Apocalipsis 18

1Chenu ulaxu nú ulañia bee nucua', cheela ulañia stucu ángele enu nze'ta laca enza liñibe nu chiqui' rlu'cu ángele quie' poder, nu ellie'nu udu'llie'e diqui lu iliulabe, 2nu chiqui' fuerte uninu: ―Unitilula, unitilula eyeche llene Babilonia nu nee necatsiae xi neca ni' bee beze'lu, nu le'ca necatsiae xi neca ni' ye clasia' bee benechiqui', nu xi neca ni' ye bee iñi enu rcuecu' bee enu necha rna xiñia arqui' bee bene. 3Xne xi neca chenu rdu'niqui sa' bee bene, scua uri'inu eyeche llene ze'e ye bee bene iliulabe para nú ri'i beei ye clasia' eluhuexe, nu bee arre enu nucua'a lu yu iliulabe uri'i eluhuexe cuna eyeche ze'e, nu bee bene enu rri'i berexe lu yu iliulabe unga beella xene equie cuenda' ye clasia' eluhuexe nú reca eyeche ze'e. 4Luze'elá ubenea stucu chi nú uni enza liñibe: ―Uchiu'uhua eyeche cua', li'ihua enu neca bee benea para nú la ri'ihua sa' bee dula nú rri'i bee benecua', nu para nú la nehuana zecahua tucu nú nehuana zeca eyeche llenecua'. 5Xne huaxi añi stula beei nu hasta liñibe riñae, nu la zañi' Diose stulabeei. 6Uri'inuhua bee benecua' tucu nú uri'inubeei beelá bee bene, nu uri'ihua nú ixiubeei chiucu bese másela lunú uri'inu beei beelá bee bene, nu uri'ihua nú chiucu bese másela nehuana zeca beei tucu nú uri'inubeei bee bene. 7Uri'ihua nú nehuana zeca bee bene eyeche llenecua' nu ucuna'hua beei, scua tucu nú ñia nzu arqui'beei uri'i beei nú necha neca, nu tucu nú uri'i bee eyeche cua' elliebacu' chenu unii: “Li'á nzucua'a ca'a xi nzucu tucu reyna, laca una'a zaqui, nu le'ca leca' bichia nú nehuana zecaa.” 8Nu tucutsia bichia tucutse riña nú nehuana zeca bee bene eyeche cua', atibeei, una'beei, zeca beei biñia, nu bichi' beei, chiquibeei xne chiqui' llene neca poder' Diose nú dete' castiya lubee bene eyeche llene cua'. 9Nu bee arre lu iliulabe bee enu uri'i lunú niarqui'tsia, bee enu uri'i eluhuexe, cuna eyeche llenecua', li'ibeei nehuana zeca beei, nu una'beei, chenu lañi'beei llene nú riqui eyeche cua'. 10Nu istu cua'a bee arre cua' equie nú xiquibeei castiya nú reca eyeche cua', nu rnibeei: ―¡Cue'curulu, cue'curulu Babilonia, eyeche llene nú chiqui' unga neca equie! Xne terratuinza uriña castiya'lu. 11Nu bee bene enu rri'i berexe nehuana zeca beei nu una'beei equie cuenda' eyeche llenecua' xne leca' bee bene enu tsi ye nú rutibeei: 12xi neca bee oro, plata, quiee nú ñia rnaa, perla, laquie fiñio, nu laquie seda nú neluu morado, nu ye clasia' bee aca nú ñia rlia nu ye beenú ungache' cuna bee aca fiñio, nu beenú ungache bronce, icu', nu mármol nu marfil. 13Le'ca esquie laca' utibeei canela cuna ye clasia' bee cuana' nú ñia rlia, leca' modo utibeei quiendixi, mirra, perfume, aceite de oliva, harina nú fiñio, trigo, u'na', sanchi, huayu, acareta, nu le'ca la aca' utibeei bee bene. 14Nu le'ca nibeei lu eyeche ze'e: ―¡La lu'cua'lu ye bee elulle'ca nú chiqui' uyu'u arqui'lu, nu ulaxulí ye eluxene'lu cuna ye beenú chiqui' ñia rnaa ulu'culu! 15Bee berexecua' uri'i nú unga xene beei equie cuenda' eyeche llene Babilonia cua', istu cua'a beei equie nú xiquibeei castiya nú zeca eyeche cua', una'beei nu nehuana tsu arqui'beei. 16Nu nibeei: ―¡Cue' eyeche llene cua', cue' eyeche llene cua'! Elu utsuche'e bee bene cuna laquie fiñio, nú neluu nu morado, li'ibeei enu utsuche' cuna oro, cuna perla cuna quiee nú ñia rnaa. 17¡Xne terratuinza ulaxu ye bee eluxenecua'! Ye bee bene enu nza liñi barco, cuna ye bee capitán' barco, cuna yebee marinero nu bee bene enu rri'i riña' lu inzatu', istu ucua'a beei. 18Chenu ulañi'beei llene nú riqui eyeche llene cua', che ubixiali beei nú unibeei: ―¿Leca xunga ulañia'ahua tucu eyeche llene tucu nú neca eyeche quie'? 19Nu che udu'beei yube'cha' equie beei nu runa'beei, nú nehuana seca beei, nu unibeei: ―¡Cue'e! ¡Cue' eyeche llene! Xne equie cuenda' eluxene'e unga xene ye bee bene enu rlu'cu barco, ¡nu terratuinza ulaxu eyeche cua'! 20Che uyene tucu chii liñibe nú uni: ―Pero li'ihua enu nucua'a liñibe, nu li'ihua bee bene' Diose, nu li'ihua bee apóstol nu bee profeta, ñia utsu arqui'hua lunú seca eyeche cua' xne scua rri'i Diose elu usticia'nu equie nú uri'inu bee bene eyeche cua' cuna li'ihua. 21Nu tucu ángele enu chiqui' naaqui uletsa tucu quiee llene, nú rnaa xi rnaa quiee molino nu utsi'quinue lu inzatu', nu uninu: ―Scua tucu nú chiqui' fuerte utsi'quia quiee quie', scua chiqui' fuerte nehuana zeca eyeche llene Babilonia, nu leca'ti lañi' li'i stucu bese. 22La yenea' nú rula bee arpas, ni' bee musica, ni' flauta, ni' bee trompeta bee calle eyeche Babilonia cua'. Nu ni' stucu bee bene leca' ti rri'i riña' eyeche ze'e, nu ni' nú xichi bee molino rri'i riña' la yenea' eyeche ze'e. 23Nu leca' bee bichia nú aca achee nú nu' quii eyeche ze'e, nu la chia' bee bene eyeche llene ze'e, ni' tsa'a chia la ria'a beei, ni' berexe la ria'beei, añinzuca nú chiqui' neca equie bee berexe eyeche cua' lu iliulabe hua'tu, nu uzequienu eyeche llene cua' ye bee bene iliulabe cuna elu uliñi. 24Nu le'ca eyeche cua' udiñi bee bene bee profeta' Diose, cuna bee bene enu nzeli arqui' Diose, no por equie cuenda' eyeche cua' udiñi bee bene beelá bee bene enu unguti lu iliulabe.

will be added

X\