1 Corintios 14

1Llaya'l we'la'llre llie're Diosen' na' ren be'nn lwelljre, na' leska' llaya'l so lo ra'llda'oren' gakrén Spíritu ke Diosen' re', na' gonre kon bi da lle'nen gonre, na' chixjwe're bi dan' ne Dios. Len na' llaya'lya'nn sera'llre gonre. 2Ka nak be'nn lloe' di'll da bi nsede', bi lloe'rene' no be'nnach di'lle, le nono llejnie' len, Dios na'n lloe'rene' di'lle. Le naken di'll da lloe' Spíritun' le'e nench lloe'rene' Diosen' di'll, na' nono llejnie' len. 3Zan be'nn llyixjwe're bi dan' ne Diosen', be'nn na'n llakrene' nench sechich ake' wxenra'll ake' Diosen', na' so ake' nbarazlle, na' yexhenra'll ake' cha' bi da llak ke ake'. 4Na' kat lloe'llo wde wdere di'll da bi nsedllo, lo yichjra'llda'ollo na'zen' llakrenen. Zan cha' llyixjwe'llo bi da nne Diosen', lli'o lldop ll-llayllo llonlira'll-llo Criston' llakrenen. 5Yewera' cha' yeololre gak we'renre Diosen' biteze di'll da bi nsedre, zan wawellra' cha' yeololre gak chixjwe're bi da ye Diosen' re'. Len na' za'kll kerke da we'renlloe' wde wdere di'll chak ndop llayllo lloe'raollo Diosen'. Le cha' nono zo, no wazejnie' be'nn ka' akre zejen ka nak di'll dan' llonn Spíritun' nnello, bi gakrenen be'nn lwelljllo sechich ake' wxenra'll ake' Le'e. 6Be'nn bi'che, nnezra' bi gakrenen re' cha' we'rena' Diosen' wde wdere di'll da bi llejnie're kat yeda' yedra'nna' re'. Zan cha' wzejnie'ra' re' bi dan' ba bzejnie' Diosen' nada', wakrenen re'. Na' leska' wakrenen re' cha' wzejnie'ra' re' billre da nnezra' ke Diosen', na' billre da ne Diosen' nada' nench chixjwe'ra' re', na' cha' wroe' wsedra' re', akre zeje xti'll Diosen'. 7Leska' naken ke da ka' zill, da bi de yel nban ke, ka nak dan' nzi'i bllej, na' ka nak dan' nzi'i guitarr, cha' bi llbellen, na' bi zillen kan' llaya'l gonen na', ¿akre gak nnézello dan' llol ka nak bllejen' na' guitarren'? 8Ka to ke rao wdile, cha' bi wkwelle' trompeten' kwasro, bi chejnie' be'nn waka'a ya ka', cha' rao wdilen' llaya'l lljake'. 9Ka'kzen' naken ke lli'o, cha' we'renllo be'nne di'll da bi chejnie' be'nne, bi gakrenen leake', na' gonen ka be'nn lloe'rén di'll kwinze'. 10Be'nn zjalla'a doxhen yellrio, wde wdere di'll da gorjrén ake'. Na' ni ton bi gak nnello bi chejnie' be'nne len. 11Na' cha' lli'o bi llejnie'llo di'll da we'rén be'nn lli'o, nakllo ka be'nn zi't ke le'e, na' le'en nake' ka be'nn zi't kello. 12Na' dan' zera'llre gakrén Spíritu ke Diosen' re' nench gak gonre bi da lle'nre' gonre, ka'kzen' llaya'l sera'llre gonne' re' da gakrén lwelljre nench na' sechichre wxenra'llre Diosen'. 13Na' cha' Spíritu ke Diosen' gonen we'llo wde wdere di'll da bi nak xti'll-llo, llaya'l nnabllo gakrenen lli'o wazejnie'llo be'nne bi zeje di'llen' lloe'llo. 14Le chet ka' lloe'rena' Diosen' di'll da bi nseda', spíritu kia'n llalwillen Diosen', la'kze bi llejnie'ra' bin' nia'. 15¿Akre llaya'l gona' cha'? Llaya'l we'rena' Diosen' biteze di'll da llonn Spíritu ke'en nada', la'kze cha' bi llejnie'ra'n, leska' llaya'l we'rene' di'll da llejnie'ra'. Llaya'l gola' da we'rawa' Diosen' da llonn Spíritu ke'en nada', la'kze cha' bi llejnie'ra'n, leska' llaya'l gola' da llejnie'ra'. 16Le cha' lloe'renre Diosen' di'lle, na' lloe're yel llioxken ke'e kone di'll dan' bi llejnie' be'nne, leake'n bi gak we'xhen ake' Diosen' txhen ren re', le bi llejnie' akre' bi di'llen' lloe're. 17La'kze cha' lloe're yel llioxken ke Diosen' kwasro, bitbi gakrenen be'nne cha' bi chejnie're' xti'llren'. 18Nada' lloa'a yel llioxken ke Diosen', lloe'renlle' billre di'll da bi nak xti'lla' kerke yeolol re'. 19Zan kat ndop llay be'nn ka' llonlira'll Criston', wenre wa'a ga'yze di'll da chejnie' be'nne nench wzejnie' akre', kerke wa'a chi mir di'll da bi chejnie' akre'. 