Romanos 12

1Enze'e, bee sa'a enu nzeli arquia'ahua Jesucristo, sequia nu nacua luhua, nú scua tucu nú uhua'a arqui' Diose lia'ahua, ude'tecuendahua li'ihua lu Diose xi neca tucu u'na nú nehuañi nú lecaxina nu riu' arqui' Diose. Para nú huañihua tucu nú niarqui'nu nú huañihua nu scua riala lu'cuhua ula'na lunu. 2La huañihua xi nehuañi beelá bee bene enu nucua'a tiembu quie', mejora uche'ehua elliebacu'hua para nú scua che'e nú xneca nehuañihua nu scua ri'ihua beya' nú xneca niarqui' Diose nú huañihua. Nu le'ca scua ri'ihua beya' ta nú neca nze'ca nu ta nú riu' arqui' Diose, nu ta nú riala ri'ihua. 3Equie nú seca Diose li'á enze'e ucañinu li'á, nu uxe'lanu li'á para nú ixiule'a stichia'nu luhua. Enze'e nialuhua, ni'tucuhua la aca nelliñiahua nú másela neca equiehua lubeelá bee bene. Mejora uri'ihua elliebacu' nze'ca equie cuenda'tsiahua tucu nú necane nu tucu nú uliqui' Diose elliebacu' lu cada tucuhua. 4Xne scua tucu nú neca cuerpo' bene nú huaxi parte necane pero laca yeene sibi'i ihuale. 5Le'ca scua lia'ahua enu nzeli arquia'ahua Jesucristo mase nú huaxia'ahua pero lunú nzeli arquia'ahua Jesucristo scua neca tucunecatse'ahua cuna li'inu, xne cada tucua'ahua ria'ahua lunú riala ria'ahua para nú ria'ahua elietsa lubee sa'ahua. 6Nu cada tucua'ahua urene elliebacu' uliqui' Diose lua'ahua tucu nú uninu nú reca'ahua. Enze'e tunu uliqui'la Diose nú nia'ahua stichia'nu, rqui'ña nú nia'ahua stichia'nu lubee bene, equie nú nzeli arquia'ahua li'inu. 7Tunu uliqui' Diose elliebacu' nú zibi'ahua lubee sa'ahua uri'ihua tucu nú necane. nu enu udete' Diose elliebacu' para nú zete' stichia'nu lubee bene rqui'ña nú zete'lla stichia'nu lubee bene. 8Nu tunu necane nú udete'nu elliebacu' lulla nú nilla lubee bene rqui'ña nú scua ri'illa. Nu tunu udete'nu elliebacu' nú xi lia dete'lla lubee bene la tsuquiella nú xi ati'lla, nu enu dete'nu elliebacu' nú nibiya' rqui'ña nú bi'yalla xa nibiya'lla tucu nú rialane, nu enu udete'nu nú ri'i elietsa lubee bene enu seca elitsi rqui'ña nú ñia nzu arqui'lla ri'illae. 9Uzecahua bee sa'hua nu la ri'ihua nú lia ri'itsiahuane nu uluachuhua nú necha rri'ihua, nu uri'ihua nú neca nze'ca. 10Diquinu' arqui'hua uzecahua bee sa'hua xi neca tucu bichihua nu la zucu' ayahua li'ihua, nu ulu'cuhua ula'na lusa'hua. 11La nebichiuhua lunú rri'ihua uri'ihua lunú riala ri'ihua, diquinu' arqui'hua xne lu Jesucristo neca enu sibi'hua. 12Ñia utsu arqui'hua uhuañihua lunú nzuquie arqui'hua, nu uriqui'hua lunú nehuana secahua nu la lliquihua, nu la tsana' arqui'hua nú rnacu'hua lu Diose. 13Uri'ihua elietsa lubee sa'ahua enu nzeli arqui' Jesucristo chenu nu' xi secala'cha'beella nu xi rqui'ña beella, uri'ihua elietsa lubeella. Nu chenu nu' ti rriña ni'hua uri'i nze'cahua lubeella. 14Una'cu'hua lu Diose equie cuenda' bee bene enu necha rri'inu li'ihua nu le'ca una'cuhua nú cha nze'cae lu cuenda' beella nu la i'ñahua nú xi zeca beella. 15Ñia utsu arqui'hua cuna bee bene enu ñia nzu arqui', nu bee bene enu nehuana nzu arqui' ulube'hua lubeella nú le'ca nehuana nzu arqui'hua cuna li'ibeella. 16Uhuañi nze'cahua cuna beelá bee bene, nu la aca nelliñiahua sino que uquie'te'hua ye bee bene, nu la tsi'hua nú recasca'lahua lubeelá bee sa'hua. 17La duse'ehua nú necha neca lubee bene enu rri'i nú necha neca luhua, nu ubi'yahua nú ri'ihua nú neca nze'ca lu ye bee bene. 18Ula'nahua nú chiqui'sca'lá huañi nze'cahua nu la liunuhua bee bene. 19Bee sa'a enu nzeli arquia'ahua Jesucristo la duse'ehua nú necha rri'inu bee bene li'ihua mejora uzelahua nú Diose dete' castiya lubeella, tucu nú rni lu ichi' Stichia' Diose elu rni: “Li'á riala ri'á elu usticia nu detea castiya lulla. Scua uni Diose Pa liñibe.” 20Le'ca uninu: “Tunu bene enu rle lulu rlia'na' ude'te' nú aculla, nu tunu rrebichi'lla ude'te' nú hue'lla, xne scua lañi'lu nú chiqui' tu'lla.” 21La zelalu nú ri'i nú necha neca ana lulu mejora uri'i nú neca nze'ca para nú ri'ilu ana lunú necha neca.

will be added

X\