Apocalipsis 9

1Chenu ubixia ángele ayu' trompeta'nu che ulañia nú uyecata tucu belaa enu enta enza liñibe luyuu iliulabe, nu belaa ze'e unguti' liabe nú xa'la ru'u tucu i'chiu llene nú leca resuna cá neca rqui'. 2Nu chenu uxa'la ángele ze'e ru'u i'chiu ebila uchiu'u huaxi llene ru'e xi xiu'u llene liñi tucu horno llene, hasta nú utsacu' bee llenecua' lu bichia nu lubee bii. 3Leta llene ze'e uchiu'u bee culucha enu uri'chialetse diqui lu iliulabe nu unguti' beeí poder para nú unga nelachi beeí, xi nelachi bee nañi lliqui. 4Pero lá alu'cubeeí permiso nú ari'i beei equiya lubee ixixata nu lubee aca nu ni' lubee huañi niye', sino que ri'itsia beeí equiya lubee bene enu la nequie sello' Diose tequiee. 5Pero lá ati'beeí permiso nú úti beei bee bene, sino que ri'itsia beeí nú nehuana zeca bee bene diqui ayu' guu. Nu xi rana elu rutu bee nañilliqui chana elu utubeeí bee bene. 6Bee bichia ze'e la'na bee bene xneca modo atibeella, pero la llela' beella xneca modo atibeella, niarqui'beella nú atibeella, pero leca modo nú atibeella. 7Bee culucha ze'e rna beei xi rnaa bee huayu enu nucua'a tsiñiala para nú cha lu xuu, nu equie beei nzucu tucu nú rnaa xi rnaa corona de oro, nu lubeeí rnaa xi rnaa lu bene. 8Nu ichia equie beeí rnaa xi rnaa ichia equie bee una'a, nu laya beeí rnaa xi rnaa laya bichie. 9Diqui latsa beeí nu' tucu nú rnaa xi rnaa icu', nu cuaca beeí xichi xi xichi chenu riecaxu'u huaxi bee huayu cuna aca reta'beeí lu xuu. 10Nu lluana' beeí rnaa xi rnaa lluana' bee nañi lliqui, nu lu pundo' lluana' beeí nzucu xcuchuí nú rutu bee bene nu rri'i nú nehuana seca bee bene diqui lu ayu' guu. 11Nu bee culucha ze'e nu' tucu enu rnibiya' lubeeí, nu nze'e neca tucu ángele' beze'lu, ángele ze'e lee Abadón dialu hebreo, nu dialu griego lee ángele ze'e Apolión nu bedichia' cua' rni enu rla'xulí. 12Scua ulaxu primero nú nehuana zeca bee bene, pero neelá enta xiucu nú nehuana zeca bee bene. 13Chenu ubixia ángele xu'cu trompeta'nu, chequie ubenea tucu chi nú uchiu'u labe dacu squiñia ecu'cu nú necache' oro nú nchiucu' lu Diose. 14Nu chii ze'e nú ubenea uni lu ángele xu'cu enu nzene trompeta: ―Ula'a dacu bee ángele enu naca'cuu ru'u re'cu llene nú nu' inza nú lee Eufrates. 15Che scua ula'a dacu bee ángele ze'e para nú uti bee nze'e casi arli'ti' bee bene iliulabe xne para enze'e nucua'a bee ángele ze'e para bee bichia nu guu nu lana nú aca bee nucua'. 16Nu li'á ubenea nú calu neca bee sundado, nu neca chiucu ayu'u millón bee sondado enu nchiucu' equie bee huayu ze'e. 17Scua ulañia bee huayu ze'e cuna bee sundado enu nchiucu' equie beeí. Nu bee sundado enu nchiucu' equie beeí diqui latsabeei nu' tucu icu' nú neluu, nu azul, nu naachi, nu lluca equie bee huayu ze'e rnaa xi rnaa lluca equie bee bechiee nu ru'u beeí xiu'u quii, nu llene, nu azufre. 18Nu casi arli'ti' bee bene iliulabe unguti cuna quii nu llene nu azufre nú xiu'u ru'u bee huayu ze'e. 19Nu cuna poder nú rlu'cu bee huayu ze'e nu cuna ru'u beeí nu lu pundo' lluana' beeí ruuti beeí bee bene nu rri'i beeí nú nehuana seca bee bene, xne lu pundo' lluana' beeí rnaa xi rnaa lluca equie be'la. 20Pero beelá bee bene enu lá ati, equie cuenda' nú nehuana ulle'ca beella, lá tsana' arqui'beella nú uri'ibeella nú necha neca, nu ulu'cu beella ula'na lubee benechiqui' nu lubee diose enu necache' oro, plata, bronce, quiee nu aca, nú la ye'e lu, nú la yene' nu la tsee. 21Nu le'ca lá tsana' arqui'beei nú ruuti beei bee bene. Nu la tsana' arqui'beei nú rdu'ixiu beei bee bene, nu la tsana' arqui'beei nú rri'i beei eluhuexe, cuna nú rri'ibeei eluhuana' Le'ca né tsana' arqui'beei nú rri'i beei eluti, cuna nú rri'i beei elu uliñi, cuna nu rri'i beei eluhueexe cuna nu rri'i beei eluhuana'.

will be added

X\