Tito 2

1Pero li'ilu Tito, uze'te' bee bene tucu nú neca Stichia' Diose. 2Uze'te' bee niyu enu unguxu nú huañi nze'ca beella, nú ri'i beella elliebacu' nú sibi' para nú lu'cu bee bene ula'na lubeella. Nu riala nú chenala beella Stichia' Diose tucu nú rialane, nu zeca beella bee sa' beella, cuna nú riqui' beella lu xitse nú seca beella. 3Le'ca scua bee una'a enu unguxu rqui'ña nú huañi beella tucu nú riala nú huañi bee bene' Jesucristo. Nu la yala nú aca niquichia' beella, nula aca beella uniqui. Rqui'ña nú zete' beella lubee bene nú xa huañi nze'ca bee bene, 4cuna nú nibeella bezete' lubee una'a enu nere'ne'lá, nú zeca beenchu niyu' beenchu cuna bee endu' beenchu, 5nú huañi nze'ca beenchu, cuna nú ri'i beenchu elliebacu' nze'ca, cuna nú ri'i ucu beenchu ni'i beenchu cuna nú aca nze'ca beenchu, nu zucu' beenchu stichia' niyu' beenchu para nú lecati ni cundra Stichia' Diose. 6Le'ca scua li'ilu Tito, uni' bezete' lubee niyu enu nere'ne' nú huañi nze'ca beei. 7Uri'i nú acalu tucu ejemplu lubeei para nu lañi' beei xa nehuañilu, nu scua ri'i beei lunú neca nze'ca. Chenu sete'lu li'ibeei, uze'te' nze'ca li'ibeei tucu nú rialane, 8cuna puro bee bedichia' nze'ca, che lecaxi ricu'quiya bee bene li'ilu, nu scua tu' titse bee bene enu rri'i cundra lia'ahua xne lecaxi llela' beei nú ricu'quiya beei lia'ahua. 9Le'ca du'lu ana arqui' bee bene enu rri'i riña' stucu bee bene nú zucu' beei ye nú rni patron' beei, cuna nú aca nze'ca beei nu la zucu' ru'u beei lubeella. 10Nu la cachi'beei bee stene' bee patron'beei, ri'itsia beei riña' tucu nú la nchiñi nú necha neca elliebacu'beei, para nú lañi' ye bee bene nú xa nehuañi beei nu chiqui' ñia neca bedichia' nze'ca' Pa'ahua Diose enu utsila'a lia'ahua. 11Xne ulube'la Diose nú ñia necanu, nu equie nú ñia necanu scua, nu' modo tsila'anu ye bee bene. 12Nu scua rria'ahua beya' nú rqui'ña nú tsana' arquia'ahua beenú necha neca, cuna ye beenú lecaxi zibi' nú niarquia'ahua ria'ahua lu iliulabequie' para nú huañi nze'ca'ahua nu ria'ahua lunú neca nze'ca, tucu nú niarqui' Diose nú huañia'ahua, 13diqui nú nellua'quie'ahua nú riña bichia nú ñia neca nú yalu stichia'nu tucu nú uninu lua'ahua nú nze'ta zeca Diose Pa'ahua Jesucristo cuna poder'nu, li'inu enu utsila'a lia'ahua. 14Li'inu ungutinu equie cuenda' stula'ahua nu utsila'anu lia'ahua lu ye bee dula, nu uquieenu arquia'ahua para nú aca'tsia'ahua bee bene'nu, cuna nú nu' ana arquia'ahua ri'ahua puro nú neca nze'ca. 15Ye nú unilá lulu uze'te' li'ibeei. La lliquilu ude'te' elliebacu' beei, nu cuna nú rnibiya'lu uni' lubeei nú huañi nze'ca beei para nú lecati huachu stichia'lu.

will be added

X\