20Be'nn bi'che, bi llaya'l cho're xhbab ke bida'o bi nna chejnie', lecho' xhbab ke be'nn ba llejnie'. Na' rao da xhinnj ka', llaya'l gakre ka bida'o bi nna gon da xhinnj la'kze ba nakre be'nn gore. 21Xti'll Dios dan' nyojen nen: “Nada' Dios we'rena' be'nn ki di'll da bi chejnie' akre', di'll ke be'nn zi'te, na' ni ka' bi wzenay akse' kia'.” Ka'n ne Xanllo Diosen'. 22Ke len na' llonn Diosen' wde wdere di'll da lloe'llo nench be'nn ka' bi nna gonlira'll ake' Le'e gakbe'e akre' zerenkze Diosen' lli'o. Na' lli'o nxenra'll-lloe', Spíritu ke'en llonen nench be'nn ka' ba breje', llayixjwe' akre' lli'o bi da ne Diosen'. 23Na' kat ndopllo gan' llalwill-llo Diosen', na' yeolol-llo nnello wde wdere di'll da bi nak xti'll-llo, na' ra' bal be'nne bi chejnie' ka di'llen' lloe'llon', o cha' be'nn bi llonlira'll Le'e, leake'n nne ake' llaktontjellon'. 24Na' cha' be'nn ka' bi nxenra'll Diosen', o cha' be'nn ka' bi llejnie' kan' llonllon', ra' ake' kate yeolol-llo llzejnie' lwelljllo bi da ba bne Diosen' lli'o, na'll yeyakbe'e akre' de do'l ke ake' kat yen akre' xti'll yeolol-llo, na' kana' lljadinra'll ake' bi da xhinnjen' non ake'n. 25Na' yeyakbe'e akre' Dios na', nnezre' dan' yo' lo yichjra'llda'o ake'n, na'll wzoa xhib ake' we'rao ake' Diosen', na'll nne ake': “Da likzen' zo Diosen' radj be'nn ki.” 26Be'nn bi'che, katen' lldopre lloe'xhenre Diosen' kin' gonre: Balre de da golre we'xhenre Diosen', na' balre de da wroe' wsede lwelljre, na' balre de da ba goll Spíritu ke Diosen' re', na' balre de wde wdere di'll da we're da bi nsedre, na' ye balre chixjwe're, akre zejen di'll wde wderen' ba bne be'nn lwelljre ka'. Naksen wen gonre yeolol da ki kon cha' gakrenen lwelljre sere choch wxenra'llre Criston'. 27Na' cha' nolre we'e di'll dan' bi nsedre, do chopzre o chonnzre wak we'ren, na' twej twejre soraore, na' yeyoll na' lloj be'nne yezejnie're' akre zeje di'llen' be're na'. 28Na' cha' nono llra' no yezejnie' di'llen' be're na', bi llaya'l we're di'llen' zillje gan' ndop llayre na', kon lo ra'llda'ozre lewe'rén Diosen' di'lle. 29Na' cha' nolre de chixjwe're bi da ne Diosen', leska' do chopzre o chonnzre lloj chixjwe'ren chak ndop llayre na', na' wzenay yezikre be'nne dan' nneren' cha' lltilen xti'll Dios dan' nyoj na'. 30Na' cha' tore ze lloe' di'llen', na' Diosen' wzejnie're' ye tore da chixjwe're', na' be'nnen' ze llaral llyixjwe're'n, le wsante' we'e latj nench na' gak chixjwe' be'nnen' ye to. 31Yeololtere wak chixjwe're dan' ne Diosen' re', na' we're latj nne twej twejre nench chejnie' yeololre, na' gakrenen re'. 32Na' re' llyixjwe' bi dan' ne Diosen', llaya'l chixjwe'ren kat llákere naken wen chixjwe'ren. 33Le Diosen' bi nake' be'nn llonchixre' lli'o, ke len na' lle'nre' nbaraz wsa're dan' llonre kat lldop ll-llayre lloe'xhenre' na'. Na' katen' lldop ll-llayre lloe'xhenre Criston', 34bi llaya'l we'e no'r ka' di'll lo yoda'on, le bi de latj gon ake' ka', llaya'l wzenay ake', le ka'n nllia ley ke Diosen' bia'a gon ake'. 35Na' cha' bi da lle'ne no'r ka' nnez akre', na' nnab akre' xhyio ake'n kat yellín ake' rill ake', le naken to zdo' cha' to no're we'e di'll gan' lldop ll-llayre lloe'xhenre Diosen'. 36Lewayón ke xhbab, kere re'n gokre be'nn nell byejle're xti'll Criston', na' kere re'zen' ba bxhi'i xti'lle'n. 37Cha' nolre llákere llak llyixjwe're dan' ne Diosen', na' cha' llákere llakrén Spíritu ke Diosen' re' bi da llonre, ke len na' llaya'l gakbe're da ki llzoja' re' naken da nllia Xanllon' bia'a gonllo. 38Na' cha' be'nn bi llejle' ke da ki llroe'ra' re', bi llaya'l chejle're cha' bi da ne'e. 39Ke len na' be'nn bi'che, lekwek yichjre gakrén Spíritu ke Diosen' re' nench chixjwe're bi da nne'e, na' bi wllonre cha' we'e be'nne wde wdere di'll da we'e Spíritu ke Diosen' leake'. 40Na' kwasro leko' nez dan' llonre kat lldopren'.

will be added

X\