Apocalipsis 2

1’Nee uquie'e bee bedichia' nú xe'lalu lu bene enu rnibiya' lubee benea enu nucua'a eyeche Efeso: “Ninguie' uni li'inu enu see labe achi bee candelero de oro, nu enu nzene achi belaa ya chube, li'inu rninu luhua: 2Li'á nediyaa ye lunú rri'ihua, nu nediyaa nú chiqui' fuerte riña' nú rri'ihua, nu le'ca nediyaa nú la llaca'hua lunú rri'ihua. Nu le'ca esquie nediyaa nú la riqui'hua bee bene enu necha rri'i. Le'ca udete'hua preo bee bene enu rni nú neca apóstol pero laca beei apóstol, nu uri'ihua beya' nú puro eluquichia' rnibeei. 3Li'á nediyaa nú rlu'cu arqui'hua nu nehuana ulle'cahua equie cuendaa nu lá llaca'hua. 4Pero nu' tucu nú la yu' arquia rri'ihua, nú la zeca'hua li'á tucu nú secahua li'á hasta hua'tu. 5Ullu'cu arqui'hua xneca uzecahua li'á hasta hua'tu nu xneca rri'ihua nee. Uche'ehua arqui'hua lunú rri'ihua, uri'ihua tucu nú rri'ihua hasta hua'tu, xne canu chu liquia castiya luhua nu che la aca'hua tucu ejemplu lubeelá bee bene, tunu la che'ehua arqui'hua lunú necha rri'ihua. 6Pero nu' tucu nú neli rri'ihua tucu nú rialane, nú rana arqui'hua nú rri'i bee bene nicolaítas, tucu nú le'ca rana arquia nú rri'ibeei. 7Bee bene enu niarqui' yene', uyene'hua lunú rni Espíritu Santo lubee benea: “Bee bene enu rri'i ana lu dula, li'á detea nú aculla ndixi nú rayu lu aca nú rliqui' nú nehuañi bene nzucu liñibe elu nzucu Diose. Bedichia' nú uni Jesucristo lubee bene'nu enu nucua'a.” 8’Nee uquie'e bee bedichia' nú xe'lalu lu bene enu rnibiya' lubee benea enu nucua'a eyeche Esmirna. Nu singuie quie'elu: “Enu rnibiya' desde chenu uquixie iliulabe, nu la laxu nú rnibiya'nu, enu unguti nu uhuañi zeca, li'inu rninu luhua: 9Li'á nediyaa xneca nehuana secahua equie nú nu' xi rri'inu bee bene li'ihua, nu le'ca nediyaa nú secahua elitsi añinzuca nú li'ihua necahua xene equie nú nu'lulahua inziu' Diose. Nu le'ca nediyaa xneca se'ta bee bene li'ihua, li'ibeella enu rni nú neca bee bene Israel nu neca bee bene' Diose, añinzuca nú li'ibeella neca beella bee bene' beze'lu. 10La lliquihua lunú nehuana secahua, xne beze'lu ri'i nú du' bee bene chiucu chunahua ni'cu' para nú scua aca achee tunu neli nú nzenalahua inziu' Diose. Nu chi'i bichia nehuana zecahua, nu utsuta' arqui'hua lua hasta chenu atihua che liquia elunehuañi nú leca xunga laxu luhua. 11Bee bene enu niarqui' yene' uyene'hua lunú rni Espíritu Santo lubee bene enu neca bee benea: Bene enu ri'i ana nú la ria' dula la zeca' nze'e castiya nú neca xi neca eluti rrucu, nú zeca bee bene.” 12’Nee uquie'e bee bedichia' nú xe'lalu lu bene enu rnibiya' lubee benea enu nucua'a eyeche llene Pérgamo. Uquie'e: “Li'inu enu nzene espada nú chiqui' nelatsa rucu ru'u, Li'inu rninu luhua: 13Li'á nediya nú eyeche elu nucua'ahua beze'lu neca enu rnibiya' ze'e. Pero mase nú scua necane li'ihua nzuta' arqui'hua lua nu la tsana' arqui'hua nú nzeli arqui'hua li'á ni' bee bichia nú unguuti bee bene tucu bene enu lee Antipas, tucu bee sa'hua enu lá tsana' arqui' nú nzeli arqui' li'á, li'illa enu unguuti bee bene eyeche'hua elurnibiya' beze'lu. 14Pero nu' chiucu chuna beenú la yu' arquia rri'ihua. Nu necane nú le'catsia letahua nucua'a bee bene enu la tsana' arqui' bedichia' nú uzete' Balaam bee bene, nu Balaam udu' arqui' Balac nú xneca du'lla arqui' bee bene Israel para nú acubeella elubacu nú rdete' bee bene u'na lubee enu laca diose enu nehuañi nu para nú ri'ibeella xitse clasia' eluhuexe. 