Romanos 1

1Li'á Pablo, enu sibi' lu Jesucristo, Diose ucañi li'á nú aca apóstol'nu para nú ixiule'a bedichia' nze'ca'nu lubee bene. 2Hasta hua'tu, bee bedichia' nze'ca quie' nze'tae lu ichi' Stichia' Diose nú uquie'e bee profeta'nu. 3Bee bedichia' nze'ca quie' rni equie cuenda' Jesucristo enu rnibiya' lua'ahua nu chenu ube'tanu lu iliulabe ungulanu lubee familia' tuxie David, 4pero equie cuenda' Espíritu Santo necanu lli'ñi Diose xne uhuañi zecanu lu eluti, nu chiqui' rlu'cunu poder. 5Nu equie cuenda' Jesucristo ucañi Diose li'á nú necaa apóstol'nu para nú ixiule'ahua stichia'nu lubee bene, nú chili arqui'beella stichia'nu nu zucu' beellae xne seca beella li'inu. 6Nu le'ca nuuhua nebacu'la Diose leta bee bene enu ucañilanu, para nú acahua bee bene' Jesucristo. 7Enze'e rquie'a carta quie' luyehua enu seca Diose, li'ihua bee enu nucua'a Roma, li'ihua enu ucañila Diose nú acahua bee bene'nu. Diose Pa liñibe cuna Jesucristo enu rnibiya' lua'ahua ri'inu nú cha nze'ca lucuenda'hua nu ñia tsu arqui'hua. 8Rluti nia che'tsa lu Diose equie cuenda' Jesucristo lucuenda' yehua xne yebee luhuare rni bee bene nú xa nzeli arqui'hua Jesucristo. 9Nu diquinu' arquia sibi'a lu Diose nu rixiule'a bedichia' nze'ca' lli'ñinu Jesucristo lubee bene, nu li'inu nediya'nu nú siempre rnacua lunu equie cuenda' li'ihua chenu rnacua lunu. 10Siempre rnacua lu Diose para nú nu' modo nzelabi'ya li'ihua tucu nú rri'á elliebacu'. 11Xne nu' ana arquia nzelabi'ya li'ihua para nú ri'á elietsa luhua lu cuenda' Stichia' Diose, che tsuta'lá arqui'hua lu stichia'nu. 12Nu para nú ri'ihua elietsa lua nu ri'á elietsa luhua equie nú xa nzeli arquia'ahua Diose nu scua dua'ahua ana arqui'sa'ahua. 13Bee sa'a enu nzeli arquia'ahua Jesucristo niarquia nu ri'ihua beya' nú huaxi bese niarquia nzelabi'ya li'ihua, para nú dalalá bee bene enu chili arqui' Stichia' Diose letahua tucu nú unga lubeelá bee eyeche elu uya'la pero hasta nee lá llu'cha yela bi'ya li'ihua. 14Xne cuendaa neca nú ixiule'a Stichia' Diose lu titse bee bene, sia lubee bene griego urre lubee bene enu la neca bee bene griego, lubee bene enu laca urre lubee bene enu reca. 15Enze'e chiqui' nu' ana arquia nzelabi'ya li'ihua para nú ixiule'a bedichia' nze'ca' Diose luhua enu nucua'a eyeche Roma. 16Nu la tua rixiule'a bedichia' nze'ca' Jesucristo. Xne bedichia'cua' rlu'cu poder' Diose. Para nú yebee bene enu chili arqui' li'inu tsila'a beella, nu rluti bee bene Israel nu chelá bee bene enu la neca bee bene Israel. 17Xne equie cuenda' bedichia' nze'ca' Jesucristo rri'i bene beya' nu lunú nzeli arqui' bene Jesucristo la lu'cu bene dula lu Diose tucu nú nequie lu ichi' Stichia' Diose: “Nu bee bene enu la lu'cua' dula equie nú nzeli arqui'beella li'inu huañi beella diqui tiembu.” 