Romanos 11

1La nia luhua nú utsana' arqui'la Diose bee bene Israel, xne lacane scua. Li'ihua nediya'hua nú le'ca bene Israel necaa, nu le'ca leta bee familia' Abraham nzelaa equie nú nzelaa lubee familia' Benjamin. 2Asta hua'tu ucañi Diose bee bene Israel nú aca beella bee bene'nu, enze'e la tsana' arqui'nu beella. A nchiucu' arqui'hua lu ichi' Stichia' Diose elu rni: Chenu uxanabitsi profeta Elías lu Diose equie cuenda' bee bene Israel chenu unilla: 3“Diose Pa liñibe, udiñila beella ye bee profeta'lu, nu unitilula beella bee ecu'cu'lu. Nu stucutsia li'á uya'naa nu le'ca niarqui' beella nú úti beella li'á.” 4Pero ¿xi ucuaqui Diose lulla che? Li'inu ucuaquinu: “Uhuachulá achi mili bee bene para li'á enu lasca'li zuculliqui lu diose enu lee Baal.” 5Le'ca scua nucua'a chiucu chuna bee bene Israel enu rua'a arqui' Diose, nu ucañinu beella para nú aca beella bee bene'nu. 6Nu equie nú uhua'a arqui' Diose beella, enze'e ucañinu beella, nu la necane equie nú xi rri'ibeella, xne tunu ucañi Diose beella equie nú xi rri'ibeella che la aca'e equie cuenda' nú ru'a arqui' Diose beella. 7Scua ungae. Bee bene Israel enu ucañi Diose, ullela'la'beella inziu' Diose equie nú nzeli arqui'beella li'inu. Pero beelá bee bene Israel lasca' llela' beella inziu' Diose, xne rla'na beella inziu' Diose tucu nú niarqui'tsiabeella, nu la cua'na beella Stichia' Diose tucu nú niarqui'nu, che uri'inu nú unga nziti arqui'beella. 8Tucu nú nequie lu ichi' Stichia' Diose elu rni: “Uri'i Diose nú unga necabe elliebacu' beella, mase rlañi' beella pero neca xi neca nú la lañi'beella, nu mase riene' beella pero neca xi neca nú la yene' beella”, nu scua rri'ibeella hasta nee. 9Le'ca uni David: Equie elubacu nze'ca' beei nu eluxene'beei nucua' sequienu arqui'beei nú nehuañi nze'ca beei, nu zequienune arqui'beei para nú zeca beei castiya nú rialabeei, 10Nu cabe i'cu'lubeei xi necabe i'cu'lu tucu bene enu la ye'e lu, nu zecabeei xi seca tucu bene enu leca xunga tsuxe nú nehuana seca. 11La nia luhua nú lunú lá zela bee bene Israel ari'i tucu nú niarqui' Diose nú unitilulabeella lu Diose, xne lacane scua. Lunú rnia luhua necane nú lá zucu' beella Stichia' Diose, che scua ulu'cu bee bene enu laca bee bene Israel nú xneca tsila'abeella, para nú scua yea arqui' bee bene Israel nu che nu' modo tsila'abeella. 12Nee tunu lunú la zucu' bee bene Israel Stichia' Diose, uzibi' nucua' para nú yala beelá bee bene iliulabe eluxene' Diose, nu lunú uluachu beella lunú niarqui' Diose ri'ilubeella uzibi' nucua' para nú tsila'a bee bene enu laca bee bene Israel. ¡Chiqui' masesca'lá ñia ri'i Diose nú cha nze'ca lu cuenda' bee bene chenu zela bee bene Israel ri'i tucu nú niarqui' Diose nú ri'ibeella! 13Nia luhua bee bene enu laca bee bene Israel, scua tucu nú uxe'la Diose li'á luhua para nú ixiule'a stichia'nu luhua, chiqui' rla'naa nú ri'á tucu nú riala nú ri'á, 14para nú scua biase chu'u bee bene lachia Israel enu chiqui' niarqui' ri'i tucu nú rri'ihua, nu che tsila'abeella. 15Neli nú equie nu né zucu' bee bene Israel Stichia' Diose, scua uyu'u modo nú xneca atsila'a beelá bee bene. Pero, ¿chiqui' masesca'lá ñia neca chenu chili arqui' bee bene Israel Stichia' Diose? neca nucua' xi neca chenu rehuañi zeca tucu bene enu unguti. 16Nu scua tucu nú uri'i Diose nú nza nze'cae lu cuenda' bee bene Israel enu udetela, nucua' neca tucu seña nú le'ca scua cha nze'cae lu cuenda' beelá bee bene Israel, le'ca scua tunu rri'i Diose nú nza nze'ca lu cuenda' luu tucu aca, nu chenu nza nze'cala luu aca cua', diquineca aca cua' nza nze'ca lu cuenda' che. 17Bee bene Israel neca beella xi neca tucu aca olivo, pero nu' beella enu neca xi neca ellutsa lue nú urecu', nu li'ilu enu laca bene Israel necalu xi neca tucu ellutsa' aca olivo ixi nú uyela' luhuare' ellutsaa nú urecu' lu aca olivo ze'e, chequie scua rlu'culu elunehuañi equie cuenda' luu aca ze'e. 18Enze'e la tsi'lu nú maselálu lu ellutsa' aca olivo nú neca xi neca bee bene Israel. Pero tunu scua rri'ilu elliebacu', ullu'cu' arqui' nú laca li'ilu enu rdete' elunehuañi' luu aca ze'e sino que luu aca ze'e rliqui' elunehuañi'lu. 19Tal vez nilu: “Neli'lu nucua', pero bee ellutsaa lu aca olivo cua' urecu'e para nú yela'a luhuare'e nu acatucunecatsea cuna aca olivo cua'.” 