Romanos 8

1Enze'e ye bee bene enu nzeli arqui' Jesucristo la zeca' bee bene ze'e castiya' Diose. Bee bene enu la nehuañia' lunú necha neca sino que rla'nalla nú huañilla tucu nú niarqui' Espíritu Santo nú huañilla. 2Xne lunú rnibiya' Espíritu Santo nú nzu cuna lia'ahua lunú neca tucu necatse'la'ahua cuna Jesucristo la nibiya' dula lua'ahua, nu le'ca la yala'ahua castiya' Diose. 3Lunú neca'ahua bene lá aca ley ari'i elietsa lua'ahua, ley nú udete' Diose lu Moisés. Pero nee uri'i Diose lunú né aca ley cua' ari'i. Li'inu uxe'lanu Lli'ñinu lu iliulabe quie' xi neca tucu bene para nú ungutinu equie stula'ahua, nu scua udixiunu equie cuenda' stula'ahua para nú leca' xunga nibiya' dula lua'ahua. 4Nee nehuañi'la'ahua lu Diose xi neca tucu bene enu sucu' ley, xne la nehuañia'ahua tucu nú niarqui'tsia'ahua sino que nehuañia'ahua tucu nú rnibiya' Espíritu Santo. 5Bee bene enu nehuañitsia lunú neca elliebacu', rri'itsialla elliebacu' nú ri'illa lunú niarqui'tsialla. Pero bee bene enu nehuañi tucu nú rnibiya' Espíritu Santo, máse nzucululla nú ri'illa lunú rnibiya' Espíritu Santo nú ri'illa. 6Nu lunú nzuculu bene nú rri'itsialla lunú necha neca, che nze'ta castiya nú zecalla, pero chenu nzucutsialu bene nú rri'illa tucunú rnibiya' Espíritu Santo che rlu'cu bene elunehuañi lu Diose nu la chenu arqui'lla. 7Bee bene enu nzuculutsia nú huañi tucu nú niarqui'tsia, li'ibeei necabeei enu la zucu' nú rni Diose equie nú la niarqui'beei nibiya' Diose lubeei nu le'ca la acabeei ri'ibeei tucu nú niarqui'nu. 8Enze'e bee bene enu nehuañi tucu nú niarqui'tsia, la yu' arqui' Diose xa rri'ibee nze'e. 9Pero li'ihua la nehuañihua lunú necatsia elliebacu'hua, sino que li'ihua nehuañihua tucu nú rnibiya' Espíritu Santo, tunu neli nú nehuañihua cuna Espíritu Santo' Diose, xne bene enu la nzu Espíritu Santo cuna li'i laca nze'e bene' Jesucristo. 10Pero tunu nehuañilahua cuna Jesucristo, lecaxi ri'i mase nú unitilu dula li'ihua. Nu nee nehuañilahua cuna Espíritu Santo nu nebacu'la Diose li'ihua nú la lu'cuhua dula. 11Nu tunu nehuañilahua cuna Espíritu Santo' Diose, li'inu enu uri'i nú uhuañi zeca Jesucristo lu eluti, che mase nú atihua, pero le'ca ri'i Diose nú huañi zeca cuerpo'hua lu eluti para nú lu'cuhua elunehuañi equie cuenda' Espíritu Santo nú nehuañi cuna li'ihua. 12Enze'e bee sa'a enu nzeli arquia'ahua Jesucristo, la yala nú huañia'ahua tucu nú niarqui'tsia'ahua. 13Xne tunu li'ihua nehuañihua lunú niarqui'tsiahua, che rialahua castiya'hua, pero tunu equie cuenda' Espíritu Santo nú nzu cuna li'ihua utsana' arqui'hua stulahua che lu'cuhua elunehuañi nú la laxua' lu Diose. 14Xne yebee bene enu sela nú rnibiya' Espíritu Santo' Diose lu, li'ibeella neca beella lli'ñi Diose. 15Xne lá yucuhua Espíritu Santo para nú lliquihua, xi xiqui tucu bene patron'lla sino que equie cuenda' Espíritu Santo necalahua lli'ñi Diose nu equie cuenda' Espíritu cua' rnia'ahua lu Diose: “¡Pa'ahua!” 16Nu le'ca equie cuenda' Espíritu Santo quie' nediya'ahua nú si'ahua nú neca'la'ahua lli'ñi Diose. 17Nu lunú neca'ahua lli'ñi Diose riala'ahua herencia nú liqui' Diose tucu nú riala Jesucristo, tunu neli nú riquia'ahua nú nehuana ze'ca'ahua tucu nú ulle'canu che nu' modo riña'ahua liñibe elu nzucunu. 18Nediya nze'caa nú liaxi nú nehuana se'ca'ahua nee, luquela nú seca eluxene nú atia'ahua liñibe. 19Nu hasta yebeenú ureche' Diose, chiqui' nzuquiene nú ala' uriñala bichia nú acachee nú tineca bee lli'ñi Diose. 20Xne iliulabe uchiñii lubeenú necha neca, pero lecaxi culpa'e, sino que Diose uzela nú ungae scua. Nu nee nzuquietsia iliulabe, 21nú la'ane lu beenú necha neca nu'lue, nu naa zecae tucu nú ñia nae chenu apenatsia uquixiee, tucu nú le'ca la'a bee bene' Diose lubee nú necha neca nu' lu iliulabequie'. 