15Le'ca letahua nucua'a bee bene enu la tsana' arqui' nú rri'i tucu nú rri'i bee bene enu lee nicolaítas. 16Enze'e tsana' arqui'hua beenú rri'ihua, xne tunu la che'ehua nú xneca nehuañihua, la lea' detea castiyahua cuna espada nú xiu'u ru'a. 17¡Bee bene enu niarqui' yene' uyene'hua lunú rni Espíritu Santo lubee benea! Bee bene enu uri'i ana lu dula, li'á detea maná aculla, elubacu nú nu' liñibe, nú nu'che' a'chi'. Nu le'ca detea yalla tucu quiee me' nú niquichi elu nequie nombre'lla nú necuqui nú lecati ri'i beya', sino que enu ati'tsia quiee cua' ri'i beya' nucua'.” 18’Nee uquie'e bee bedichia' nú xe'lalu lu bene enu rnibiya' lubee benea enu nucua'a eyeche Tiatira: “Ninguie' neca nú rni Lli'ñi Diose, enu rulu siqui' i'culu xi rulu icu' nú lee bronce chenu netsee lu quii: 19Li'á nediya luye nú rri'ihua, nu nediyaa xneca secahua li'á, nu xneca nzeli arqui'hua li'á, nu nediyaa lu ye beenú rri'ihua por li'á, nu nediyaa nú la llaca'hua xne másela rri'i nze'cahua nee luquela hua'tu. 20Pero nu' tucu nú la yu' arquia rri'ihua nú rriqui'hua Jezabel, una'a enu rni nú rixiule'e Stichia' Diose. Nu selahua nú sequienunchu bee benea nu rdu'nchu arqui'beella nú ri'ibeella eluhuexe, nu racubeella bee elubacu nú udete' bee bene u'na lubee diose enu la nehuañi. 21Li'á udetela tiempo para nú chiecu' arqui'nchu stulanchu nu chili arqui'nchu Diose, pero la zelanchu. 22Enze'e nee ri'á nú aca ritinchu nu utanchu lu luna. Nu utia bee lli'ñinchu, cuna bee bene enu nehuañi tucu nú nehuañinchu, tunu la tsana' arqui'beei nú nehuañibeei tucu nú nehuañinchu, 23nu ri'á nú chiqui' nehuana zecabeei. Scua ye bee benea ri'i beya' nú li'á nu'lua elliebacu' bee bene cuna xi sa' arqui'beella. Nu li'á liquia lu cada tucuhua equie nu xa uri'i cada tucuhua. 24Pero beelá bee benea enu nucua'a eyeche Tiatira, bee enu la chenala lunú uzete' Jezabel bee bene, li'ihua enu rni nú la chululi lunú a'chi' neca lu cuenda' beze'lu, equie nú la ri'i casohua nucua' la lu'cua'a stucu nú nia luhua. 25Tucutsia nú nia luhua, utsuta' arqui'hua lunú nzelila arqui'hua Diose hasta bichia nú riña zecaa stucu bese lu iliulabe. 26Bene enu la ria' dula nu sucu' nú rnia ye tiembu nú nehuañilla, li'á detea nú rnibiya'a lulla para nú nibiya'lla lubee bene iliulabe chenu riña bichia ze'e. 27Scua tucu nú uliqui' Paa lua nú rnibiya'a, le'ca scua liquia nú nibiya'hua lubee bene xi neca tucu bene enu nzene tucu vara nú neca hierro, xi neca chenu rle'e bene tucu etsu scua ri'inunu bee bene enu lá niarqui' azucu' nú rniru, 28nu le'ca detea belaa enu lee lucero rliñi sila' lubeella. 29Bee bene enu niarqui' yene', yene'hua lunú rni Espíritu Santo lubee bene enu neca bee benea.”

will be added

X\