Romanos 3

1Nu, ¿xi sibi' nú neca bene bene Israel? ¿Nu xi sibi' nú rquie señacua' bene? 2Chiqui' neca equie nú neca bene bene Israel ye modo, xne rluti udete' Diose stichia'nu lubee bene Israel. 3Neequie la ri'ihua elliebacu' nú lunú nu' bee enu la chenala Stichia' Diose, chequie la tsalua' Diose stichia'nu tucu nú unilanu. 4Xne Diose leca xunga xe'enu stichia'nu, mase nú ye bee bene iliulabe nequichia' pero Diose leca xunga nequichia', tucu nú rni tucu luhuare lu stichia'nu: Yebee bene lañi' nú li'ilu sa'alulu stichia'lu, nu lecati niquiya xi niquiya lu cuenda'lu. 5Pero nu' bee bene iliulabe enu rri'i elliebacu', nú equie cuenda' dula nú rri'illa, scua rlube'lla nú ñia neca Diose, nu ¿xiquie nú necha neca Diose nu rdete'nu castiya bee bene? 6¡Lacane scua! Xne tunu necha neca Diose, ¿xneca modo nú hualunue lu cuenda' bee bene iliulabe che? 7Xne te zucua'ahua nú tunu beenú la neli rnia sibi'i para nú lu'culá bee bene ula'na lu Stichia' Diose, che leca' modo nú ni Diose nú rlu'cua dula. 8Nu le'ca teri'ila'ahua beenú necha neca para nú cha nze'cae lu cuenda'ahua, tucu nú rta' quiya bee bene li'á, nú setea bee bene, la chenu arquia'ahua nucua', xne Diose dete' castiya bee bene enu rni scua, nu scua riala zeca beei. 9Bueno che, ¿xie' lianú neca'ahua bee bene Israel nú neca'ahua bene nze'ca luquela bee bene enu laca bene Israel la? ¡Pero la acane esquie! Xne sia bee bene Israel nu sia bee bene enu laca bee bene Israel rlu'cu dula. 10Tucu nú rni lu ichi' Stichia' Diose elu rni: Leca ni' tucu bene nze'ca, pero ni' tuculla leca. 11Ni' tucu bene la yene', nu ni'tucu lecati la'na Diose. 12Yebee bene utsana' arqui' Diose, nu yella rri'illa nú necha neca, lecalí ti rri'i nú neca nze'ca, leca ni' tuculla. 13Xi neca tucu eluhua nú na'la ru'u neca bene, nú puro nú laca neli rni bee bene, nu bee bedichia' nú rni bee bene neca xi neca benenu' be'la. 14Puro bedichia' nú necha see xiu'u ru'ubeei, nu puro bee bedichia' chi'qui' rnibeei. 15Nu nzucutsia lubeei nú útibeei bene. 16Nu catse elu nzuebeei puro nú necha neca rri'ibeei, nu nehuana seca bee bene rri'ibeei. 17La chulubeei nú huañi nze'ca beei tucu nú rialane para nú nzuxe arqui'beei. 18Nu ni' la za' arqui'beei nú lliquibeei Diose. 19Nediya'ahua nú ye nú rni ley necane para bee bene enu sucu'e, para nú lecati ni nú la chulu dula, sino que yebee bene ri'ibeya' nú rlu'culla dula ante Diose. 20Xne la neca nú sucu'tsia bee bene ye nú rni ley nú secalla nú la lu'culla dula lu Diose sino que ley cua' sibi' para nú ri'i bee bene beya' nú rlu'culla dula. 21Pero nee ulube'la Diose inziu'nu lua'ahua para nú xneca ya'na nze'ca'ahua lu Diose la necane equie nú ria'ahua lunú xa rnibiya' ley sino que equie cuenda' ley cua', nu equie cuenda' nú uquie'e bee profeta' Diose, 22rria'ahua beya' nú Diose rlu'cu cuenda lia'ahua, nú la lu'cua'ahua dula equie nú nzeli arquia'ahua Jesucristo, scua rri'inu luyebee bene enu nzeli arqui' li'inu. 23Xne yebee bene rlu'cu dula, nu lecati enu la lu'cu dula ante Diose. 24Pero lunú chiqui' nze'ca Diose, enze'e uri'ilanu perdona ye stula'ahua, sin nú dixiu'ahua lunu, sino que Jesucristo udixiula equie cuenda' stula'ahua chenu ungutinu lu cruse. 25Diose uxe'la Jesucristo lu iliulabe para nú equie cuenda' rene'nu nú uti'chianu ri'inu perdona bee bene iliulabe, nu neca nucua' para bee bene enu chili arqui' Jesucristo, scua rlube' nú ye nú rri'i Diose neli necane. Nu tunu hasta hua'tu lá ri'inu elu usticia equie bee dula nú rlu'cu bee bene, necane lunú rlu'cu arqui'nu bee bene. 26Para nú nee nu' modo lube'nu lubee bene nú ñia necanu nu para nú ri'i bee bene beya' nú li'inu rri'inu tucu nú necane enze'e rri'inu perdona stula bee bene enu nzeli arqui' Jesucristo. 27Nee ¿xi equie zucu' aya'ahua lia'ahua? Leca xine, xne la necane equie cuenda' nú sucua'ahua nú rni ley nú ri'i Diose perdona lia'ahua sino que necane nú nzeli arquia'ahua Jesucristo. 28Enze'e nediya' nze'ca'ahua nú rri'i Diose perdona stula bee bene equie nú nzeli arqui' bee bene Jesucristo nu lanecane equie cuenda' nú zucu' bee bene nú rni ley. 29¿Xie' Diose necanu Diose lubee bene Israel tsia? ¿Nu lacanu Diose lubee bene enu laca bee bene Israel chela? Pero li'á nia luhua nú li'inu necanu Diose luye bee bene iliulabe. 30Xne nu' tucutsia Diose, nu li'inu rri'inu perdona bee bene enu nzeli arqui' Jesucristo, sianu rlu'culla seña nú rnibiya' ley nú rquie bee bene Israel, urre la lu'culla seña cua'. 31La ri'ihua elliebacu' nú rluachu'ahua ley equie nú nzeli arquia'ahua Jesucristo sino que equie nú nzeli arquia'ahua li'inu sucua'ahua nú rni ley.

will be added

X\