1 Corintios 11

1Na' lla'tyoera' re' gonre kan' llona' nada', le nada' llona' kan' ben Cristo na'. 2Na' nna' nia' re', llonre wen lljadinra'llre nada', na' llonre ka dan' bzejnie'ra' re' na'. 3Na' lle'nra' chejnie're da ni, Criston' nake' be'nn lliarao rao be'nn byio ak. Na' be'nn byio ka' nak ake' be'nn lliarao rao no'r ka'. Na' Dios na' nake' be'nn lliarao rao Criston'. 4Noteze be'nn byio, cha' nzoateze xhla'pe' kat llalwille' Dios gan' lldop ll-llayre llakre txhen, o kat bi da llyixjwe're' da ne Dios, bi lloe'xhene' Criston' chet ka', le Cristo na' nake' be'nn nell ka le'e. 5Na' cha' to no're llalwille' Dios o cha' llyixjwe're' da ne Diosen', na' bi nkwa'ch yichje', bi llape' xhyiwe'n bara'nne, le be'nn byio na'n nak be'nn nell ka le'e. Na' no'ren' llon ka', rebze llone' ka be'nn ka' nchib yichj. 6Na' cha' bi lle'ne no'ren' wkwa'ch yichje'n kan' nia' na', wenre wchibe' doxhen yich yichje'n. Na' cha' llakre' zdo' wchibe'n, wenre wkwa'che'n kan' llon yezikre no'r ka'. 7Na' be'nn byio ka', bi llaya'l wkwa'ch yichj ake'n, le leake'n llroe' akre' katek za'k Diosen'. Zan no'r ka', llroe' akre' katk za'k xhyio ake'n. 8Le kere llit lcho' no'r na'n ben Diosen' be'nn byion', llit lcho' be'nn byio nell na', len na' bene' no'r na'. 9Le Diosen' bi bene' be'nn byion' gakrene' no'r na', no'r na'len' bene' gakrene' be'nn byio na'. 10Ke len na' llaya'l wkwa'ch yichj no'r ka' nench nroe'n, be'nn byio ka'n nakll lliarao ka leake', ka'n gon ake' ni ke angl ka'. 11Zan naksllo txhen Xanllo Jesucriston', ka no're, na' be'nn byio; na' bi llaya'l nne no'ren' bi yalljre' be'nn byio, na' be'nn byion' bi nne'e bi yalljre' no'ren'. 12Le llit lcho' be'nn byio na'n brej Diosen' bene' no'r na', leska' yeololte be'nn byio zo no're bxhan leake', na' yeololtekze bi da de naksen da ben Dios. 13Lennechk re', ¿naken lixhej to no're llalwille' Diosen', na' bi nkwa'ch yichje'? 14Na' lekze naken to zdo' kat to be'nn byio bi wchib yichje'n, nllie'n tonn ka llia ke no're. 15Zan naken to bara'nn xhen na' ke no'ren' we'e latj wllia yichje'n tonn, le Dios na'n none' yich yichje'n to da wkwa'ch yichje' na'. 16Na' ka nak yeololte di'll ka' ba be'rento' re', cha' nolre lle'nere gakyollrén lwelljre, neto' postl, na' gallre ga lldop ll-llay be'nn llonlira'll Dios, bi llonto' billre da yobre. 17Na' de ye to da nnia' re', le bi llonre wen katen' lldop ll-llayre llonxhenre Criston', na' bi llakrenen re', le bi llonre wen. 18To da bi llonre wen, ne ake' katen' lldopre lloe'raore Criston', bi llonre txhen lwelljre, na' llakra' nakjen li kan' ne ake' na'. 19Na' ka'jen' llaya'lkze gak dan' bi llonrenre txhen lwelljre na', le len na' wroe'n noxhan' nxenra'll Criston' do yichj do ra'lle', na' non' bi nxenra'll Le'e. 20Na' kat lladop llallayre, kere nnello llaore txhen na', nench lljasa'ra'llre yel got ke Xanllo Jesucriston'. 21Na' kat lldopre gaore txhen na', totore llje'xre kon da lldo'lere, ni ke bexhze lwelljre, na' balre nna donzre kat lladaoren', na' ye balre lle'j llaoxenre. 22¿Bi zo rillre na' gaore na'zen'? Katen' llonre ki, llkwasre chla're dan' nak ke Diosen', na' re' dan' llonre ka', llakya'che be'nn bibi de ke ake'. Len na' naken da xhinnj kwis kan' llonre na', na' bi gak nnia' wen na' llonre ka'. 23Xanllo Jesúsen' bzejnie're' nada', na' ba broe'ra' re'. Ka lle'n bde Judasen' Le'e rao na'a be'nn ka' bwie Le'en, Xanllo Jesúsen' be'xe' to yet xtir. 24Na'll be'e yel llioxken ke Diosen', bayoll na' na'll bxhoxhje'n, na'll bne'e: “Lesi'n, Legaon. Da nin' nak kwerp kia' dan' ba bia'a ni keré. Kin' gonre lljadinra'llre nada'.” 25Leska' bene' ka bayoll badao ake' xche'n, bxhie' to leo da'o xis uva, na' bne'e: “Dan' yoll lo leo da'o ni, naken to da llroe'n sorao to da kob dan' bcheb Diosen' gakrene' be'nnach. Na' larj xchena'n nench gaken da li. Na' batteze kat ye'jre ka dan' llonna' lle'jre ni, lelljadinra'll kan' bena' bzane kwina' got ake' nada'.” 26Ke len na' yo'y ras kat llaore yet xtir na', na' lle'jre xis uvan', lljasara'llre kan' bzane kwin Xanllon' gote', llinte lla yede' da yobre. 27Kan' naken cha' llaollo yet xtiren', na' lle'jllo nis uvan' nench lljasa'ra'll-llo yel got ke Xanllon'. Zan cha' bi llapllo bara'nn kan' zejen na', katen' lle'j llaollon na', naken xhia kello, le llonllo ka to da bibi za'k kwerp ke'en, na' xchene' na'. 28Ke len na' llaya'l gonya'nnllo xhbab cha' nak ra'llda'ollon' yall rao Diosen' ka za gaollo yet xtir na', na' ka za ye'jllo xis uva na'. 29Le cha' ye'j gaollo, na' bi llonllo xhbab bi zejen dan' bzane kwerp ke Xanllo gote' ni kello, kwinzllo llxoa do'l ko'll-llo, cha' ka' llonllo. 30Ni ke dan' bi llapre bara'nn dan' ben Criston', zanre bi zore wen llakre no yillwe', na' ye balre ba wasa'te. 31Na' cha' llwiaya'nnllo akre nak yichjra'llda'ollo, bibi do'l llxoa ko'll-llo chenake. 32Na' ka nak ba nxoa do'l ko'll-llo dan' bi llwiallo lo yichjra'llda'ollon' cha' naken yall katen' lle'j llaollo na', ke len na' Xanllon' llsa'kzie' lli'o nench na' bi wsa'kzie' lli'o ke chnare kan' gak ke be'nn ka' bi llonlira'll Le'e. 33Ke len na' be'nn bi'che, kat lldop ll-llayre nench ye'j gaore txhen, lekwexh lwelljre, na' ye'j gaore txhen. 34Cha' balre donre, llaya'l gaore lo yo' ga zore nench ke yedop yellayre, na' wxoa xhia do'l ko'llre, na' wsa'kzi' Diosen' re'. Na' da ka' yela' koa' xhnneze kat yeda' gan' zore na'.

will be added

X\