Romanos 15

1Lia'ahua enu nzuta' arquia'ahua lunú nzeli arquia'ahua Jesucristo rqui'ña nú ria'ahua elietsa lubee bene enu lasca' tsuta' arqui' lunú nzeli arqui' Jesucristo luhuare nú ria'ahua lunú niarqui'tsia'ahua. 2Sino que ye'ahua rqui'ña nú la'na'ahua nú ñia tsu arqui' bee sa'ahua. Nu rqui'ña nú ria'ahua lunú seca beella nú neca nze'ca, para nú ria'ahua elietsa lubeella nú nzeri'ilábeella beya' xneca riala chenala beella inziu' Diose. 3Xne ni' Jesucristo né ri'i tucu nú niarqui'tsianu sino que unga tucu nú nequie lu ichi' Stichia' Diose elu rni: “Li'á uyucu'a ye bee bedichia' chi'qui' nú riala ni bee bene lulu.” 4Ye nú nequie lu ichi' Stichia' Diose hasta hua'tu nequiene para nú ria'ahua beya' xneca huañia'ahua, nu equie cuenda' Stichia' Diose nze'ta nú rlu'cua'ahua paciencia, nu la llaca'ahua telluaquie'ahua lunú nelluaquie'ahua nú atia'ahua. 5Diose enu rri'i nú rlu'cua'ahua paciencia, nu rri'i elietsa lua'ahua para nú la llaca'ahua, li'inu ri'inu elietsa luhua para nú huañihua nu aca tucunecatsehua cuna beelá bee sa'ahua tucu nú uri'i Jesucristo. 6Para nú yehua tucutse nihua bedichia' nze'ca lu Diose, pa' Jesucristo. 7Enze'e scua tucu nú uyucu Jesucristo li'ihua nú necahua bee bene'nu, le'ca scua uri'ihua lu ye bee sa'hua enu nzeli arqui' Jesucristo, equie nú rlu'cuhua ula'na lu Diose. 8Nia luhua nú ube'ta Jesucristo lu iliulabe para nú uzete'nu Stichia' Diose lubee bene Israel nu scua ube'tanu uzibi'nu lubeella che scua uyalu tucu nú ucuaqui u'na Diose lubee bene'ahua enu udetela nu scua unga achee nú Diose sí sa'alunu stichia'nu. 9Nu le'ca ube'ta Jesucristo lu iliulabe para nú equie cuenda'nu nu'bee bene enu laca bee bene Israel nibeella bedichia' nze'ca lu Diose xne rua'a arqui'nu li'ibeella, tucu nú nequie lu ichi' Stichia' Diose elu rni: Hasta lubee bene enu laca bee bene Israel nia nú ñia nze'calu, nu le'ca ulaa bee canto nu ñia ni lu cuenda'lu. 10Le'ca rni stucu luhuare Stichia' Diose: Li'ihua enu laca bee bene Israel, ñia utsu arqui'hua tucu nú ñia nzu arqui' bee bene Israel. 11Nu stucu luhuare Stichia' Diose rni: Ye bee bene enu laca bee bene Israel uni'hua bee bedichia' nze'ca lu Diose Pa liñibe. Cuna yebeelá bee bene iliulabe, uni'hua bee bedichia' nze'ca lunu. 12Le'ca uni profeta Isaías: Lu familia' Isaí chiu'u tucu bene enu nibiya' lubee bene iliulabe, nu hasta bee bene enu laca bee bene Israel chili arqui' li'inu. 13Diose enu rri'i elietsa lua'ahua nú nzeli arquia'ahua, ri'inu nú ñia nzu arqui'hua nu ri'inu nú nzuxe arqui'hua lubee sa'hua xne nzeli arqui'hua li'inu, nu equie cuenda' Espíritu Santo chiqui' nucua'aquiehua lunú liqui'nu lua'ahua. 14Bee sa'a enu nzeli arquia'ahua Jesucristo li'á nediyaa nze'caa nú rri'i nze'cahua lubee sa'hua, nu chiqui' recahua hasta rnihua bezete' lubee sa'hua nu sete'hua bee sa'hua. 15Añinzuca nú scua nu'bee luhuare lu carta quie' uquie'a bee bedichia' nú juerte rcu arqui'hua unia luhua nú xneca huañihua nu li'á rnia scua luhua equie cuenda' poder' Diose nú uliqui'nu lua. 16Para nú zibi'a lu Jesucristo nu ixiule'a bedichia' nze'ca' Diose lubee bene enu laca bee bene Israel para nú huañibeella tucu nú niarqui' Diose nú huañi beella, nu la lu'cu beella dula ante Diose equie cuenda' Espíritu Santo. 