1 Corintios 1

1Nada' Pablo llzoja' yich ni. Dios na' byazra'lle' breje' nada' nench na' naka' postl ke Jesucristo na'. Nada' na' ren be'nn bi'chllon' nzi'i Sóstenes llwapto' re' lliox. 2Yich ni llzoja'n ke re' lldop ll-llayre llonlira'llre Diosen' yellen' nzi'i Corinto dan' llonlira'llre Xanllo Jesucristo na', ba brej Diosen' re' nakre rallne'e, kan' bene' breje' yeolol be'nn llalwill Xanllo Jesucriston', nak ake' Le'e txhen do gateze, le Lekze'n nak Xan ake' na' Xan lli'o. 3Llnnaba' rao Xallo Diosen', na' rao Xanllo Jesucriston' gakrén akchgue' re', na' wzoa ake' yichjra'llda'ore so kwezre nbaraz. 4Lloe'teze lloa'a yel llioxken ke Diosen' ke re', kan' llakrene' re' dan' llonlira'llre Xanllo Jesucristo na'. 5Na' dan' nxenra'llre' na', llakrene' re' kwis nench chejnie're yeolol dan' ba bzejnie' Diosen' re', na' nench lloe're di'll ke'e na'. 6Na' ka nak nna', ba bxhi're xti'll Criston', le naksen da li. 7Ke len na' Spíritu ke Diosen' llonen nench llak llonre yeolol dan' llaya'l gonren', chak nna bezllo yed Xanllo Jesucriston' da yobre. 8Dios na' gakrene' re' sotezre gonre kan' lle'nre' na', nench notno gak wxoa ko'llre do'l katen' yed Xanllo Jesucriston'. 9Zokze Diosen' llone' kan' bne'e gone' na', Lekze'n breje' re' nench nakre xhi'nne' Jesucriston' txhen, be'nnen' nak Xanllo na'. 10Be'nn bi'che, re' llonlira'llre Jesucriston', lla'tyoera' re', legón lwelljre txhen, bill gakre chop chonn kwenre cha' bi xhbab llonre, na' cha' bi da nere. 11Ka'n llepa' re' be'nn bi'che, le be'nn ka' zjalla'a rill be'nnen' nzi'i Cloé na', ba goll ake' nada' wa llakdilre. 12Nia' llakdilre, le balre nere: “Neto' llonto' txhen dan' llroe' llsede Pablon'.” Na' ye balre nere: “Llonto' txhen dan' llroe' llsede Apolosen'.” Na' ye balre nere: “Llonto' txhen dan' llroe' llsede Pedron'.” Na' ye balre nere: “Llonto' txhen dan' llroe' llsede Criston'.” 13¿Llákere cha' ka' nla' Criston'? ¿Llákere cha' nada' Pablon' gota' le' yay cruzen' ni ke re'? ¿Llákere cha' ren ra'a nada' Pablon' blloare nisen'? 14Lloa'a yel llioxken ke Dios, bi bchoa' nada' re' nis. Be'nnen' nzi'i Crispo ren be'nnen' nzi'i Gayo na'zen' bchoa' nis. 15Na'llen' nollno llra' be'nn nne bchoa ake' nis, le bi lle'nra' nne ake' nada' llchoa ake' nis. 16Na' leska' nada' bchoa' be'nnen' nzi'i Estéfanas nis ren be'nn ka' lla'a lo yo' rille' na'. Na' bi za'ra'lla' cha' zjazoll be'nn bchoa' nis. 17Le bi bse'l Criston' nada' wchoa' be'nne nis, bse'le' nada' chixjwe'ra' Di'll Wen ke'e na'. Na' bi llayirja' no di'll da gake be'nne di'll si'n na' lloa'a, nench ke wxenra'll ake' nada', na' bill gon ake' xhbab ke dan' got Criston' le' yay cruzen', le len na' nsa'a yel wak ke Dios. 18Be'nn ka' ba zjazé rao nez dan' ll-lleyi' leake', llak akre' bibi za'k di'll ke Xanllon' dan' gote' le' yay