20Neli'lu nucua', pero bee ellutsa' aca olivo nú rniru nú neca bee bene Israel urecu' bee xne la chili arquii nu li'ilu uyu'ulu luhuare'e equie nú nzeli arqui'lu Jesucristo, enze'e la aca nelliñalu sino mejora nú bi'ya li'ilu. 21Xne tunu bee bene Israel enu neca xineca ellutsa lu aca olivo ze'e né hua'a arqui' Diose le'ca scua nu' beya' nú la hua'a arqui' Diose li'ilu. 22Uri'i beya' nú nze'ca Diose, pero le'ca rri'inu elu usticia tucu nú necane. Nu uri'ilanu elu usticia lubee bene enu la zucu' stichia'nu, nu uri'inu nú neca nze'ca lulu. Pero riala nú huañilu tucu nú niarqui' Diose nú huañia'ahua xne canu le'ca ri'i Diose elu usticia'nu lulu. 23Nu tunu bee bene Israel benchila' arqui'beella lu Diose nu chili arqui'beella Jesucristo che li'inu lu'cu cuendanu li'ibeella cuna beelá bee bene enu nzeli arqui' Jesucristo. Xne li'inu rlu'cunu poder para nú ri'inu nú acatucunecatse beella cuna beelá bee bene Israel. 24Xne tunu li'ilu enu laca bene Israel necalu xi neca tucu ellutsaa aca olivo ixi nu unga tucunecatselu cuna aca olivo stila nú neca bee bene Israel, ¡xaquie nú la acane scua lubee bene Israel enu lá zucu' Stichia' Diose nú la aca tucunecatse beella stucu bese cuna beelá bee bene Israel, tunu zucu' beella Stichia' Diose! 25Bee sa'a enu nzeli arquia'ahua Jesucristo nu' tucu nú la ri'ihua beya nu niarquia nú ri'ihua beya'e para nú la aca nelliñahua: bee bene Israel enu reca nziti la niarqui' zucu' Stichia' Diose, scua recae hasta bichia nú laxu chili arqui' yebee bene enu laca bee bene Israel Stichia' Diose, bee enu rqui'ña nú chili arqui'. 26Chenu ungalane scua che ye bee bene Israel ri'i caso Stichia' Diose. Nu scua tsila'a beella tucu nú nequie lu ichi' Stichia' Diose elu rni: Eyeche Sión chiu'u tucu bene enu ri'i elietsa lubee bene enu nze'ta lu familia' tuxie Jacob, para nú tsana' arqui'beella nú necha neca rri'ibeella. 27Che yalu stichia'a tucu nú unila nú ria'á perdona stula beella. 28Pero nee lunú reca nziti bee bene Israel nu lá chili arqui'beella bedichia' nze'ca' Jesucristo, che scua nu' modo chili arqui'hua li'ihua enu laca bee bene Israel. Nu añinzuca nú scua necane pero secasca' Diose li'ibeella tucu nú ucuaqui u'nanu lubee bene'beella enu udetela. 29Xne la che'e Diose elliebacu'nu, nu la yucunu lunú lia udete'nu lubee bene, nu le'ca la tsana' arqui'nu bee bene enu ucañilanu para li'inu. 30Hua'tu li'ihua ne chenalahua Stichia' Diose. Pero nee equie cuenda' bee bene Israel enu la zucu' Stichia' Diose nee ulube'nu luhua nú rua'a arqui'nu li'ihua. 31Nu tunu nee bee bene Israel la zucu' Stichia' Diose, recae scua para nú hua'a arqui' Diose li'ihua, pero le'ca riña bichia nú hua'a arqui'nu li'ibeella. 32Uzela Diose nú sia bee bene Israel nu bee bene enu laca bene Israel la zucu' beella stichia'nu para nú hua'a arqui'nu beella. 33¡Chiqui' llene neca eluxene' Diose cuna lunú recanu nu cuna lunú rri'inu beya'! Lecati ri'ibeya' xa neca elliebacu' Diose urre lunú rri'inu, 34tucu nú nequie lu ichi' Stichia' Diose elu rni: “¿Ti itá ri'i beya' nú xneca neca elliebacu' Pa'ahua Diose? ¿Ti máse reca para nú nii lu Diose nú xneca ri'inu?” 35Urre, “¿ti udete' xi udete' lu Diose para nú nzuquie nze'e nú ixiunu lu nze'e?” 36Yebee nú nu' neca stene'nu nu li'inu ureche'nue nu yeene necane para li'inu. Enze'e riala nú lu'cu bee bene ula'na lunu diqui tiembu. Amén.

will be added

X\