17Nu xiquie nú rni nze'caa lu cuendaa como bene' Jesucristo nú necaa equie nú sibi'a lu Diose, 18pero lecaxi aca nia nu rri'á tunu leca nú rri'i Jesucristo elietsa lua, xne li'inu rri'inu elietsa lua para nú ri'á elietsa lubee bene enu laca bee bene Israel para nú chili arqui'beella Diose nu zucu' beella stichia'nu, nú nzelila arqui'beella, equie nú unila lubeella nu lunú rlañi' beella xneca nehuañia. 19Nu le'ca xne ulañi'la'hua ye bee milagro cuna ye beenú uyanu arqui'hua unga equie cuenda' Espíritu Santo. Che scua udixiule'a bee bedichia' nze'ca' Jesucristo yebee luhuare, desde Jerusalén nu hasta lu iliu nú lee Ilírico. 20Xne scua neca elliebacu' nú rri'á, nú ixiule'a bedichia' nze'ca' Jesucristo. Pero la ixiule'ene elu uquixie rixiule'ela benene sino que rixiule'ene elu lasca'lí yene' bene equie cuenda' stichia' Jesucristo. 21Tucu nú nequie lu ichi' Stichia' Diose elu rni: Bee bene enu lasca' yene' equie cuenda'nu chulu beella li'inu, nu bee bene enu lasca' ri'i beya' equie cuenda'nu ri'i beella beya'. 22Lunu uya'a ye bee luhuare elu unila luhua nú nza'a enze'e lá llucha'a ayelabi'ya li'ihua añinzuca nú huaxi bese uniarquia ayelabi'ya li'ihua. 23Pero nee lunú ula'xulá rixiule'a Stichia' Diose ye bee luhuare ca'a nu como hasta hua'tu niarquia nzelabi'ya li'ihua, 24enze'e nee rri'á elliebacu' nú nzelabi'ya li'ihua chenu nza'a España. Nu chenu nzelabi'ya li'ihua, nu chenu udetela bee bichia nú ñia nzu arquia nú ubelabi'ya li'ihua, che ri'ihua elietsaa nú nza'a España. 25Pero nee rluti nza'xua Jerusalén nzeyua elietsa lubee sa'ahua enu nzeli arqui' Jesucristo nucua'a ze'e. 26Xne bee bene lu iliu Macedonia cuna bee bene lu iliu Acaya enu nzeli arqui' Jesucristo uri'i beella elliebacu' nú quiete' sa'beella melu nú dete' beella lubee bene enu seca elitsi nucua'a Jerusalén, enu le'ca nzeli arqui' Jesucristo. 27Nu elliebacu' e'cubeella uchiu'u nú xe'la beella elietsa cua', añinzuca nú scua riala ri'ibeella lubee bene Israel xne neca xi neca nú nezi'qui beella lubee bene Israel xne equie cuenda' bee bene Israel uriña Stichia' Diose lubeella, nu nee li'ibeella enu laca bee bene Israel, neca nze'cae nú ri'i beella elietsa lubee bene Israel cuna lunú rlu'cu beella. 28Enze'e chenu la'xua lunú rri'á nu detecuendaa elietsa cua' lubeella, che nza'a España nu chenu dete'a lachihua che nzelabi'ya li'ihua. 29Li'á nediya nze'ca nu chenu nzelabi'ya li'ihua nu' huaxi nú nia luhua equie cuenda' Jesucristo. 30Nee equie nú ye'la'ahua se'cala'ahua Jesucristo, nu equie nú seca Espíritu Santo lia'ahua nacua luhua nú ri'ihua elietsa lua nacua'ahua lu Diose equie cuendaa. 31Na'cuhua lu Diose nú ri'inu elietsa lua chenu nzua leta bee bene Judea enu lá chili arqui' Jesucristo, nu le'ca na'cuhua lunu nú bee sa'ahua enu nzeli arqui' Jesucristo bee enu nucua'a Jerusalén, yucu beella elietsa nú nza'a nzetsa'na para li'ibeella. 32Enze'e tunu zela Diose nú acane scua che ñia nzu arquia nzelabi'ya li'ihua, che nu' beya' tselachia diquila nú nzua cuna li'ihua. 33Nu Pa'ahua Diose enu rliqui' nú nzuxe arquia'ahua nzu cuna li'ihua. Amén.

will be added

X\