lewzenay ke nollre be'nn llon xchin Dios, le llakrén ake' be'nn lwelljllo ka'. 17Llawera' ba bara' Estéfanas ren Fortunato gan' zoa' ni, na' ren Acaico. Leake'n ba gokrén ake' nada' nench bill llakya'chra' dan' bi zore ganni. 18Be'nn ki ba bayonxhenra'll ake' nada' kan' ba ben akse' ke re' kana', ke len na' llaya'l bi ganra'llre be'nn ka' llon kan' llon be'nn ki. 19Be'nn ka' lldop ll-llay llonlira'll Criston' doxhen yell ka' gan' nbane' Asia na', llwap ake' re' lliox. Na' be'nnen' nzi'i Aquila, na' ren xho're'n nzi'i Priscila, na' be'nn ka' ll-llay rill ake'n lloe'xhen ake' Cristo na', leska' llwap ake' re' lliox. 20Na' yeolol be'nn lwelljllo ka' ganni llwap ake' re' lliox. Na' kat lldop ll-llayre na', lewno'p na'a lwelljre. 21Kwinkza' nada' Pablo llzoja' re' ra't weje le' yich ni, llwapa' re' lliox. 22Na' cha' nna zjarén ye balre bi nllie're' Xanllo Jesucriston', Dios na' wlleyi'chgue' be'nn ka' ke chnare. Xanto', dachga. 23Xanllo Jesucriston' gakrenchgue' re'. 24Nllie'ra' yeololre le nakllo txhen llonlira'll-llo Xanllo Jesucriston'. Ka'n gakchga.

will be added

X\