Apocalipsis 14

1Le'ca ulañia nú nzu Cordero' Diose equie dañi nú lee Sión. Li'inu nzununu ciento cuarenta y cuatro mil bee bene, nu yebeella nequie nombre' Cordero cua' nu cuna nombre' Pa'nu tequie beella. 2Nu ubenea nú rula enza liñibe xi neca chenu rula rlaca huaxi inza o xi rula chenu rlaca beziu' o xi neca chenu rula huaxi bene huaxi bee arpas. 3Nu ungula beella tucu canto cuqui lu bene enu rnibiya' nzucu lu xleta ante lu dacu bee enu nehuañi nucua'a ze'e nu ante lu ala cheta'cu bee bene uxu. Nu lecati unga canto ze'e, yetsia lu cuarenta y cuatro mil bee bene enu utsila'a lubee bene iliulabe ungula canto ze'e. 4Nu bee niyu cua' neca bee enu lá ri'ilí eluhuexe, nu uhuañi beella sin nú ri'ibeella dula, nu li'ibeella neca beella enu nzenala Cordero' Diose catse elu nzanu. Le'ca li'ibeella neca beella enu utsila'a lubee bene iliulabe, nu neca beella xi neca primero u'na rlu para Diose nu para lu Cordero'nu. 5Nu leca xunga uni beella eluquichia' nu la lu'cu beella dula lu Diose. 6Che ulañia stucu ángele enu rcuecu' enza liñibe nuya' bedichia' nze'ca nú leca xunga laxu, para nú ixiule'enue lu ye bee bene enu nucua'a luyuu iliulabe, nu lecaxi ri'i tunu xi dialu rni beella, nu xi familia neca beella, nu xi eyeche enta beella nu xi nación enta beella. 7Nu che chiqui' fuerte uni ángele ze'e: ―Ulliquihua Diose, nu uni'hua bedichia' nze'ca lunu, xne uriñala hora nú hualunue lu cuenda' bee bene. Ulu'cuhua ula'na lu enu ureche' iliulabe, liñibe, inzatu' nu elu rliñi bee inza. 8Nu che uni stucu ángele ze'e: ―Unitilula, unitilula eyeche llene Babilonia xne xi neca chenu rdu' niqui bee bene sa' bene, scua uzequienu eyeche llenecua' ye bee bene iliulabe para nú ri'ibeei ye clasia' eluhuexe. 9Che chu nzenala stucu ángele rriuna enu fuerte uni: ―Tunu nu' tá tucu bene cha lu'cu ula'na lu monstruo cua' nu lu imagen'í nu zela nú quie seña'í tequiee urre ya, 10bene ze'e dete' Diose castiya nú chiqui' fuerte, nu chiqui' nehuana zecalla luquii, nu lu azufre ante lubee ángele' Diose nu ante lu Cordero' Diose. 11Nu leca xunga yala quii elu nehuana zeca bee bene. Nu ni' bichia nu ni' rula' la tsulachi bee bene enu lu'cu ula'na lu monstruo nu lu imagen'í enu quiee seña'í tequiee. 12Enze'e bee enu neca bee bene' Diose bee enu sucu' stichia'nu nu nzeli arqui' Jesucristo. Rqui'ña nú riqui' beella lunú xi seca beella. 13Che ubenea tucu chi enu uni lua enza liñibe, nu uni: ―Uquie'e nú nia lulu: “Desde nee nza nze'cae lu cuenda' bee bene enu unguti nu uyali arqui' Jesucristo.” Che uni Espíritu Santo, neli nucua', xne nze tsulachila beella equie nú nehuana ulle'ca beella, xne ye lunú neca nze'ca uri'ibeella rlu'cu cuenda Diose. 14Che ulañia tucu xcabe nequichi nu equie xcabe ze'e nzucu tucu bene enu rnaa xi rnaa bene enu uxe'la Diose lu iliulabe. Nu equiella nzucu tucu corona nú neca oro, nu nzenella tucu sierra nú nelatsa. 15Nu che uchiu'u stucu ángele liñi indu nu fuerte uninu lu enu nzucu equie xcabe ze'e, nu uninu lulla: ―Udu' sierra cua' leta bee ula'cu nú nu' lu iliulabe, nu uchie'cu'e, xne necala tiembu para nú yete' sa'e. 16Nu enu nzucu equie xcabe ze'e udete'lla sierra'lla luyuu iliulabe, nu che uquiete' sa'lla ye ula'cu nú nu' lu iliulabe. 17Che uchiu'u stucu ángele liñi indu nú nzucu liñibe, nu le'ca nzene ángele ze'e tucu sierra nú chiqui' nelatsa. 18Nu che uchiu'u stucu ángele ru'u ecu'cu liñi indu ze'e enu rlu'cu poder lu quii, nu fuerte uni ángele quie' lu ángele enu nzene sierra nú nelatsa ze'e: ―Uchie'cu' bee uva nú nu' lu yuu iliulabe xne unguye'elane. 19Che uchiecu' ángele ze'e uva lu iliulabe cuna sierra ze'e. Nu udu' ángele ze'e bee uva liñi tucu tanque llene elu tsi'i bee uva. Le'ca scua neca castiya llene nú xe'la Diose nú zeca bee bene. 20Nu ru'u eyeche ze'e utsi'i bee uva ze'e nu chenu utsi'i bee uva ze'e uchiu'u rene. Nu rene cua' uri'chia luyuu ze'e tucu trecientos kilómetros, nu uliquine aya hasta elu nzi'qui artaru'u tucu huayu.

will be added

X\