cruzen'. Zan lli'o yerallo rao da xhinnjen', nnézello di'll ke dan' gote' le' yay cruzen' nsa'n yel wak ke Dios. 19Ni llak kan' nyoj dan' ne Diosen': Wroe'ra' bibi za'k yel si'n ke be'nnach ka', Na' wlli'ya' chla're dan' ne ake' llejnie' akre'n. 20¿Bixha za'k dan' nneze be'nnen' llejnie' da xhen gore? ¿Bixha za'k dan' nneze be'nnen' ba bsede'? Na' ¿bixha za'k di'll ke be'nn ka' lloe' di'll wallajllo ke da llak yellrio ni? Diosen' ba broe're' dan' nneze be'nnachen' bibi za'ken. 21Diosen' nake' be'nn si'n, na' bene' nench yel si'n ke be'nnachen' bi llakrenen leake' gombia' ake' Le'e. Le Diosen' llazra'lle' kon be'nn llejle' xti'lle' dan' lloe'to' na', yerá ake' rao da xhinnj ke ake', la'kze llake nollre be'nne bibi de gon di'llen' lloe'to' na'. 22Na' be'nn Israel ka' llnnab akre' re'e akre', kan' nak yel wak ke Diosen', na'll chejle' ake'. Na' be'nn ka' nne di'll griego, llayirj ake' billre di'll da llak akre' nakll di'll si'n. 23Zan neto' lloe'to' xti'll Criston' kan' gok kan' gote' le' yay cruz na'. Na' be'nn Israel ka' bi llazra'll ake' di'llen' lloe'to' na', bi llejle' ake'n. Na' be'nn ka' bi nak be'nn Israel, ne ake' llaktontjeto'n. 24Zan ka lli'o ba brej Diosen' nak rallne'e, la'kze cha' nakllo o cha' bi nakllo be'nn Israel, nnézkzello Cristo na'n llroe're' kan' nak yel wak ke Diosen', na' yel si'n ke'e na'. 25Be'nn ka' bi llonlira'll Diosen', llak akre' bi nak Diosen' be'nn si'n dan' be'e latj got Criston' le' yay cruzen', na' llak akre' llroe'n bibi yel wak nap Diosen'. Kere ka'n, xhbab ke Diosen' nakllen da si'nll kerke xhbab ke be'nnachen', na' dan' bene'n napllen yel wak kerke dan' nap be'nnachen'. 26Be'nn bi'che, lewayón ke xhbab, kan' brej Diosen' re' nakre rallne'e, bi nak zanre be'nn si'n ke be'nnach, na' kere zanren' nakre be'nn wnebia', na' kere zanren' nakre be'nn brao. 27Be'nn ka' lla'a rao yellrio ni, llon ake' xhbab ke nak lli'o ba brej Diosen', bi nakllo be'nn si'n. Ka' ba ben Diosen' nench na' wsie' zdo' be'nn ka' llon xhbab nak ake' be'nn si'n. Leska' be'nn ka' lla'a rao yellrio ni, llon ake' xhbab, lli'o ba brej Diosen' bi napllo yel llnebia'. Zan ka'n ba ben Diosen' nench na' wsie' zdo' be'nn ka' llon xhbab nap ake' yel llnebia'. 28Diosen' ba breje' lli'o, bi nakllo be'nn brao, be'nn bi llazra'll be'nnach, na' breje' lli'o nench wroe're' be'nnen' nak be'nn brao rao be'nnachen', bibi za'k ake' rao Le'e. 29Diosen' bene' ka' nench nono gak yeyoe'rao kwine' rawe' na'. 30Dios na' ba none' lli'o txhen Xanllo Jesucriston', na' dan' nak Criston' lli'o txhen na', napllo yel si'n ke Diosen', na' nakllo be'nn wen rao Diosen', na' nakllo yall rao Le'en, na' nakllo be'nn ba basrá Dios. 31Ke len na' xti'll Dios dan' nyojen nen: “Bi llaya'l yeyoe'rao kwinllo, Xanllo na'n llaya'l wayoe'raollo.”

will be added

X\