Apocalipsis 7

1Chenu ulaxu nú ulañia bee nucua', che ulañia tacu bee ángele bee enu nucua'a tacu squiñia iliulabe para nú la zela beenu nú aca bi enu enta dacu squiñia iliulabe, para nú la aca bi lu iliulabe, ni' lu inzatu', ni' lu ni' tucu bee aca. 2Che ulañia stucu ángele enu nze'ta enza rliñi bichia, nzenenu sello' Diose enu nehuañi. Nu che fuerte uni ángele quie' lu dacu bee ángele enu unguti' poder para nú la ri'i bee ángele cua' equiya lu iliulabe nu lu inzatu': 3―La ri'ihua equiya lu iliulabe, ni' lu inzatu', ni' lubee aca, hasta nú la'xuru quie'eru sello' Diose'ru tequiee bee bene'nu. 4Nu ubenea nú calu neca bee bene Israel enu nequietsia sello tequiee. Nu luye beella, neca ciento cuarenta y cuatro mil bee bene enu nequie sello tequiee. 5Xne chi'chiucu mili bee bene enu nze'ta lu familia' Judá bee enu uquie sello cua'. Nu le'ca chi'chiucu mili bee bene enu nze'ta lu familia' Rubén, nu le'ca chi'chiucu mili bee bene enu nze'ta lu familia' Gad. 6Nu le'ca chi'chiucu mili bee enu nze'ta lu familia' Aser, nu le'ca chi'chiucu mili bee enu nze'ta lu familia' Neftalí, nu chi'chiucu mili bee enu nze'ta lu familia' Manasés, 7nu le'ca chi'chiucu mili bee enu nze'ta lu familia' Simeón, nu le'ca chi'chiucu mili bee enu nze'ta lu familia' Leví, nu chi'chiucu mili bee enu nze'ta lu familia' Isacar, 8nu chi'chiucu mili bee enu nze'ta lu familia' Zabulón, nu chi'chiucu mili bee enu nze'ta lu familia' José, nu chi'chiucu mili bee enu nze'ta lu familia' Benjamín ye bee familia quie' uquie sello tequie beella. 9Lu ze'ela ulañia huaxi añi bee bene, enu enta lubee nación nu lubee eyeche, nu bee bene enu enta leta yelu bee familia nu yelu clasia' dialu rni beella. Nucua'a beella enza lu xleta' bene enu rnibiya' nu lu Cordero, nu huaxi añi beella hasta nú leca' ti ri'i ana lacu' beella, nu nutu beella laquie niquichi, nu nzene beella iñia. 10Ye beella ubixiali beella nu unibeella: Pa'ru Diose neca enu utsila'a li'iru nu nzucunu lu xleta, nu chiqui' rnibiya'nu cuna Cordero'nu. 11Nu ye bee ángele enu nucua'a abenchila' xleta'nu cuna ye bee ala cheta'cu bee bene uxu nu dacu bee enu nehuañi, nucua'a abenchila' xleta'nu ze'e, che utsulliqui bee ángele ze'e elu nzucunu hasta nú udi' tiquiee beella lu yuu para nú ni beella bedichia' nze'ca lunu, 12nu uni beenu: ¡Amén! Li'inu enu rlu'cu ye poder nu juerza nu elliebacu' nu riala nú lu'cu bee bene ula'na lunu, nu zucu' aya bee bene li'inu nu dete' bee bene che'tsa lunu, nu ni bee bene bedichia' nze'ca lunu, ye tiembu li'inu enu neca Pa'ahua Diose. Amén. 13Hora ze'e tucu lu alacheta'cu bee bene uxu ze'e unedichia' lua: ―¿Ti neca bee bene enu nutu laquie niquichi cua', nu ca bene beella? 14―Nu ucuaquia, la ri'á beya' Detá, li'ilu nediya'lu. Che uni nze'e: ―Li'ibeella neca beella bee bene enu chiqui' nehuana ulle'ca, nu nee nequichiuu xucu beella equie nú utsana' arqui'beella stula beella, equie cuenda' rene' Cordero' Diose. 15’Enze'e nucua'a beella lu xleta' Diose nú neca equie nu bichia si rula' sibi' beella liñi indu elu nzucunu, nu li'inu enu nzucu lu xleta nú neca equie ze'e, nzunu cuna li'ibeella, nu li'inu rriucunu li'ibeella. 16Nu leca' bichia nú lia'na' beella, nu bichi' beella, le'ca la tsiquia' be'bichia li'ibeella nu ni' la aca nelea' zeca beella, 17xne Cordero enu nzu elu nzucu Diose. Li'inu bi'yanu li'ibeella tucu nú rriucu tucu bene bee sanchi, nu uya'nu li'ibeella elu rliñi inza nú rliqui' elunehuañi, che Diose ñie'e ye inza nú unguna' beella lubeella.

will be added

X\