18Lia'ahua nediya'ahua nú enza liñibe nze'ta castiya' Diose nu chiqui' juerte zeca bee bene enu la zucu' stichia'nu nu la ri'i tucu nú necane nu equie nú nehuañi beei scua rca nucua' nú chulu bee bene Stichia' Diose. 19Nu li'ibeei nediya'la'beei nú nu' Diose, xne ulube'nu lubeei nú neli nu' Diose. 20Añinzuca nú la lañi' bene Diose pero desde chenu ungache' iliulabe rlañia'ahua ye nú ureche'nu, nu equie cuenda' ye nú ureche'nu rria'ahua beya' nú leca xunga laxu poder nú rlu'cunu, nu li'inu necanu Diose, enze'e leca modo nú cachi' bene nú nu' Diose. 21Añinzuca nú nediya' bee bene nú nu' Diose pero la lu'cu bene ula'na lu Diose tucu nú rialane nu la dete' bee bene che'tsa lunu, sino que rri'itsia bee bene puro beenú necha neca, nu che neca xi neca nú nucua'abeei leta rula'. 22Rnibeei nú chiqui' recabeei pero máse netundubeei. 23Xne luhuare nú lu'cu bee bene ula'na lu Diose liñibe enu leca xunga ati, li'ibeei rlu'cubeei ula'na lubee diose enu la nehuañi, enu nuya' forma' bene, cuna bee nañi xi neca be'la cuna iñi, cuna bee nañi enu rlu'cu tacu cuchiu'. 24Enze'e utsana' arqui' Diose li'ibeei nú necha rri'ibeei, nu netú na nú rri'inubeei sa'beei, 25luhuare nú chenalabeei Stichia' Diose nú neli neca, a'la nzenalabei bedichia' nú la neli neca. Nu rlu'cubeei ula'na lubee nú ureche' Diose, nu la lu'cubeei ula'na lu li'inu enu ureche' bee nucua', nu lu li'inu riala nú lu'cu bee bene ula'na diqui tiembu. Amén. 26Enze'e utsana' arqui' Diose li'ibeei nú rri'ibeei nú necha neca. Nu huaxi bee una'a la ria' tucu nú neca beenchu una'a, sino que niarqui' beenchu le'ca sa' una'a beenchu. 27Le'ca scua nu' bee niyu enu la na'tsea' bee una'a, sino que riu'u arqui'beei le'catsia sa' niyubeei, nu puro nú necha neca rri'ibeei elliebacu' lusa'beei. Niyu cuna niyu rri'i beei nú netú neca. Che le'ca li'ibeei rla'na beei castiya nú zecabeei. 28Nu lunú lá ri'i caso beei Diose, enze'e utsana' arqui'nu beei lu elliebacu' nú necha neca rri'ibeei para nú ri'ibeei lunú la yala ri'ibeei. 29Puro nú necha neca rri'ibeei, rlu'cubeei stucu una'a nu rlu'cubee una'a stucu niyu, huaxi nú necha neca rri'ibeei, rle'beei lu'cusca'lábeei stene'beei, riaa arqui'beei, ruuti beei bee bene, rliunubeei bee bene, nezequiebeei, puro nú necha neca nzucu lubeei rri'ibeei, nu puro rnibeei lu cuenda' bee bene. 30Le'ca se'tabeei bee bene, nu rlebeei lu Diose, la lu'cubeei ula'na lubee bene, secabeei nú chiqui' recabeei, nu nelliñabeei, 31chiqui' nzitibeei nu la tsalubeei stichia'beei, nu lecalí ti zecabeei, nu la hua'a arqui'beei bee bene. 32Nediya'la'beei nú uni Diose nú bee bene enu rri'i scua rqui'ña nú zecabeei, castiya' Diose, añinzuca nú nediya'beei nucua' nu chu rri'isca'lábeei scua, nu hasta ñia nzu arqui'beei chenu rlañi'beei nú stucu bee bene rri'i scua.

will be added

X\