Apocalipsis 20

1Chequie ulañia nú enta laca tucu ángele enza liñibe nu nzenenu liave ebila, nu le'ca nzenenu tucu cadena llene. 2Nu una'tse ángele ze'e dragón enu neca serpiente hua'tu lee beze'lu nu benechiqui' ullica'cuu ángele ze'e li'i cuna cadena diqui neca tucu mili lana. 3Che utsi'qui ángele cua' beze'lu ebila nu utsacu'ta'nu ru'u ebila ze'e para nu la chiua' beze'lu zequienu arqui' bee bene iliulabe hasta nú za' tucu mili lana, che chiu'u zecai ebila lle'na tiembu. 4Nu ulañia bee xleta nú rnaa xi rnaa xleta' arre, lu xleta ze'e nucua'a bee bene enu unguti' poder para nú lualue lu cuenda' bee bene. Le'ca ulañia espíritu' bee bene enu uchiecu' bee bene lluca equie, equie nú udixiule'e beella Stichia' Diose nu cuna equie cuenda' Jesucristo. Nu li'ibeella né lu'cu beella ula'na lu monstruo ze'e ni'lu imagen'í nu lá zela beella nú aquie seña' monstruo ze'e tequie beella urre yabeella. Nu ulañia nú uhuañi zeca beella lu eluti stucu bese, nu unibiya' beella cuna Jesucristo tucu mili lana. 5Bese quie' neca bese rluti nú uhuañi bee benenguti, pero texcua'a bee benenguti la huañi hasta nú yalu tucu mili lana ze'e. 6¡Nza nze'cae equie cuenda' bee bene enu rluti huañi zeca lu eluti! Li'ibeella leca' xinaa beella ante Diose, nu la atia' beella bese rrucu sino que li'ibeella aca beella ule'ya' Diose cuna Jesucristo nu nibiya' beella cuna li'inu lu tucu mili lana. 7Chenu uza'la tucu mili lana, che la'a zeca beze'lu ebila elu netsei, 8para nú zequienui arqui' ye bee bene iliulabe. Zequienui arqui' Gog cuna Magog, para nú quiete'sa' beella bee bene' beella nu rri'ibeella xuu. Nu chiqui' huaxi neca beella xi huaxi eyuxi ru'u inzatu'. 9Nu nze'ta bee benequie' enza huaxi bee luhuare, nu yete'sa'beei abenchila' elu nucua'a bee bene' Diose, cuna abenchila' eyeche nú chiqui' secanu. Pero desde liñibe xe'la Diose quii para nú chiquilixu ye bee benecua'. 10Nu beze'lu enu uzequienu li'ibeei uyu'u luquii elu nu' azufre, elu le'ca netsela monstruo cuna profeta enu uzequienu bee bene, nu ze'e leca' bichia nú chiu'u beei, nu chiqui' zeca beei castiya nú leca xunga laxu bichia si rula'. 11Che ulañia tucu xleta nú rnaa xi rnaa xleta' arre, llenee nu niquichi. Nu lu xleta ze'e nzucu tucu enu nzucu. Nu ante lu nze'e ulaxulí iliulabe nu liñibe. 12Che ulañia nú ante lu xleta elu nzucu Diose, ze'e nucua'a bee bene enu uhuañi lu eluti bee bene uxu cuna bee enu me'e. Nu uya'la lubee libro nú nequie nombre' beella, nu le'ca uya'la lu stucu libro nú nequie nombre' bee bene enu huañi liñibe. Che ulualu Diose lucuenda' bee benenguti ze'e, lunú xi uri'i cada tucu beella nequie lu libro ze'e. 13Inzatu' udete' cuendae bee bene enu unguti lue, le'ca esquie eluti udete' cuendae ye bee bene enu unguti, uriña bee benequie' lu Diose para nú lualunue lu cuenda' cada tucu beei lunú xi uri'ibeei. 14Che eluti, nu luhuare' bee benenguti, rucuaa bee nucua' uyu'u luquii, lu quii cua' neca eluti rrucu' bee bene. 15Nu luquii ze'e uyu'u bee bene enu la nzucu ichi nombre' lu libro nú rliqui' elunehuañi' bee bene.

will be added

X\