Romanos 10

1Bee sa'a enu nzeli arquia'ahua Jesucristo, chiqui' rnacua lu Diose nú tsila'a bee bene Israel. 2Xne li'á nediyaa nú chiqui' rla'na beella nú zibi' beella lu Diose. Pero la ri'ibeella beya' xneca ri'ibeella. 3Xne la zela beella chili arqui'beella tucu nú rialane para nú ri'i Diose perdona beella sino que nzenalatsia beella tucu nú nzeli arqui'beella nú aca perdona beella, luhuare nú ri'i beella tucu nú niarqui' Diose para nú ri'i Diose perdona beella. 4Xne equie cuenda' Jesucristo ulaxu nú rnibiya' ley' Moisés lubee bene, nu nee bee bene enu chili arqui' Diose uri'ilanu perdona li'ibeella. 5Pero bee bene enu niarqui' nú huañi sin dula lu iliulabequie' equie nú nzenala beella ley' Moisés unii nú bene enu rri'i ye nú rnibiya' ley lu'culla elunehuañi mientra nú sucu'lla ley. 6Pero lunú uri'i Diose perdona bene necane lunú uchili arqui'lla Jesucristo nu la yala' ri'illa elliebacu': “¿Ti aca quiee liñibe?” Xne chenu rri'i bene elliebacu' scua niarqui' bene nú lañi'lla nú laca Jesucristo lu iliulabe. 7“Le'ca la yala nilla: ¿Ti aca cha elu nu' bee benenguti?” Xne chenu rnilla scua niarqui'lla nú lañi'lla nú huañi zeca Jesucristo leta bee benenguti. 8Pero lu ichi' Stichia' Diose rni: “Axu nzu Stichia' Diose lulu, rri'itsia nú niilu nu ri'ilu elliebacu' tunu chili arqui'lue.” Xne lunú rixiule'eru lubee bene necane nú xneca chili arqui' beella, nu singuie necane. 9Tunu li'ilu nilu nú Jesucristo neca enu rnibiya' lulu nu diquinu' arqui'lu chili arqui'lu nú Diose uri'i nú uhuañinu lu eluti, che tsila'alu. 10Xne desde hora nú diqui'nu arqui' bene nzeli arqui' bene Jesucristo che utsila'alla. Nu chenu ni bene nú Jesucristo neca enu rnibiya' lulla che tsila'alla. 11Lu ichi' Stichia' Diose rni: “Ye bee bene enu chili arqui' Jesucristo leca xunga ya'na netúlla.” 12Nu nucua' rni nú ante Diose iguale neca ye bee bene leca xiri'i nú ti benella, tunu necalla bene Israel urre lacalla bene Israel. Xne tucutsia Diose neca Diose lu ye bee bene, nu chiqui' ñia rri'inu luye bee bene enu rnacu' lunu. 13Tucu nú nequie lu ichi' Stichia' Diose elu rni: “Yebee bene enu rnacu' lu Diose tsila'a bee nze'e.” 14Pero, ¿xa nacu' bene lunu tunu lasca' chili arqui'beella li'inu? ¿Nu xa chili arqui' beella li'inu tunu lasca' yene' beella nú ti necanu? ¿Nu xneca yene' beella nú ti necanu nu lecati ixiule'e xa neca stichia'nu? 15Nu, ¿xneca ixiule'e beella stichia'nu tunu lecati xe'la li'ibeella? Lu ichi' Stichia' Diose rni: “¡Chiqui' ñia neca chenu rriña bene enu rriñayu resuna nze'ca para nú huañi nze'ca bee bene!” 16Pero la yebee bene rri'i caso bee bedichia' nze'ca' Diose, tucu nú uni profeta Isaías: “Diose Pa liñibe, ¿ti uchili arqui' stichia'lu nú rniru?” 17Enze'e lunú riene' bene nzeli arqui' bene, nu lunú riene' bene neca bedichia' nze'ca' Jesucristo. 18Nu, ¿xie' lasca' yene' bee bene Israel Stichia' Diose la? ¡Pero li'á nia luhua nú ubene'la' beellae! Xne lu ichi' Stichia' Diose rni: Diqui lu iliulabe uri'chia letsela Stichia' Diose, nu hasta elu máse istu lu iliulabe ubene'la' bee bene stichia'nu. 19Neequie rri'á elliebacu': ¿Xie' nú la ri'i bee bene Israel beya' Stichia' Diose la? Pero li'á nia nú rri'i beella beya'e. Xne hasta hua'tu uquie'e Moisés nú uni Diose equie cuenda' beella chenu uninu: Li'á ri'á nú yiea arqui'hua lunú ri'á lubee bene enu laca bee bene Israel, nu lunú ri'á cuna li'ibeei mase nú lacabeei xi recahua, che leehua. 20Nu le'ca sin nú lliqui profeta Isaías uquie'ella lunú uni Diose equie cuenda' bee bene Israel chenu uninu: Bee bene enu laca bee bene Israel mase nú né la'nabeei li'á pero ullela'beei li'á. Nu ulubelua lubeei mase nú ni' né nedichia' beei li'á. 21Le'ca uquie'e profeta Isaías lunú uni Diose equie cuenda' bee bene Israel chenu uninu: “Debichia nzuquiea nú ye'tabeei lua, pero lá niarqui'beei azucu'beei nú rniaá nu rnibeei bee bedichia' nú necha neca equie cuendaa.”

will be added

X\