1 Corintios 15

1Be'nn bi'che, lle'nra' lljasa'ra'llre Di'll Wen ke Criston' dan' ba be'rena' re'. Ba bzenayren, na' zere choch le ba byejle'ren na'. 2Na' ba nnézere wallinre gan' llia Diosen' cha' soteze sore wzenayre Di'll Wen ke'en. Na' cha' bi naore llzenayre ke'e, bibi zejen nnere llejle're chet ka'. 3Criston' bzejnie're' nada' da ki da nak da lliarao, na' ba bdixjwe'ra'n re'. Criston' gote' ni ke xto'l lli'o kan' nyoj xti'll Dios na'. 4Na' bga'che', na' bayónn lla na', babane' radj be'nn wat ka', le ka'n nyoj xti'll Diosen'. 5Na'll jaroe'rawe' Pedron', na' bayoll na' jaroe'rawe' yezikre postl ka'. 6Bayoll na' na'll jaroe'rawe' ye ga'y gayoa (500) wde be'nne to chi'ze, be'nn nxenra'll Le'e. Be'nn zan nna nban nna', na' bal ake' ba got. 7Na'll jaroe'rawe' Jacobon', bayoll na' jaroe'rawe' yeololte postl ka'. 8Na' bayoll na' badroe'rawe' nada'. Naka' ka be'nn gorje ka bi nna llin lla garje'. 9Le kana' bsa'kzia' be'nn ka' nxenra'll Criston'. Ke len na' bi za'kteka' ye ake' nada' postl. 10Zan Dios na' nllie're' nada' breje' nada' naka' postl ke'e, na' ba bzenaya' ke'e, na' llonlla' xchine'n kerke be'nn lwellja' ka' yela'. Na' kere llona'n toza'n, Dios na'kzen' llakrén nada' llona'n. 11Na' bitbi gonen cha' xti'lla'n ba bzenayre o cha' xti'll be'nn yobren' ba bzenayre, le toze ka' llyixjwe'kzto' kan' nak ke Criston', na' ka'n nak dan' ba byejle'ren'. 12Yeololte neto' llyixjwe'to' Criston' babane' radj be'nn wat ka'. Na' ¿bixchen balre nere bi yebán be'nn wat ka'? 13Le chet ka' naken kan' nere na', bi llasbán Diosen' be'nn wat ka', na' nnello bi babán Criston' chet ka'. 14Na' cha' Criston' bi babane' radj be'nn wat ka', bibi za'k xti'lle'n dan' be'rento' re', na' bibi zejen dan' llonlira'llre' na', cha' ka' naken. 15Ba be'rento' re' di'll wenra'll, bneto' Dios na' basbane' Criston' radj be'nn wat, cha' ka' naken di'll li dan' nere bi llasbane' be'nn ba got. 16Le cha' bi llasbane' be'nn ba got, leska' bi basbane' Cristo na'. 17Na' cha' naken li bi basbán Diosen' Criston', bibi de gon dan' nxenra'llre' na', na' nna nakre rallna'a da xhinnjen'. 18Le chenak li bi babán Criston', ba blleyi' yeolol be'nn wat ka' bxenra'll Criston' chet ka'. 19Na' cha' dan' llonllo rez yellinllo gan' llia Criston' kat yeza'llo yellrio ni, naken da wenra'llzen', nya'chraz naken ke lli'o rao yeolol be'nne chet ka'. 20Zan nna' nia' re', da likzen' basbán Diosen' Criston' radj be'nn wat ka', na'llen' Le'en goke' be'nn nell be'nn babán radj be'nn wat ka'. 21Le bxhe yel goten' rao yellrio ni, dan' bzo to be'nn golle Adán bene' da xhinnj, na' lekze ka'kzen' gok, to be'nne re Cristo bene' nench llin lla yebanllo radj be'nn wat ka'. 