Romanos 2

1Enze'e la yala nú tsequichia'lu bee bene, tunu rri'ilu scua sequichia'lu le'catsia li'ilu, xne rri'ilu tucu nú rri'ibeei. 2Pero lia'ahua nediya'ahua nú tucutsia Diose rlualu tucu nú necane chenu rdete'nu castiya lubee bene enu rri'i beenú necha neca, nú unila luhua. 3Nu li'ilu enu sequichia' nú xneca rri'i bee bene nu le'ca esquie rri'ilu, la ri'ilu elliebacu' nútia tsila'alu lu castiya' Diose. 4Li'ilu rluachulu nú ñia rri'i Diose lulu, rluachulu lunú rua'a arqui' Diose li'ilu, nu rlu'cu arqui'nu li'ilu nu la ri'ilu beya' nú lunú rlu'cu arqui'nu li'ilu scua. necane nú rlu'culu tiempo nú che'e arqui'lu lu stulalu. 5Pero li'ilu chiqui' nzitilu nu la niarqui'lu che'e arqui'lu lu stulalu, nu le'catsia li'ilu rri'ilu nú recahuaxilá stulalu para bichia chenu dete' Diose castiya bee bene nu hualu Diose lu cuenda' bee bene li'inu enu rlualu tucu nú necane. 6Bichia ze'e dete' Diose lunú riala cada tucua bene lunú xneca uri'illa. 7Nu bee bene enu la tsana' arqui' nú rri'i nze'ca nu rla'na eluxene nú nu' liñibe, nu rla'na nú huañi nze'ca lu Diose para nú lu'cu bee nze'e cuerpo nú la nitilua' nu dete' Diose elunehuañi nú leca xunga laxu lubee nze'e. 8Pero bee bene enu la zucu' Stichia' Diose chiqui' rlenu lubee nze'e nu dete'nu castiya beei, xne luhuare nú chenalabeei stichia'nu nú neli neca, nzenalabeei inziu nú necha neca. 9Chiqui' nehuana zeca beei nu cuu arqui'beei lunú rri'i beei nú necha neca, sia bee bene Israel nusia bee bene enu la neca bee bene Israel. 10Pero yebee bene enu rri'i nú neca nze'ca ñia nzu arqui' Diose lubeei, nu rri'inu nú la chenu arqui'beei nu chu'ubeei liñibe, sia nú necabeei bee bene Israel nu sia nú lacabeei bee bene Israel. 11Xne teriallu rri'i Diose tucu nú necane luye bee bene. 12Yebee bene enu la chulu ley' Diose nú udete'nu lu Moisés nu rri'i dula, la chiulue lu cuenda'lla tucu nú rni ley cua', pero ye bee bene enu nu'lu ley cua', tucu nú rni ley cua' esquie chiu'ulue lu cuenda'lla. 13Xne la neca lunú riene'tsia bee bene ley cua' nú la lu'culla dula lu Diose sino que bee bene enu sucu' nú rni ley cua' bee nze'e neca enu la lu'cu dula lu Diose. 14Pero bee bene enu la neca bee bene Israel nu rri'i nú neca nze'ca sin nú chulubeei ley cua', nu rri'ibeei tucu nú rni ley cua' sin nú chulubeei, sino que elliebacu' e'cubeei xiu'u nú neca ley' beei, 15xne lunú xneca nehuañihua rlube' nú elliebacu'hua xiu'u ta nú neca nze'ca nu ta nú la neca nze'ca rri'ihua, luhuare nú rlu'cuhua ley cua', nu le'ca mismo li'ibeei ri'ibeei beya' chenu rri'i nze'cabeei urre chenu la ri'i nze'cabeei. 16Scua aca bichia chenu hualu Diose lu cuenda' ye beenú a'chi' rri'i bee bene equie cuenda' Jesucristo tucu nú rni stichia'nu nú rixiule'a. 17Nee li'ihua enu neca bee bene Israel, nelliñiahua nú necahua bee bene' Diose nu cuna nú recahua ley nú udete' Diose lu Moisés. 18Nu rnihua nú nediya'hua xa niarqui' Diose nú huañihua nu equie cuenda' ley'nu rri'ihua beya' ta nú neca nze'ca ri'ihua. 19Nu secahua nú acahua nihua lubee bene enu laca ley cua', cuna lubee bene enu lachulu Stichia' Diose. 20Secahua nú li'ihua acahua zete'hua bee bene enu lecalí xi reca cuna bee bene enu lle'natsia reca, xne equie cuenda' ley cua' recahua nu nu'luhua ye nú neli neca. 21Pero scua tucu nú nehuañihua, ¿xiquienú mejora la zete'xuhua li'ihua nú xneca huañihua luhuare nú rnihua lubeelá bee bene nú xneca huañi beei? Xne li'ihua rnihua nú la neca nze'ca nú ri'i bene eluhuana', ¿nu xiquie nú rri'ihua eluhuana'? 22Rnihua nú la neca nze'ca nú lu'cu niyu stucu una'a nu la lu'cu una'a stucu niyu, ¿nu xiquie nú rri'ihua scua? Le'ca rana arqui'hua bee diose enu ureche' bee bene nu, ¿xiquie nú rcachi'hua liñi indu elu nchiucu' bee diose cua'? 23Chiqui' nelliñiahua nú recahua ley pero sa'na netúhua Diose equie nú la zucu'hua nú rni ley. 24Enze'eca rni lu ichi' Stichia' Diose: “Bee bene enu laca bee bene Israel se'ta beei Diose equie cuenda' nú rri'ihua.” 25Neli nú sibi' nú rquie seña elunecachi' bee niyu, tunu zucu' bee bene ley nú udete' Diose lu Moisés, pero tunu la zucu' bee bene tucu nú rni ley cua' lecaxi zibi' nú nequie seña elu necachi' bee bene che. 26Pero tunu tucu bene enu la nequie señacua' elu necachi', nu sucu'lla tucu nú rnibiya' ley, necalla xi neca tucu bene enu nequie seña, mase nú la nequie señalla. 27Nu bee bene enu la chulu ley' Diose nu sucu' stichia'nu nu nehuañi xi nehuañi enu nu'lu ley, che mase nú la nequie señalla tucu nú rnibiya' ley, pero lunú nu'lulla Stichia' Diose, che lunú xneca nehuañilla ri'ihua beya' nú la nehuañihua tucu nú riala nú huañihua, equie nú la ri'ihua tucu nú rnibiya' ley' Diose mase nú nu'luhua ley cua' nu nequie señahua. 28Xne la neca lunú rala bene lu iliu Israel nú necalla bene Israel, nu la neca lunú nequie señalla nú necalla bene Israel ante Diose. 29Sino que enu neli neca bene Israel neca bee enu diquinu' arqui' sucu' stichia'nu nu la neca nú nequietsia señalla, nu ni' nú sucu'lla beelá bee custumbre nú rlu'cu bee benecua', sino que necane nú nzu Espíritu Santo cuna bee bene, nu bee bene enu nehuañi scua Diose neca enu sucu' aya li'illa, nu la neca bene enu sucu' aya li'illa.

will be added

X\