Romanos 5

1Nu equie nú nzeli arquia'ahua Diose la lu'cua'ahua dula lunu, nu equie cuenda' Jesucristo ñia nzu arqui' Diose lua'ahua. 2Xne lunú nzeli arquia'ahua Jesucristo nu' modo xneca riña'ahua lu Diose, nu nzuta' arquia'ahua lunú nzeli arquia'ahua nu ñia nzu arquia'ahua, nu riña'ahua lu ellie'e elu nzucu Diose liñibe. 3Nu la necane equie cuenda'tsia nucua' nú ñia nzu arquia'ahua sino que le'ca equie nú nehuana se'ca'ahua, xne nediya'ahua nú chenu nehuana se'ca'ahua másela rlu'cua'ahua paciencia. 4Nu lunú rlu'cua'ahua paciencia aca'ahua riquia'ahua lunú xi ze'ca'ahua, nu equie nú rriquia'ahua nzucu lua'ahua nú riña'ahua lu Diose. 5Nu lunú nzucu lua'ahua nú riña'ahua lu Diose neli aca nucua', xne nediya'ahua nú seca Diose lia'ahua xne nzu Espíritu Santo nú uliqui'nu cuna lia'ahua. 6Ante nehuañia'ahua sin nú ria'ahua beya' xneca tsila'a Diose lia'ahua lu stula'ahua, pero chenu uriña bichia nú ube'ta Jesucristo unguti equie cuenda'ahua nú neca'ahua bene enu rlu'cu dula. 7Nediya'ahua nú neriña' nú ti zela ati equie cuenda' stucu bene, pero ni' lu cuenda' tucu bene enu rri'i nze'ca urre nu' ti zela ati equie cuenda' stucu bene nze'ca. 8Pero ulube' Diose nú chiqui' secanu lia'ahua enze'e unguti Jesucristo equie cuenda'ahua chenu uria'ahua puro dula. 9Nu nee nú la lu'cua'ahua dula equie cuenda' rene nú uti'chia Jesucristo lu cruse chenu ungutinu, neli nú la zeca'ahua castiya' Diose equie cuenda'nu. 10Xne chenu rri'sca'ahua lunú la yu' arqui' Diose che uxe'lanu lli'ñi e'cunu lu iliulabe unguti lu cruse equie cuenda'ahua nu scua uyala arqui'nu lua'ahua enzaláquie' nee nú uyala arqui' Diose lua'ahua. 11Nu nee nú nzu Jesucristo cuna lia'ahua, enze'e chiqui' ñia nzu arquia'ahua dete'ahua che'tsa lu Diose equie cuenda' Jesucristo enu rnibiya' lua'ahua, xne equie cuenda' li'inu uyala arqui' Diose lua'ahua. 12Scua necane xne equie cuenda' tucu bene uyu'u dula lu iliulabe, nu equie cuenda' dula uyu'u eluti, nú rati ye bee bene xne ye bee bene uri'i dula. 13Chenu lecasca' ley nú udete' Diose lu Moisés añinu'ca dula lu iliulabe, pero lunú leca ley hua'tu enze'e la ri'i caso bee bene nú rri'illa dula. Che leca modo zeca bene castiya tucu nú rnibiya' ley. 14Pero añica unguti beella hasta tiembu' Adán nu hasta tiembu' Moisés, añinzuca nú lá ri'i beella sa' dula nú uri'i Adán, nu tiembu ze'e unga Adán tucu seña equie cuenda' tucu bene enu nzu nú nze'ta. 15Nu laca iguale dula nú uri'i Adán, cuna nú chiqui' rri'i nze'ca Diose lubee bene, nu equie cuenda' dula nú uri'i tucu bene ye bee bene rati, pero le'ca equie cuenda' tucu bene huaxi bee bene tsila'a Diose, nu li'inu necanu Jesucristo, nu equie cuenda'nu lia tsila'a Diose lia'ahua. Nu lunú uri'i Jesucristo másela seca para huaxi bee bene. 16Laca iguale dula nú uri'i Adán cuna lunú chiqui' rri'i nze'ca Diose. equie cuenda' tucutsia dula, uyu'u castiya para bee bene pero equie cuenda' Jesucristo nu' modo tsila'a bee bene mase nú uri'illa huaxi dula. 17Equie cuenda' dula nú uri'i Adán, uyu'u eluti nú rati ye bee bene, pero uri'i Diose ana lunú uri'i Adán equie nú uri'i Jesucristo nú sila'a ye bee bene enu seca nú equie cuenda' Jesucristo la lu'cua'lla dula ante Diose nu lu'culla nú huañilílla lu Diose. 18Nu scua tucu nú uyu'u eluti xi neca castiya para ye bee bene equie dula nú uri'i Adán, le'ca esquie lunú uri'i nze'ca Jesucristo tsila'a bee bene nu huañilí bee bene liñibe lu Diose. 19Xne lunú né zucu' tucu bene nú uni Diose ye bee bene rlu'cu dula, pero le'ca scua lu cuenda' tucu bene enu uzucu' nú uni Diose nebacu' Diose bee bene nú la lu'cu bene dula ante lunu. 20Udete' Diose ley'nu lu Moisés para nú lu cuenda' ley cua' ri'i bee bene beya' nú rri'i beei dula, nu elu chiqui' uri'i bee bene dula másela uri'i nze'ca Diose nu uri'inu perdona bee bene ze'e. 21Hua'tu unibiya' dula lubee bene nu equie cuenda' dula cua' rati bee bene, pero nee lunú chiqui' seca Diose lia'ahua equie nú chiqui' nze'canu nebacu'nu lia'ahua nú la lu'cua'ahua dula, nu liqui'nu nú huañilia'ahua liñibe lu Diose equie cuenda' Jesucristo.

will be added

X\