Romanos 4

1Li'ihua nediya'hua nú xneca unga lu cuenda' Abraham bene'ahua enu udetela, li'illa enu rlutila uquie seña nú rquie bee bene Israel. 2Tunu aca nebacu' Abraham nú la lu'culla dula equie beenú uri'illa, che nu' modo nú azucu' ayalla li'illa lubee bene, pero lu Diose leca modo ari'illa scua. 3Pero Stichia' Diose rni: “Xne uyali arqui' Abraham Diose, enze'e ubacu' Diose li'illa xi neca tucu enu la lu'cu dula.” 4Chenu rri'i tucu bene riña', dimi nú riaxulla la necane nú lia rati'llae sino que rri'illa anae equie riña' nú uri'illa. 5Pero para nú ri'i Diose perdona stula bee bene, leca modo nu ni bene nu aca perdonalla equie beenú uri'illa, sino que equie nú uchili arqui' bene Jesucristo enze'e ubacu' Diose li'illa nú la lu'cua'lla dula. 6Le'ca uni David lu cuenda' bee bene enu uri'i Diose nú la lu'cu'a dula, nu la necane equie beenú xi uri'illa, 7nu unilla: Ñia neca lu cuenda' bee bene enu uri'ila Diose perdona stula, nu uchilalanu stula. 8Ñia neca lu cuenda' bee bene enu nebacu'la Diose, nú la lu'cua' dula. 9Lá ni David nucua' para bee bene Israel enu nequie seña, sino que unilla bee bedichia' quie' lu yebee bene. Tucu nú uni'la'ahua nú Diose ubacu'la Abraham nú la lu'culla dula xne uchili arqui'lla li'inu. 10Nu chenu ubacu' Diose li'illa la lu'culla seña nú rquie bee bene Israel, ante nú quie señacua' Abraham nebacu'la Diose li'illa nú la lu'culla dula. 11Nu chenu ubacu' Diose Abraham nú la lu'culla dula, che luze'elá uquie señacua' li'illa, xne señacua' neca nú nebacu'la Diose li'illa nú la lu'culla dula equie nú uchili arqui'lla li'inu. Scua neca Abraham pa' ye bee bene enu nzeli arqui' Diose, mase nú la nequie seña nú rquie bee bene Israel li'illa, pero lunú nzeli arqui'beella Diose nebacu'lanu li'ibeella, nú la lu'cu beella dula. 12Nu le'ca neca Abraham pa' bee bene enu nequie seña nú rquie bee bene Israel, nu nzeli arqui'beella Diose tucu nú uyali arqui' Abraham, ante nú quie seña li'illa. 13Chenu ucuaqui u'na Diose lu Abraham cuna lubee bene enu nzeli arqui' Diose, tucu nú uyali arqui' Abraham nú dete'nu nú yucu beella iliulabe xi neca tucu erencia. Lá cuaqui u'na Diose nucua' lu Abraham, equie nú uzucu'lla nú rni ley, sino que necane lunú uchili arqui'lla Diose. 14Xne tunu bee enu sucu'tsia ley ati' erencia cua', lecaxi sibi' nú nzeli arqui' bee bene Diose, le'ca la zibi' nú ucuaqui u'na Diose lu Abraham che. 15Pero lacane scua, xne ley neca para nú dete' castiya bee bene pero elu leca ley leca modo nú ni bee bene nú la zucu' bene nú rni ley. 16Enze'e chenu ucuaqui u'na Diose lu Abraham nú dete'nu nú ucuaqui u'nanu lu ye bee bene enu nzeli arqui' li'inu, tucu nú udete'nue lu Abraham scua ucuaqui u'nanu lu Abraham xne uchili arqui'lla li'inu, nu la necane nú ucuaqui u'na Diose nucua' para bee bene enu sucu'tsia ley sino que necane para bee bene enu nzeli arqui' Diose, tucu nú uyali arqui' Abraham Diose, mase nu la chulu beella ley, nu scua Abraham neca pa' ye'ahua. 17Tucu nú rni lu ichi' Stichia' Diose lu cuenda' Abraham, elu rni: “Li'ilu acalu pa' huaxi bee bene iliulabe.” Nucua' neca nú ucuaqui u'na Diose lu Abraham, nu uchili arqui'lla nú uni Diose lulla, li'inu enu rri'i nú rehuañi bee benenguti nu rninu equie cuenda' beenú lecasca' lu iliulabe quie' xi neca nú nu'lane. 18Añinzuca nú nediya' Abraham nú leca modo nú lu'culla endu', pero chenu uni Diose lulla nú lu'culla endu' che ita uyali arqui'lla nú uni Diose lulla scua, neca Abraham “pa' ye bee bene”, enu nzeli arqui' Diose, tucu nú uni Diose lu Abraham: “Scua aca huaxi bee lli'ñilu.” 19Nu uyali arqui' Abraham nú uni Diose lulla nú lu'culla endu', nu nzalalla casi tucu ayu'u lana, nu unguxulalla nu le'ca esquie una'lla Sara, pero lá tsuchiucu arqui'lla lunú uni Diose lulla. 20Nu lá za' arqui'lla núla yalu tucu nú ucuaqui u'na Diose lulla sino que diquinu' arqui'lla uyali arqui'lla nú uni Diose lulla, nu udete'lla che'tsa lunu. 21Chiqui' nzuta' arqui' Abraham nú chiqui' reca Diose ri'i tucu nú ucuaqui u'nanu lulla. 22Enze'e nebacu'la Diose Abraham nú necalla tucu bene enu la lu'cu dula xne uchili arqui'lla li'inu. 23Nu elu rni nú Diose nebacu'la Abraham nú necalla tucu bene enu la lu'cu dula, lunú uyali arqui'lla li'inu, láninu lu cuenda'tsia Abraham, 24sino que le'ca uninu nucua' lu cuenda'ahua, xne nzelila arquia'ahua Diose, che nebacu'lanu lia'ahua nú la lu'cua'ahua dula, li'inu enu uri'i nú uhuañi zeca Jesucristo lu eluti. 25Jesucristo enu unguti equie stula'ahua nu uhuañi zecanu lu eluti nu equie cuenda' li'inu la lu'cua'ahua dula lu Diose.

will be added

X\