Apocalipsis 6

1Che ulañia nú unguxi bene enu neca xi neca Cordero tucu lu achi sello ze'e, nu ubenea chi tucu bee nañi ze'e, fuerte xi neca chenu rachu beziyu' nu uninu: ―¡Utee ca'a! 2Nu che ri'ya nu ulañia nú ulube'lu tucu huayu niquichi ze'e, nu enu nchiucu' equieí nuya' tucu hua'tse. Nu unguti'lla tucu corona lunú uri'illa ana, nu uchiu'ulla para nú nze ri'illa ana. 3Chenu unguxi Cordero ze'e sello rrucu, che ubenea nú uni enu rrucu nehuañi ze'e: ―¡Utee ca'a! 4Nu che ulube'lu tucu huayu nelu, nu enu nchiucu' equieí unguti' tucu espada llene cuna poder para nú liu bee bene nu útisa' bee bene. 5Chenu unguxi Cordero ze'e sello rriuna, che ubenea nú uni enu rriuna nehuañi ze'e: ―¡Utee ca'a! Che ulañia nú ulube'lu tucu huayu natsa, nu enu nchiucu' equieí nzene tucu llica beya'. 6Nu labe dacu bee enu nehuañi ze'e ubenea tucu chii enu uni: ―Tucu kilo trigo zeca tucu bichia riña' bene, nu chuna kilo cebada zeca tucu bichia riña' bee bene, pero la nitilulu aceite cuna viño. 7Chenu unguxi Cordero ze'e sello tacu, che ubenea nú uni enu tacu nehuañi ze'e: ―¡Utee ca'a! 8Che ulañia nú ulube'lu tucu huayu nachi lua, nu enu nchiucu' equieí lee eluti, nu enu nze'tanala li'í lee ebila. Unguti' bee nucua' poder para nú úti bee nucua' tucu lu tacu parte bee bene iliulabe. Texcua'a beella ati equie nú liunu sa'beella, nu texcua'a beella ati ichia biñia, nu elichia, nu úti bee nañi dañi li'ibeella. 9Chenu unguxi Cordero ze'e sello ayu', ulañia e'ya altar ze'e bee espíritu' bee bene enu unguti bee benequie' bee enu udixiule'e Stichia' Diose nu utsuta' arqui'beella lu stichia'nu. 10Nu fuerte ubixiali beella nú unibeella: ―Diose enu rlu'cu ye poder, li'ilu enu la lu'cu dula nu rri'ilu tucu nú necane, ¿se xala tiembu rle'e para nú ri'ilu elu usticia'lu lubee bene enu udiñi li'iru lu iliulabe para nú ixiu beella lunú uri'inu beella li'iru? 11Che cada tucu beella unguti' beella laquie niquichi ungutu beella nu uni Cordero ze'e lubeella nú cua'aquiesca' beella lle'na tiembu, hasta nú za' beela sa' beella enu nzeli arqui' Jesucristo, xne rri'isca'la nú ati beela bee sa' beella tucu nú unguti beella, li'ibeella enu le'ca sibi' lu Diose. 12Chenu ulañia nú unguxi Cordero ze'e sello xu'cu, che fuerte uxuu, nu bichia unga natsa xi natsa tucu laquie nú natsahua, nu guu unga neluu xi neluu rene, 13nu bee belaa enu nu' liñibe uzana' lu yuu iliulabe xi sana' bee higos nú niye' nu' lu aca'e chenu reca tucu bi fuerte. 14Nu liñibe unitilu xi richi tucu rollo ichi', nu yebee dañi nu bee yuu nú nchiucu' lu inzatu' uche'e bee luhuare'e. 15Che ye bee arre lu iliulabe cuna beelá bee usticia, nu bee enu rnibiya' lubee sundado, nu bee bene xene, nu bee enu rlu'cu elurnibiya' lu yeene, nu bee esclavo, nu bee enu laca esclavo ye beella ucachi'lu beella liñi bee yube' nu liñi bee quielaa nú nu' dañi. 16Nu unibeella lu dañi nu lubee quiee: ―Utsa'cu'hua equieru, nu uca'chi' li'iru lu bene enu rnibiya' nzucu lu xleta nú neca equie, nu lu castiya nú dete' Cordero li'iru. 17Xne uriñala bichia nú chiqui' dete' Diose castiya bee bene, ¿nu lecati riqui' castiya cua'?

will be added

X\