Romanos 16

1Nee nú nza Febe lachihua una'a enu neca sa'ahua enu nzeli arqui' Jesucristo, nu sibi'lla li'ñi Indu nú nzucu eyeche Cencrea. 2Uyucu nze'cahualla lu cuenda' Jesucristo, tucu nú riala nú ria'ahua lubee sa'ahua enu nzeli arqui' Jesucristo. Le'ca uri'ihua elietsa lulla lu xitse nú rqui'ñalla, xne chiqui' uri'illa elietsa lu huaxi bee bene nu le'ca uri'illa elietsa lua. 3Uri'ihua saludar Aquila cuna una'lla Priscila, li'ibeella enu rri'i elietsa lua, nú rixiule'eru stichia' Jesucristo. 4Li'ibeella enu hasta uniarqui' ati equie cuendaa para nú la atia, enze'e rdetea che'tsa lubeella. Nu la necane nú li'itsia rdetea che'tsa lubeella. Le'canu bee sa'ahua enu nzeli arqui' Jesucristo enu laca bee bene Israel rdete' che'tsa lubeella. 5Uri'ihua saludar bee sa'ahua enu nzeli arqui' Jesucristo, li'ibeella enu riete'sa' ni'i Priscila nu Aquila uri'ihua saludar Epeneto enu rquietea, enu rlutilá uchili arqui' Jesucristo lu iliu Asia. 6Uri'ihua saludar María, li'illa enu chiqui' uri'i elietsa luhua. 7Uri'ihua saludar bee bene lachia Adrónico nu Junias, enu ullutsenua ni'cu'. Nu chiqui' seca bee Apóstol li'ibeella, nu rlutilá beella uchili arqui'beella Jesucristo luquela li'á. 8Le'ca uri'ihua saludar bene enu lee Amplias enu rquietea enu chiqui' se'ca, lunú necaru bene' Jesucristo. 9Uri'ihua saludar Urbano enu rri'i elietsa lua nú sibi'a lu Jesucristo. Le'ca uri'ihua saludar bene enu rquietea lee Estaquis. 10Uri'ihua saludar Apeles enu ulube' nú neli nzeli arqui' Jesucristo, nu le'ca uri'ihua saludar familia' Aristóbulo. 11Uri'ihua saludar bene lachia enu lee Herodión, nu le'ca uri'ihua saludar familia' Narciso, li'ibeella enu le'ca nzeli arqui' Jesucristo. 12Uri'ihua saludar Trifena cuna Trifosa, bee una'a enu sibi' lu Jesucristo. Le'ca uri'ihua saludar Pérsida, una'a enu nediya'ahua nú chiqui' uzibi' lu Jesucristo. 13Uri'ihua saludar Rufu, enu neli nzeli arqui' Diose nu le'ca uri'ihua saludar na'lla, bene enu se'caa tucu nú se'caa naa. 14Uri'ihua saludar Asíncrito, nu Flegonte, Hermas, Patrobas, Hermes cuna beelá bee bene enu nucua'a cuna li'ibeella enu le'ca nzeli arqui' Jesucristo. 15Uri'ihua saludar Filólogo, Julia nu Nereo nu cuna zanalla, nu le'ca uri'ihua saludar Olimpas cuna beelá bee bene enu nucua'anu beella, enu le'ca nzeli arqui' Jesucristo. 16Nu li'á nia luhua: Nú uni'hua Diose lubee sa'hua tucu nú riala nú ri'ihua, nu ca'a yebee sa'ahua enu nzeli arqui' Jesucristo xe'labeella saludo luhua. 17Bee sa'a enu nzeli arquia'ahua Jesucristo zequiaa nu nacua luhua, nú bi'yahua li'ihua lubee bene enu rri'i nú rle'esa'a bee bene, nu sequienubeei bee bene. Xne urene sete'beei bee bene luquelá nú ungahua nu la ri'icasohua beei. 18Xne li'ibeei la zibi'beei lu Jesucristo, nu li'ibeei rri'ibeei lunú niarqui'tsiabeei, nu cuna bee bedichia' nú ñiase nu cuna bee bedichia' nze'ca nú rnibeei rri'ibeei ana bee bene enu la chulu Stichia' Diose, urre bee bene enu apena uchili arqui' stichianu. 19Pero yebee luhuare nediya' bee bene nú neli sucu'hua Stichia' Diose nu nzenalahuane nu ñia nzu arquia, nu niarquia nú cua'atsiñahua ri'ihua nú neca nze'ca nu ubi'yahua li'ihua para nú la ri'ihua nú necha neca. 20Diose enu rri'i nú nzuxe arquia'ahua li'inu ri'inu elietsa luhua para nú la ria' beze'lu ana luhua nú ria'ahua dula nu Jesucristo enu rnibiya' ri'i nú cha nze'ca lu cuenda'ahua. 21Timoteo enu rri'i elietsa lua, nú rixiule'eru Stichia' Diose xe'lalla saludo luhua, le'ca esquie bee bene lachia enu lee Lucio, nu Jasón, nu Sosípater xe'la saludo luhua. 22Tercio enu rquie'e stichia'a lu carta quie' le'ca xe'lalla saludo luhua equie cuenda' Jesucristo. 23Le'ca xe'la Gayo saludo luhua, nu ni'lla nzucua'a nu le'ca sana'lla ni'lla riete'sa' ye bee sa'ahua enu nzeli arqui' Jesucristo. Nu Erasto enu neca Tesorero eyeche quie' cuna sa'ahua enu nzeli arqui' Jesucristo lee Cuarto xe'labeella saludo luhua. 24Nu Jesucristo ri'i nú cha nze'ca lu cuenda' yehua. Amén. 25Dete'ahua che'tsa lu Diose xne rri'inu elietsa luhua, nú nze acaláhua nu nzeri'iláhua beya' lunú nzuta' arqui'hua lu bedichia' nze'ca' Jesucristo, tucu nú uzetela li'ihua nú xneca tsila'ahua, xne scua neca elliebacu' Diose hasta chenu lasca' quixie iliulabe, elliebacu' nú lá ri'i bee bene beya' desde chenu uquixie iliulabe. 26Pero nee nediya'la'ahua elliebacu' Diose nu uri'ila'ahua beya' equie cuenda' ichi' nú uquie'e bee profeta tucu nú unibiya' Diose lubeella enu rlu'cu elunehuañi nú la laxu nu ye bee luhuare riene' bee bene Stichia' Diose, nú uquie'e bee profeta para nú chili arqui' bee bene Jesucristo nu zucu' bee bene stichia'nu. 27Tucutsia Diose enu reca yeene. ¡Chiqui' riala nú lu'cua'ahua ula'na lunu, ye tiembu equie cuenda' Jesucristo! Amén.

will be added

X\