22Nu diquila nú nzuquie iliulabe nú riña bichia ze'e, lia'ahua nediya'ahua nú chiqui' nehuana seca iliulabe xi seca tucu una'a enu ala endu'. 23Nu la necane nú iliulabetsia seca scua sino que le'ca nua'ahua enu nchiñi Espíritu Santo arqui' xi neca tucu seña lunú liqui' Diose lua'ahua. Nu chiqui' nehuana se'ca'ahua diquila nú nelluaquie'ahua nú riña bichia nú acachee nú neca'ahua lli'ñi Diose, bichia chenu che'enu cuerpo'ahua nu liqui'nu stucu nú necuqui. 24Nediya'ahua nú scua acane nu nucua' nzuculua'ahua nú aca equie nú nzeli arquia'ahua nú utsila'ala'ahua, li'ihua nediya'hua nú tunu lunú nelluaquie'ahua nú aca ungalane, leca xiquie nú lluaquie'la'ahuane. 25Pero tunu nelluaquie'ahua nú aca lunú lasca' aca, che layala nú llaca'ahua lluaquie'ahua nú acane. 26Nu le'ca Espíritu Santo ri'i elietsa lua'ahua chenu la ria'ahua beya' xneca ria'ahua, xne nu' chenu laca'ahua nacua'ahua lu Diose tucu nú rialane. Nu chenu la ria'ahua beya' xneca nia'ahua lu Diose lunú niarquia'ahua nia'ahua, pero Espíritu Santo nediya' xa rria'ahua elliebacu', che li'inu see arqui'nu rnacu'nu lu Diose lu cuenda'ahua. 27Nu Diose, li'inu enu nu'lu arqui' bee bene, nediya'nu xi rnacu' Espíritu Santo lunu lu cuenda'ahua. Xne chenu rnacu' Espíritu Santo equie cuenda' bee bene' Diose, li'inu rnacu'nu lu cuenda' bee bene tucu nú niarqui' Diose. 28Lia'ahua nediya'ahua nú ye nú se'ca'ahua lu iliulabequie, zibi'i lua'ahua, lia'ahua enu se'ca'ahua Diose lia'ahua enu uri'i caso stichia'nu para nú ria'ahua tucu nú niarqui'nu. 29Nu hasta hua'tu nediya'la' Diose ti bee enu chili arqui' li'inu, nu ucañinu li'ibeella para nú huañi beella, nu acabeella xi neca lli'ñinu Jesucristo, para nú Jesucristo aca enu nibiya' lu ye bee bene enu neca lli'ñi Diose. 30Xne ye bee bene enu nediya' Diose nú chili arqui' li'inu, ucañinu li'ibeella nu ubixianu beella para nú aca beella bee bene'nu, nu ulu'cu cuendanu beella nú la lu'cubeella dula, nu uninu nú dete'nu eluxene lubeella liñibe. 31Nee nú nediya'la'ahua yebee nucua' lecaxi ri'i mase nú rri'i cundra bee bene lia'ahua, Diose ri'i elietsa lua'ahua. 32Necaa Diose lli'ñinu unguti equie cuenda' stula'ahua. Nu tunu uliqui'nu lli'ñinu unguti equie stula'ahua. ¿Xaquie nú la liqui'nu ye beenú liqui'nu lua'ahua equie cuenda' lli'ñinu? 33¿Ti aca xanabitsi lu cuenda'ahua nú neca'ahua bene enu rlu'cu dula ante Diose? Xne le'ca li'inu ubacu'nu lia'ahua nú la lu'cua'ahua dula. 34Lecati aca ni nú riala'ahua castiya, xne Jesucristo neca enu unguti para nú udixiunu equie cuenda' stula'ahua, nu la neca nucua'tsia sino que le'ca uhuañi zecanu lu eluti, nu nee nzucunu cue'tse Diose chube rnacu'nu lu Diose lu cuenda'ahua. 35Nu tucu nú seca Jesucristo lia'ahua lecati ri'i ana huachuu lia'ahua lunu. Pero ni' nú nehuana nzu arquia'ahua, urre nú nehuana se'ca'ahua, urre lunú xi rri'inuu bee bene lia'ahua, urre nú rlia'na'ahua, urre nú leca xucua'ahua, urre nú xiquia'ahua, urre lu eluti, lecaxi nú huachuu lia'ahua lunu. 36Lu ichi' Stichia' Diose rni: Equie nú necaru bee lli'ñilu, ye ye'e nzuquie eluti li'iru, rri'inu bee bene li'iru xi rri'inu beei bee sanchi enu nzula nú ati. 37Pero ni' tucu bee nucua' la ri'i ana lua'ahua xne rri'i Jesucristo elietsa lua'ahua, li'inu enu seca lia'ahua. 38Nediya nze'caa nu ni' eluti, nu ni' elunehuañi, nu ni' bee ángele, nu ni' bee benechiqui', nu ni' beelá bee enu rlu'cu nú rnibiya', nu ni' lunú reca, urre lunú aca, 39urre lunú nze'ta enza liñibe, urre liñi yuu, ni' tucue nu ni' stucu lunú ureche' Diose, lecaxi nu lecati aca huachuu lia'ahua lu eluseca' Diose equie cuenda' Jesucristo.

will be added

X\