Romanos 7

1Bee sa'a enu nzeli arquia'ahua Jesucristo li'ihua nediya'hua nú xneca neca ley, nú ley rnibiya' lubee bene diqui nú nehuañi bene. 2Necane xi neca tucu una'a enu nechia nú leca' modo chianchu stucu niyu rene diqui nú nehuañi niyu'nchu, pero tunu ati niyu'nchu leca ley nú cá nú chianchu stucu bese. 3Pero tunu nehuañisca' niyu'nchu nu yucunchu stucu niyu, nehuañinchu lu eluhuexe che. Pero tunu unguti niyu'nchu leca' ley nucá nú chianchu stucu niyu, nu la ri'inchu eluhuexe che. 4Le'ca scua bee sa'a enu nzeli arquia'ahua Jesucristo, equie nú unguti Jesucristo, ulaxu nú rnibiya' ley' Moisés luhua. Neequie necalahua bee bene' Jesucristo. Li'inu enu uhuañi zeca lu eluti, nu scua nu' modo nú ria'ahua tucu nú niarqui' Diose nú ria'ahua. 5Xne chenu uhuañia'ahua tucu nú uniarqui'tsia'ahua a'la máse uri'i ley nú uya'la elliebacu'ahua para nú ria'ahua lunú la nibiya' ley nú ria'ahua nu scua uria'ahua nú necha neca nú riala aze'ca'ahua castiya. 6Pero nee neca xi neca nú ungutila'ahua lu cuenda' ley, nee nú la nibiya' ley lua'ahua nu lunú uche'ela modo nú nehuañia'ahua, nee nu' modo nú ria'ahua lunú niarqui' Diose nú ria'ahua equie cuenda' Espíritu Santo nú nzu cuna lia'ahua. Nu la necane equie nú nzenala'ahua nú rnibiya' ley. 7La nia luhua nú la neca nze'ca ley, xne lacane esquie. Xne tunu leca ley lá aria'a beya' nú xi neca dula, nu leca xunga aria'a beya' nú dula neca chenu rle'lu stene' sa'lu, tunu leca nú rni ley: “La le'lu stene' sa'lu.” 8Pero chenu uri'á beya' nú la neca nze'ca nú rle' bene stene' sa'lla che máse udala dula nú rri'á equie cuenda' ye nú rlea lu'cua nú rlu'cu stucu bene. Tunu leca ley lá ari'i bee bene beya' xi neca dula. 9Ante nú chulua ley ulle'caa nú nehuañi nze'caa. Pero chenu uyulua ley uri'á beya' nú rri'á dula nu equie cuenda' dula cua' necaa xi neca tucu bene enu unguti. 10Sibi' ley para nú ri'i bee bene beya' xneca riala nú huañilla. Pero para li'á sibi'tsia ley para nú atia. 11Xne hua'tu uzequienu dula li'á nú nu' modo ri'á ye nú rnibiya' ley pero le'ca lu cuenda' ley cua' uri'á beya' nú riala zecaa castiya. 12Pero la necane nú necha neca ley xne Diose udu' ley, nu ye nú rni ley le'ca Diose udu'e, nu neca nze'cae, nu neli rnii. 13La lu'cu ley culpa nú atia, sino que dula neca nú uzequienu li'á para nú atia nu equie cuenda' ley cua' uri'á beya' nú necha neca nú rri'i bene dula. 14Nediya'ahua nú equie cuenda' Espíritu Santo nze'ta ley nú rni equie cuenda'nu. Pero lunú necaa bene, enze'e siempre rri'i dula ana lua. 15La ri'á beya' xi se'ca xne lunú niarquia ri'á la ri'á, sino que lunú laniarquia ri'á enze'e neca nú rri'á. 16Nu chenu rri'á lunú la niarquia ri'á, scua rri'á beya' nú neca nze'ca ley, xne lu cuenda' ley rri'á beya' xi rri'á. 17Nu la ri'i riña'a lunú la yala ri'á, sino que rri'ine equie cuenda' dula nú nu' arquia. 18Xne lunú necaa bene, nediyaa nú lacaa bene nze'ca, mase nú niarquia ri'á nú neca nze'ca, pero la ri'á ana nú ri'á scua. 19La ri'á ana ri'á nú neca nze'ca niarquia ri'á, sino que a'la lunú necha neca nú la niarquia ri'á enze'e rri'á. 20Neequie tunu rri'á lunú la niarquia ri'á, la neca nú rri'i riña'ne, sino que necane equie cuenda' dula nú nu' arquia enze'e rri'á scua. 21Pero nee rri'á beya' nú máse niarquia ri'á nú neca nze'ca, pero chu rri'i dula nú nu' arquia ana lua. 22Chiqui' riu' arquia zucua nú rnibiya' Diose. 23Pero nu' tucu nú rcaa nú ri'á scua, nu nucua' neca dula, xne nu'sca' dula arquia. 24¡Cue'curua! ¿Ti tsila'a li'á lu castiya nú zecaa equie dula nú rri'á nú necaa bene? 25¡Pero che'tsalá Diose nú equie cuenda' Jesucristo utsila'anu li'á lu castiyacua'! Xne mase rri'á elliebacu' nú ri'á puro nú rnibiya' Diose, pero lunú necaa bene, rri'i dula ana lua.

will be added

X\