22Le kan' ben Adán na' da xhinnj na'n, bxhe yel goten', na'llen' llat yeolol be'nnach. Na'llen' ben Criston' ga't yel nban zejlikane ke yeolol be'nn wxenra'll Le'e. 23Na' kan' llaya'l totollo yebanllo radj be'nn waten' nench sorenllo Criston' kon kan' ba bne'e na'. Criston' blliarawe' babane' radj be'nn wat ka', na' kat yede' da yobre, lli'o llonlira'll Le'e, leska' yebanllo radj be'nn wat ka'. 24Na' llin lla yeyoll yellrio ni. Kana' Criston' walane' yel llnebia' ke yeolol no llwie Diosen', na' yeke'e yel llnebia' ke yeololte daxi'o. Yeyoll na' yeyone' rallna'a Xe'e Diosen' yeolol da nlane' llnebie', na' yeolol non' llnebie'. 25Le dekz de nnebia' Criston' llinte lla gon Diosen' nni't xhnie' yeolol be'nn ka' llwie Le'en. 26Na' kat yeyoll wlleyie' yeolol bi da bi llon Le'e txhen, na'll gone' yenit yerán yel goten'. 27Diosen' ba bene' nench yeolol da zjadé nni't aken xhnia' Criston'. Na' bi nnello ze Diosen' xhnia' Criston', le Dios na' bene' nench yeolol da de gaken rao na'a Criston'. 28Na' kat ba ben Diosen' yeolol da zjadé ba naken rao na'a Criston', kana'n wroe'n Criston' yoe' rao na'a Xe'e Diosen'. Le Le'en bene' nench gok yeolol da ka' rallne'e. Na' ka' wroe'rawe yeolol bi da de naken rallna'a Dios. 29¿Akxha zejen ke be'nn ka' ll-lloa ake' nis roraz be'nn ba got? ¿Bixha zejen da llon ake' ka' chet ka' bi llin lla yebán be'nn wat ke ake' ka'? 30Na' neto', ¿bixchen llsanra'llze yel nban keto' yo'y lla chet ka'? 31Be'nn bi'che, lloa'a di'll li, nia' yo'y lla llara'a rao na'a be'nn lle'ne got nada', na' leska' lloa'a di'll li, nia' llawera' kwis ba nxenra'llre Xanllo Jesucristo. 32Na' wak nnello ka to bayi'x znian' bdilrena' gan' nzi'i Éfeso, le ba bda'ba'y be'nn ka' nada'. Na' bibi za'k dan' ba bllejra' yeolol da ka' dan' ben akre' nada' cha' ka' naken, bi yebán be'nn wat ka'. Na' cha' ka' naken bi yebán be'nn wat ka', wenre gonllo kan' ne be'nn ka', ne di'llen' ne ki: “Ye'j gaotegallo, le wxezen' gatllo.” 33Bi we're latj no siye'e re' kan' ne to di'll da de: “Be'nn darén txhen be'nn ka' llon da xhinnj, leska' sorao gone' kan' llon ake' na'.” 34Leyego' yichjra'llda'oren' to li, na' bill gonre da xhinnj, le balre bi nna chejnie're da nak ke Dios. Llepa' re' ka', le lle'nra' gákere zdo' ka da xhinnjen' llonre na'. 35Balre llnnabjere: “¿Akren' gak yebán be'nn wat ka'? Na' ¿akre gak kwerp ke ake'n kat yebán ake'n?” 36Ncholje yichjra'llda'oren' cha' llákere bi gak yebán ake' radj be'nn wat ka'. Nnézello to xhoa' da'o llazllo de yexhinnjen nench ra' yer da'on. 37Na' kat llazllo na', bi llazllo yer da'on, xhoa' na' llazllo, na'll llaxhinnjen llayaken yer da'o. Ka'kze llak biteze da llazllo, na' llra' akten. 38Llayoll llazllo na', Dios na' llone' llra' ke dan' llazllon', bi llra' yay yobre da bi llazllo. 39Na' kere toze ka nak kwerp ke lli'o be'nnach kone ke ba zo tap nia', na' kone ke ba llia xire, na' kone ba lla'a lo nis. 40Nlla'a kwerp da lla'a yellrio ni, na' nlla'a da ka' llia le' yebán'. Na' nlla'a yel nbaraz ke da ka' zo le' yebán', na' nlla'a yel nbaraz ke da zjazó yellrio ni. 41Na' nlla'a ka llseni' willen', na' nlla'a ka llseni' be'on, na' lekze nlla'a ka llseni' toto berj ka'. 42Ka'kze gak ke be'nn ka' yebán radj be'nn wat ka'. Kwerp ke ake' dan' bga'ch lo ba na'n ba bayollen, zan kwerp kob ke ake'n kere da te ken'. 43Kwerp ke be'nn waten' naken kwerp da bibi nakteke da za'ke, le llayollen, na'llen' lljakwa'chllon lo ba. Zan kate yebán ake' radj be'nn wat ka', yeyak kwerp ke ake'n da bi te ke, na' da war. 44Katen' llga'ch ake'n nak ake' de be're ren llen, zan kate yebán ake' radj be'nn wat ka', ba nak kwerp ke ake'n nlla're, na' ban ake' ke chnare yebán'. Nnézello nna' nna naken de be're ren llen, na' lekze llaya'l nnézello llin lla kate yeyaken da kobe kan' ne Spíritu ke Diosen'. 45Xti'll Diosen' nyojen nen: “Adán be'nnen' gok be'nn nell bzoe' wbane' kana'.” Na' nna' zo Cristo, na' za'krebe' ka Adán na', na' Cristo na'n llonn yel nban kello zejlikane. 46Na' nna' llre'llo kere bra' da nell dan' benn yel nban kellon', be'r llen na'n gok da nell. Na'llen' bra' dan' benn yel nban zejlikane kellon'. 47Diosen' bene' be'nn nell kone bichte yo, nench bzoe' rao yellrio ni, zan Xanllo Cristo be'nnen' nake' ka be'nn wllop, nake' be'nnen' za'a yebá. 48Na' lli'o be'nnach nak kwerp kellon' ka kwerp ke be'nn nell na', dan' ben Diosen' kone bichte yo, ke len na' nakllo ke yellrio ni. Na' lli'o llonlira'll Cristo na', llin lla kate yeyak kwerp kellon' da kobe kan' nak kwerp ke be'nnen' za'a yebá na'. 49Nna' nna zollo yellrio ni, nakllo ka be'nnen' ben Diosen' kone bichte yo na', zan kat llin lla lljazollo yebá na', gakllo ka Cristo be'nnen' za'a yebá na'. 50Be'nn bi'che, ni nnia' re' bi gak yellinllo gan' llia Diosen' kone be'r llen na', na' da llbeyi' bi gak son ke chnare yebán' ren Diosen'. 51Lle'nra' nnia' re' to da nono bnneze kana', kere yeolol-llon' gat, zan yeolol-llon' yella'a kan' nakllo na'. 52To seten' ka llchod llaxha' yejraollon', yella'a kan' gakllo katen' kwell trompet ke Diosen'. Na' yebán yeolol be'nn wat ka', na' yeyak kwerp ke ake'n da kobe da bill gat, na' leska' yella'a kwerp ke lli'o. 53Le kwerp kello dan' nbanrenllo yellrio ni, da te ke dan'. Naken da gat, na'llen' yeyaken da kobe da bill gat, na' bill go'llen. 54Kat ba bakob kwerp kellon' bill gaten, kana'n ba gok kan' nyoj xti'll Diosen' gan' nen: “Diosen' bkwase' yel goten', na' llonne' yel nban zejlikane kello. 55¿Gann yel wak ko'on, yel got? ¿Gann yel llsa'kzi' ko'on, yel got?” 56Da xhinnjen' nsa'n yel llsa'kzi' ke yel goten'. Na' kat ba benllo da xhinnje, za'ke leyen' ll-lliayi'llen lli'o. 57Llioxken Diosen' bse'le' Xanllo Jesucriston' bake'e dan' ba nlleyi' lli'on. 58Ke len na' be'nn bi'ch ak nllie'ra', llnneyoera' re', lesé war, na' leseteze, na' legonteze xchin Xanllon', le nnézkzello katen' llonllo xchin Xanllon', kere da tebrao ka'zen'.

will be added

X\